تــســكــيــنــكـ فــيـ كــلـــيــتـــكـ حــســبـ خــطـــتــكــ

[THE DOCTOR]

السلام عليكم

كيفكم جميعا

ان شا الله انكم مبسوطين ومرتاحين

زي ما انا حاس واظن انتو برضو حاسين انو الاسابيع الجايه في الجامعه هي اهم واصعب فتره نحس انها هي اللي هتحدد مستقبلنا ((بما انو في يدنا ذحين 70 درجه في كل ماده))

وطبعا ما زال حالنا في التشكي من وضع خطتنا سوا كنا أ أو ب ((بما أنو ب وضعهم اصعب بكثير))


وبدا بعضنا يفقد الامل والبعض الثاني فقدوه من جد بعد نزول قرار ((لازم تجيب تقدير كذا كذا في مادة كذا كذا عشان يكون لك امل انك تخش كلية كذا كذا))


لا ومتى نزل القرار بعد ما عدى ترم كامل وانا اعرف كثيرين كان باقيلهم درجه على التقدير الاحسن من تقديرهم بس مشوا الموضوع عايدي بما انهم قالو المعدل حينحسب بالدرجه مو باتقدير بس فجااااااه يجو ويقولو التقادير مهمه

بس هاذا الموضوع يبين انو جامعتنا في اي وقت يمكن تتخذ قرار بغض النظر هل هو يصب في مصلحة الطلاب اولا وطبعا في قرارت كثيره يمكن تفيد البعض بغض النظر عن الكل يعني مصايب قوم عند قوم فوائد

مثلا انا انبسطت لنفسي لما شفت قوانين التسكين لانها كانت تصب في مصلحتي وفي نفس الوقت قللت من المنافسه على الكليه اللي ابغاها بس للاسف اكثر اللي اعرفهم اتحطمو من يوم شافو القرار


طيب احنا لو نجي ونفكر صح ونحاول اننا نلعب دور في اتخاذ القرر حتى لو ما كنا متاكدين من انو صوتنا هينسمع ولالا اهم شي حاولنا حتى لو محنا متيقنين باننا هنلقى اللي نبغاه لانو احنا اللي يهمنا اننا ندرس التخصص اللي نبغاه بغض النظر عن فين هندرسو بس طبعا اول خيارتنا عزوز عشان كذا هنحاول قد ما نقدر


عشان كذا انا عندي فكره اللي هي اننا كل واحد مننا يرسل ايميل لمدير الجامعه ((الا هو اكبر راس في الجامعه وهاذي هي الطريقه الوحيده اللي نقدر نوصلو فيها الموضوع))
نطالب فيه بطريقه لائقه انهم يعيدو النظر في موضوع التسكين
ونقترح عليه انهم يسكننونا على حسب خطتنا مثلا اذا انهم طالبين 150 طالب في كلية الطب ياخذون 75خطه أ و75 من خطه ب
ويتبعو النهج هاذا في كل الكليات
ونحاول اننا نمهدلو الموضوع مثلا نقولو انكم انتو حطيتو السنه التحضيريه عشان تعدلو بين الطلاب وعشان محد ياخذ مكان احد احسن منو ولو جيت وطالعت في اختلاف مستوى الصعوبه في اختبارات الخطتين او في طريقة عرض المنهج او في تقليص المنهج((طبعا بغض النظر الفروق اللي بين المدرسين اللي نعاني منها من يوم بدينا ندرس))

وانا اتوقع مع كثر الزن على الاقل هيدخل الموضوع في راسو وانا متاكد انو سمع الكلام ذا قبل كذا
واذا نقدر نحاول برضو نرسل الموضوع ذا لاكبر عدد من المسؤولين في الجامعه هيكون شي حلو

وعلى فكره ترا كذا دكتور عندنا قلنا اننا نسوي ذا الموضوع وصراحه انا ما ادري اذا احد اتكلم في الموضوع ذا قبلي ولالا

عالعموم هاذي فكرتي وصلتها لكم اتمنى منكم انكم تفكرو في الموضوع وتحاولو تسوه وتكلمو اكثر عدد من اصحابكم يسوه وبذلك نكون احنا سوينا اللي علينا واللي نقدر عليه

وانا هكون اول واحد يبدا في الموضوع واحاول اني انزل في المنتدى الايميل اللي هرسلو

والله يوفقنا جميع للوصول لغاياتنا