عاااجل صور مكان اختبار منطقة الرياض

[سيكو سيكو]

لازم نرفع شكوى لله أولا....ثم للمراقبين ....وش الطريقة نبي نوقف مثل هالمسخرة في المستقبل...يعني ضاق الرياض
اسمه الرياض........لاحول ولاقوة الا بالله......الله يسهلها علينا جميعا ونقول زودونا درجات عاد ولا تعودونها...

[عبدالمجيد*]

حسبي الله ونعم الوكيل ...
وش الموقع هذا ! انا سااكن خارج الرياض والمسافه راح تتجاوز 150 كم ذهابا ...من غير زحمت الرياض وكاميرات ساهر ووووو.

يعني اطلع قبل الاختبار بساعتين ع الاقل .

المشكله بعد الموقع ما اعرفه وياليت احد يوصف لنا ؟

[houston]

حسبي الله عليهم



العنوان التفصيلي
طريق الثمامة بعد الدوار الثالث (دوار العويضة) تاخذ يسار وتترك المحطة على يمينك
وتمشي 4 كيلو تاخذ يمين وبعدها تمشي 2 كيلو تحصل القاعة على يميين
حسب الكروكي في الصورة

المكان بعيد جدا وغير مناسب لسكان جنوب وغرب الرياض
المسئله استغلال من العالمية
يقولون ان الامانه رفضت تاجير الموقع المعتاد
وكل يوم نسمع كذبه جديدة من العالميه

للاتصال بالعالمية 8001243113
للاتصال بقاعة رشوش 0509444666

[العاشق الولهان 03]

والله مشكله انا من سكان اخر غرب الرياض ماعاد وراي الا التفتيش والمزاحميه الله يعين بسسس

اذا الطلاب 7 الاف والرسوم 3400 الجامعه مع نصيبهم من العالميه يعني كم مليون للجامع

هذي جامعة المؤسس اجل

[الرسام ابوعساف]

ياشباب الله يوفقكم لوجه الله تعالي بعلم شي انا الترم الماضي يوم خلص الاختبار طلعت في نصف القاعه وورفعت صوتي وقلت يا دكاترة الجامعه ياناس لي متا والاختبارات محتكرة على معهد العالميه ليش ماتنزلون مناقصه للشركات تنافس المهم مسكني واحد بعد ما التموا الطلبه وخذاني ع جنب وقال طلبه انك تهدي الوضع وعطاني بطاقته وطلع اردني الريس ىالتنفيذي للقاعه الاختبار وعطاني اختباراتي القادمة كلها مجانا وبرضه قال لك عندي دوره في اللي تبي بس لاتلم علينا الطلبه لان الجامعه ماخذه عليهم تعهد لو يشتكون الطلبه يغيروون الشركة وفيه شركات تطلب الجامعه الطالب ب 400 ريال فقط

[ابو سعوود]

اخوي الرسام كنت اتمنى الموضوع الي صار معاك ثرته من بداية
للوصول الى مطالبنا عموما وفقك الله ومشكور

[بوراشد]

انا من اهل الشرقيه نحن معكم لان كثير يقول لي جده افضل وارتب واسنع بكل صراحه

راح ارفع شكوى على معهد العالميه لانه سيئ النظام ومراقبين كلها واسطات وامور تعقيديه

[700]

انتبهو لحد يضيع الي يعرف طريق الثمامه اذا صار الدروازه على يمينه يدعس لين الدوار الي جاي ويلقى اللوحات مكتوب عليها مقر اختبارات جامعه الملك عبدالعزيز

اهم شيء اذا حسيت انك ضعت على طول وقف وسال عن دوار العويضه وبس وذا وصلت الدوار فيه لوحات بالدوار توصلك للقاعه اتبعها

اهم شيء على طول اذا ضعت وقف وسال

والله يوفقنا وياكم

[جابر ابو فارس]

الى متى هذا السكوت خلونا نجتمع كلنا في اي يوم تحددونه ونتكلم والساكت عن الحق شيطان اخرس
والله حرام تدفع اربع الاف وطاشينك اخر الدنيا وطريق خطير
كل الجامعات تختبر بلاش ولا يدفعون ريال واحد ولكن سكوتنا ورضانا انهم ياخذون الف ريال خلاهم يتمادون وترزقون الله على حسابنا
من هذا المنبر ادعو الى اعتراض الطلاب في كل المراكز في جمع المناطق ونحدد يوم كلنا ونتكلم كلمة رجل واحد

[الشايب.]

مرحبا
اولاً ل: حسبنا الله ونعم الوكيل على كل من قدم مصلحته المادية على مصلحة الطلاب.
ثانياً: انا رحت للموقع اليوم عشان اعرف المكان لا اضيع وقت الاختبار، طريق الثمامة بشكل عام يشجع على السرعة والتهور والله يستر منها، والطريق الي بعد دور العويضة خط واحد رايح جاي وعندك كثير من الطلاب راح يسلكون هذا الطريق غير ان هذا الطريق مظلم ومليان بالشاحنات وناهيك ان فيه اختبارات بعد المغرب والعشاء ما اقول الا الله يستر علينا ويوصلكم لاهاليكم سالمين.
ثالثاً: بحكم ان عدد الطلاب يفوق الـ3500 طالب وين السبب في حجز قاعتين في شمال شرق الرياض وجنوب غرب الرياض ويختار الطالب الموقع المناسب.
المضحك في الموضوع ان جامعة الملك فيصل موزعة القاعات في الرياض ومنهم قاعة مقابل منزلي بالضبط واحس بالقهر كل ما اجي اطلع مع العلم مايخذوا الف 1000 ريال.
ولو راح نتكلم بالمنطق والواقع الان الطلاب المبتعثين الدولة تدفع عليهم مبالغ طآلة ومصاريف والي نبيه احنا الطلاب لا تخذوا منا رسوم ولا تعطونا مكافآت، اعتبروها منح دراسية داخلية بالمجان ولا هم سعوديين واحنا لا
وبالتوفيق للجميع.