ماذا جنى الغرب من الاختلاط

[soma al7elwa]

كل المشاكل هذه هي نتيجة لوضعهم الذي يبيح كل شيء

وليس مقننا بقواعد سواء كانت دينية او اخلاقية أو قانونية

وصدقني كل هذا لدينا ولكن ربما بأعداد اقل نسبيا و"تحت الطاولة"

مافي اي دليل يثبت اننا افضل حالا

ولا يمكنك الاعتماد على "لم يسبق لي أن سمعت" حيث ان الأمر به "شرف عوايل" ومن الطبيعي ان يصل الامر لدينا الى القتل في سبيل كتم هذه "الفضيحة"

14- قالت صحيفة (سنانيري) الأمريكية التي تكتب عن مشاكل الشباب تحت سن العشرين إن المجتمع العربي مجتمع كامل وسليم ومن الخليق لهذا المجتمع أن يتمسك بتقاليده التي تقيد الفتاة والشاب في حدود المعقول. وهذه القيود صالحة ونافعة؛ لذا أنصح أن تتمسكوا بتقاليدكم وأخلاقكم وامنعوا الاختلاط وقيدوا حرية الفتاة بل ارجعوا لعصر الحجاب فهذا خير لكم من إباحة وانطلاق ومجون أوروبا وأمريكا، فقد أصبح المجتمع الأمريكي مجتمعاً معقدا مليئاً بكل صور الإباحية وإن ضحايا الاختلاط والحرية يملؤون السجون والأرصفة والبارات والبيوت السرية.

ههههههههههههههه

ذكرتني بنكتة "نساء المملكة العربية السعودية هن أكثر النساء جمالا ودلالا" اللي ما اعرف اصلا كيف شافوهم عشان يحكموا - اذا افترضنا انها حقيقة-

في جملة ماما الله يخليها لنا دايما تقولها

"لا تطالعي المحل من برا ايش معروض فيه ، ادخلي جوا المحل وشوفي "

مو بس تقولها لما نروح السوق ، دايما فكل حاجة تقولنا هي لما سمع عن شي ويعجبنا

هي دي الجملة نفسها اقولها للمجلة

المجتمع الكامل والسليم دا بيعاني زي ما بتعانوا من كل المشاكل دي بس الفرق انو انتو تقولوا ترى احنا عندنا كزا وكزا وكزا

واحنا ياحبة عيني تحت الطاولة

اللي مو قادرين تفهموه - او بالاحرى ما تبغوا - اننا نطالب باختلاط بشري طبيعي وحرية انسانية وليس تفسخ وانحلال

ما نبغى نمارس الجنس على ارصفة الشوارع

ولا نتبادل القبل في اسياب الجامعات

ولا نبغى ندخل على ابهاتنا وامهاتنا بالـboy friend و الـgirl friend

ولا ابغى ابشر اهلي اني حامل من my boy friend

ولا نبغى نكون Single mom و Single dad

ولا ابغى اروح بار ارقص مع الـ friends و اشرب WhiskeyوChampagne

نبغى نعيش حريتنا وطبيعتنا بدون تعقيد وتهويل

نبغى نتعلم من احنا صغار انو الجنس دا علاقة طبيعية بين الرجل والمرأة وانو الشعور بالرغبة هو ميل فطري وكل اللي المفروض نعمله اننا نهذب هادي الرغبة ونكبتها للوقت المناسب مع شريك الحياة المناسب بدون الختان نفسي او الفعلي يحصل حاليا

ابغى يكون ليا حقي كزوجة فالعلاقة المشروعة بدون ما أخجل او اشعر بالقرف بسبب تربيتي على ان هذا امر مقرف ومخجل وابقى على هذه الحال سنين طوال وتمثيل المتعة والرضى بما يحصل سواء اعجبني ام لا ارضى شهوتي ورغبتي الطبيعية ام لا

نبغى نتعلم انو الشباب والبنات دول بشر وزي بعض

ناس لهم عقول وقلوب واعضاء ومشاعر واحاسيس وكل شي

بس في مميزات نفسية وجسمانية تختلف بين الاتنين

وليسوا مجرد شهوات واهواء او شياطين وذئاب وانياب و و

نبغى نتعلم انو الرجل والمرأة ممكن تكون بينهم علاقة تزيد عن حدود الصرة والركبة

نبغى نتعلم انو ممكن تكون علاقتنا محددة ومقننة اخلاقيا ودينيا وقانونيا بحدود حمراء لا يحق لي وله تجاوزها وليس منعا مطلقا بينهما اختصارا للطريق

نبغى نتعلم انو العفة والطهارة والشرف هو ليس غشاء

نبغى نفهم انو الشرف ليس معلقا على البنت فقط بل هو عالشاب ايضا

أبغى اكون محمية وانا ماشية لوحدي مو بالبودي قارد معايا طول الوقت وملازم لي

ابغى اكون محمية اذا اتعرضلي القريب قبل البعيد باغتصاب او زنا محارم او زنا بالاكراه او زي ما تبغى تسميه

ابغى ازا احد اتعرضلي او لابني او لابنتي الاقي جهة مسؤولة تاخدلي حقي كاملا بصفة سرية بدون ما تتدخل الواسطات عشان يتهرب احدهم عن فعلته

ابغى اروح بملابسي اللي اعتدي علي بيها لاقرب مشفى عشان يكشفوا عليا ويدروا عالمجرم

ابغى الاقي شرطة ونظام امن فعال لحمايتي

ابغى الاقي اخصائي او طبيب نفسي يعالج ما أخطئه هذا المجرم

ابغى اكون طفل مربى في بيئة سليمة مع اسرة طبيعية حتى وإن كنت نتاجا عن علاقة غير شرعية لا ذنب لي فيها وليس ملاجئ ايتام قد لا تصلح أن تكون ملجئ للكلاب او القطط فضلا عن انسان

ابغى تكون ليا حريتي فاختيار الرجال زوج المستقبل وليس ابن عمي و"محجوزة" و " مخطوبة" من يوم ما اكون فاللفة

ابغى تكون ليا حريتي في اكمال تعليمي وعملي

ابغى يكون ليا قرار فعال في كل شيء يخصني

ابغى امشي بالطريقة اللي اشوفها انا صحيحة منطقيا وعقليا وليس ما يفرضه الآخرون علي

ما ابغى اكون في اليمين ولا ابغى اكون فاليسار

ابغى اكون في الوسط

ما ابغى تفسخ وانحلال ولا أبغى قيود ومنع حريات

قد سمعتوا بحاجة زي كدا؟ ولا صعبة برضو

ولا راح ينحذف ردي بحجة أنه خارج عن الموضوع؟؟؟