.,~ دفتر الأيام ~,. ملاذ بوح صامت

[خالد9921]

أحد معارفي المقرّبين يملك سلسلة محلات حلويات شهيرة
المهم هالرجل مثل أخوي ويثق فيني بشكل كبير
يوم شافني فاضي بالإجازة ولا عندي شغلة ولا مشغلة
قال خالد طالبك طلبة وقل تم .. قلت تم تم
قال عندي واحد من الفروع أبيك بس تشقّر عليه وإنت فاضي
وتجلس فيه ساعة والا ساعتين باليوم تراقب العمّال وحركة الزباين وكذا ..
وبأعطيك أي مبلغ تبيه وأنا أقول عيب يا رجل ما بينّا احنا بينّا عيش وملح يا راقل
< هيّن بس إذا ما خليتك تعلن إفلاسك وتقفل أبو سلسلة المحلات


المهم قلت بسم الله وحركّت للمحل أمس بعد العصر
وادخّل ويرحبّون فيني العمّال ومن هالحركات النص كم بحكم إنّي المدير الجديد

جلست ع كرسي الحكم بعد ما ضيفوني انواع الحلويات والمشروبات لين بطني انتفخ
وبعد نص ساعة من الطفش والملل بحكم إني جالس اراقب الداخل والطالع فقط
قلت يا ولد قوم سّو لك شغلة معهم
ما تدري يمكن فيه دبوس من العمّال والا كاميرات
وتتفشّل قدّام خويّك راعي المحل إنّك نايم بالعسل ما غير تضرب بهالحلويات

بالفعل تحمّست ولبست قلافز على ايدي يعني اني بأرتب صحن حلاوة هههههههههههههه
لكن العمّال رفضوا بشدّة قالوا اقعد عيب انت المدير ما يصير
< قلت بنفسي حشا كلاب بوليسية مدربّها صاحبي بشكل فضيع هههههههههههه
أساساً ما يحتاج أقولكم اني جبت العيد وخبصت ام الصحن ولا عرفت اقفله


بعدها بساعة اتصل صاحبي على جوّالي وانا افرفر بين برّادات وطاولات الحلويات
كان متحمّس بالمكالمة
ويسألني بأسلوب إني ماسك ادارة المحل زين واني شايف كل زبون بكم اشترى
واني شايف كيف يشتغلون العمّال .. بإختصار انسان يحترق في هالمهمة عملاً ونشاطاً

ما درا إني نايم وما غير اضرب بالحلويات

خالد ها بشّر كيف حركة الزباين والمحل ؟
يجاوبه خالد وهو يبلع حبّة بقلاوة بصمت .. ابشرررك الزباين كثير ماشاءالله
خالد تقريباً كم المبلغ اللي دخل بكاشير الحساب للحين ؟
يجاوبه خالد وهو يبلع حبّة قاتوه بصمت .. ابشرررك ما اشوف بالكاشير الا الزُرق
خالد كيف العمّال الجدد بالمحل يشتغلون زين ؟
يجاوبه خالد وهو يبلع شوكليت بصمت .. الحين اقدر اقولك ان شغل العمّال حلااااوة هههههههه
خالد مرتاح عسى ما كلفت عليك ؟
يجاوبه خالد وهو يبلع تشيز كيك .. ابد انا مرتاح عالآخر ياخي مرتاااح هههههههه

انتهت المكالمة وصاحبنا مصدّق وانا اقول يارب سامحني

يارب يشوف ردّي هذا ويعفيني من هالمهمة
لأن وربي لو جلست اسبوعين كمان على زيارة هالمحل راح يطلع لي كرش تاريخي :/
يخرب بيت هالمحلات روائح بضاعتها يوم تتسمّر قدامها ساعات ما تقدر تمسك نفسك

[خالد9921]

..........................


من المواقف اللي فجّرتني ضحك
جاء للمحل ولد مع أخته تقريباً أعمارهم ما بين 15- 18
يوم شفتهم داخلين قلت بس قامت الطقطقة خليني اسّوي اكشن ههههههههههههه
لاني كنت مترزز ولابس زين
فـ لو شافوني بوسط المحل اوجهه العمّال بيقولون هذا راعي الحلال طويل العمر ههههههه
بالفعل قمت من مكاني ورحت ارتزيت قرب العمّال
يوم دخلوا اوّل ما شافوني بهالمكان وهالمظهر
انطلقوا عندي بعجالة .. سلام عليكم لوسمحت الله يخليك نبغى نحجز كيكة عندنا حفلة
< انا قلت بنفسي من جدّهم ذول صرت انا راعي كيكات ووش تبون كريمة .. وش يفهمني !!
والله ولا بحق الترم اللي توّني مخلّص منه ههههههههههههههههه
طبعاً انحشرت بطلبهم ودايركت ناديت عالعامل قلت له تفاهم معهم
اخذهم العامل وتفاهم معهم على حجم الكيكة وطولها .. الخ وجاء وقت السعر
صكهم على وجوههم قال لهم 340 ريال
لكن سبحان الله النساء حتى لو صغيرات عندهم ذكاء فطري في التسوّق ولكاعة
ما اسمعها إلاّ تصيح عالعامل ما يجي 300 ؟ ما يجي 250 ؟
حرام عليكم احنا زباين عندكم احنا من زمان نتعامل معكم احنا واحنا واحنا ..
وقام اخوها يفزع معها على نفس المنوال
وما عاد اسمع الا الاصوات ارتفعت إلاّ وإلاّ يبون تخفيض
أذكياء يحسبوني صاحب المحل ويبون يحرجوني واخفَض لهم


