عندما همست لأمي .. لقد تخرجت يا أماه .. ولكن

[زكي زكي]

إهداء لمن فقد أمه ..

القلب يحـزن والمدامـع غزيـرة
وفي جوفي نار من لهبها تباكيـت
والدار ظلمة كانت أمـي تنيـره
يايمة وينك من دونك خلى البيت
قلبي تفطر على الفرقـى المريـرة
أمنـت بالله وبقـداره تراضيـت
الموت حقن وكلـن لـه مصيـره
وموت النبي قبلك يايمـة تعزيـت
هذا جلالك وريحك فـي عبيـره
كل يوم أشمه وليا شفتـه تهنيـت
صوتـك يايمـة يامحلـى أثيـره
وحنانـك يمـه يخلنـي تفديـت
من يوم رحت والمشاعـر أسيـرة
محدن افضفض له وبصمتي تسجيت
يايمـه منـه أجـي واستشيـره
يعدلني لي شفت الصواب وتنحيت
يايمه كلـن يناظـر فـي حيـرة
من يوم رحتي وانا اللي ما تواسيت
أجي دويخ فـي وقـت الظهيـرة
محدن سأل عني يقـول تغديـت
وابيت ليلـي وعيونـي سهيـرة
وكم الليالـي نايـم ماتعشيـت
ظروفن يمـه تواجهنـي عسيـرة
الشكـوى لله بظروفـي تعنيـت
يوم كنتي عندي وكني أمير ديـرة
كلن يناديني ويقول لي تعال هيت
ويوم رحت يمه وكني في جزيـرة
وحيدن فيها عن الناس تواريـت
ياكم تعلمت من معانـي غزيـرة
يامنهل التعليـم منـك تربيـت
كم قصة قلت وللماضيـن سيـرة
ولي جيت عندك بسواليف تسليت
أه يايمـه لنظـراتـي الأخـيـرة
مليت كفي ترابـن ثـم حثيـت
ابشري يمـه بدعـوات كثيـرة
كلما ذكرتك وللرحمـن صليـت