لكن العامل كان مرّه مصرّ انّه ما ينزل ريال عن الـ 340
يوم شفت هالأخوين ينخوني بصوتهم ونظراتهم المستمرة

قلت للعامل أقول خلّك على جنب بس خلاص 270 ولا تزعلون
ما عليه
خل هالصغيرة تحتفل بحفلة تخرّج ثالث متوسط مانبي نكسر خواطر ههههههههه
والعامل يناظرني بتخوّف مثل اللي يقول خربت بيتنا مع صاحب المحل ههههههه




الله يفكّ هالمحل منّي لأجل ما أقضي عليه وعلى رزق صاحبه

[خالد9921]

- جنّة الحرف .. الجماعة ينتظرون شي أدبي راقي وبوح مُنظّم
وأنا قالبها مقلّط سواليف .. راعي هذرة وكيس فصفص مين قالّكم تستضيفونه



* من الدروس المُستفادة خلال عملية النسف للحلويات :

- إنّ العمل الحرّ وتجارة المحلاّت فيها رزق ماشاءالله تبارك الله خيالي
إذا كنت ذكي تجارياً على طريقة لا ترمي البيض في سلّة واحدة
أي لا تحط كل فلوسك وتجميعتك بالمشروع لأجل لو خسرت ما تروح فيها
لا تتردّد بفتح نشاط تجاري بالبيع والشراء بموقع ممتاز وأمور جذّابة
أنا جيت بعد صلاة العصر مباشرةً للمحل وكانت أوّل نص ساعة مافيها زباين
قلت بنفسي كيف مستمرّين في المحل ومافي ولا زبون دخل للحين ؟
يادوب خفّت حرارة الشمس واقترب المغرب وكأنّها الأمر اللي كان يمنع الزباين من الجيّة
ما اشوف الا أنواع العملات ماشاءالله تدخل الكاشير
وحركة بالمحل وعمليات شراء بمبالغ ممتازة من السعوديين وغير السعوديين بعد
خلال ساعتين فقط حسّيته يطلّع ارباح مب بس تكاليف التشغيل !!
فعلاً عندنا قوّة شرائية جبّارة بهالبلد ...



- إذا تملك ضمير حيّ راح تكون أمين حتّى لو ما تاخذ إلاّ بضعة مئات من الريالات
وإذا تملك ضمير ميّت مخيس والله لو تاخذ ملايين لا يمكن تكون أمين مُخلص
وهذا اللي لاحظته بالعمّال الأجانب تبع المحل
رغم رواتبهم اللي تُعتبر بسيطة بالنسبة لنا واغترابهم ومعاناتهم
لكن الحقيقة شفت فيهم قمّة الامانة والاخلاص بالعمل
حتّى وانا اتجسّس عليهم خفيةً بدون ما يعرفون أو يشعرون ..
أذهلني احتراقهم بالعمل من ناحية النشاط والسرعة والنظافة وخدمة الزبون وارضاءه بشكل جبّار
وكأن المحل حقّهم سبحان الله جلست أقول بنفسي من وين لهم هالعزيمة والنشاط والأمانة
رغم انه يمديهم يهملون ويتقاعسون ولا أحد بيدري لا الزبون ولا صاحب المحل
أيقنت وقتها إنّهم عقليات مهمّا بلغت من القصور وقلّة العلم
تربّت على احترام العمل والجدّية فيه
وإن هالريالات الحلال البسيطة يستشعر مبلغها الكبير عند أهله في بلادهم
على عكس الوصخ اللي جالس بالمكتب ينافخ عالمراجعين ولا يخلّص معاملات
ما غير يضرب بالساندوتشات وجرايد الكورة ثم يضرب الباب
ويجيك آخر الشهر طفران ومديون رغم راتبه اللي فوق 10 آلاف مثلاً


فلوس حلال .. وفلوس حرام .. لا ترضى على نفسك وهم الحرام الزائل