هنا نتجمع لتبادل خبراتكم وأسئلتكم عن المقابلة الشخصية ملابس+فنون+طفولة+تربوي +إسكان

[seham alwead]

راح ابدا انا لانه عندى تقريبا خبره وجربت مقابلات شخصية مختلفة لمجالات مختلفة معيدات وظائف صحية ادارية وغيره يعنى زى مايقولون من كل بستان زهره..
في البداية الكليات الصحية :سؤال عرفى عن نفسك ؟ متى تخرجتى ؟ لو كان لك فتره ايش سويتى خلال تلك المده؟
ليش قدمتى على هذى الكلية؟
المعيدات : عرفى عن نفسك؟ ايش سويتى خلال الفتره من تخرجك لحد التقديم؟ ايش تقدرين تقدمين لبنات تلك الكلية المقدمة عليها؟
المصانع لوظائف ادارية: ايش تخصصك؟ ليش تشتغلين وظيفة ادارية وفي مجال غير تخصصك؟ لو كملتى عندنا وجاتك وظيفة في نفس تخصصك ( مختبرات طبيه) تتركينا وكان جوابي ببساطة( لو ريحتونى ماراح ادور غيركم)هاتى مميزات وعيوبك..اشتغلتى من قبل وكم كان راتبك؟
طبعا سويت مقابلة شخصية 3 مرات في يوم واحد لنفس الوظيفة (رئيس المصنع- وابنه النائب- ومدير الموارد البشرية)
وظيفة في مختبر خاص: اسمك ؟ اشتغلتى من قبل ايش خبراتك ؟ انتي محجبه؟ طبعا الجواب نعم هى بس انا اشوف الحجاب يعيق التواصل وفيه صعوبة في سماع التلفون؟؟؟ عجيب وفي الاخير الوظيفة ريسبشن؟ لو عندك الهيئة وظفناك في المختبر جبنا الهيئة الجواب : مافيه عندنا وظايف حاليا.
نفس المختبر ارسل اوراقنا الى شركة في مجال الاتصالات الخاصة تعطى للمرضى نتائج التحليل واسعارها المهم رحنا مو عشان الوظيفة لكن مسماها غريب (كول سنتر) ويوم رحنا اكتشفنا انها زى السنترال اوتلفون رد على الاستفسار المتعلقة بالمختبر المهم دخلنا المقابلة الشخصية وكان دكتور ومعه دكتورة:
عرفى نفسك بالانجليزى؟ اشتغلتى من قبل وكم كان راتبك؟ كم كان عدد ساعات دوامك؟ شفت واحد ولا اثنين؟
عندك استعداد تاخذين شفت ليل ؟ عاد قلت من الساعة كم ؟!!! الجواب من 1 الظهر لحد الساعة 9 الى 10 بالليل ومقر الشركة باخر جدة.. يعنى بالعربي اصل بيتنا الساعة 11 او 11:30 وحليها عاد لوفيه زحمة مت اصل؟؟
المهم الراتب 3500 ريال .. والمقر تبعهم عبارة عن شقة في الدور السابع وعندهم حارس امن واحد .. وبين وبينكم المكان وشكل البنات اللى فيه يخوف (مو عشان البنات فيهم شي لا والله... بس بصراحة المكان ما يريح وطبيعة العمل ممله طول وقتك على الكمبيوتر والسماعة في اذنك) وبعدين الدكتورة والدكتور اللى سو معك المقابلة متنرفزين ومقهورين لانك تحفظتى على الشفت الليلى.. او طلبتى مهله للتفكير... وكانهم متوقعين منك القبول بس لانك محتاجه للوظيفة او ان الراتب 3500 ريال وبعدين تهديد اذا ماراح تستمرين معنا قولى لانه ماعندنا استعداد انك تتركينا في اى لحظة لى انه حنا متاعقدين مع شركات بعقود..
بعدين سالونى سؤال استفزازى بصراحة: لوفيه وظيفتنا وجاك عرض بالعودة للوظيفة اللى قبل فيها ايش تختارين؟
الوظيفة اللى متعوده عليها ولا تغيرين؟ قلت لو كنت تقصد انه اسهل لى من انى اتعلم شي جديد فلا ماعندى مانع اجرب شي جديد بس يكون افضل منها بس لو كانت اقل منها وماراح يكون فيها تطور لى لا والله افضل اللى قبل فيها..
قبل كذا قدمت في مستشفى خاص في المختبرات: وقابلت في المقابلة المدير الطبي اللى طبعا بنت الشيخ وكان تسال عن المكان اللى اشتغلت فيه وعن التدريب وبعدين سالتنى سؤال غريب : هل عندك مشكله لو اشتغلتى مع رجال (وانا في نفسي اقول انا عارفه انه المستشفيات اختلاط يعنى ممكن الموظف اللى يشتغل معك رجال) بس قلت يابنت ردى زين المهم قلت عارفة وانا لما كنت اتدرب كان في المختبر رجال يعنى الوضع عندى عادى ومتعوده.
بعدين قابلت ابوها مدير المستشفى: سال عن تخصصي وشاف السيره الذاتية سال عن التدريب وفي ايش كان يقصد الاقسام المهم قال خلاص خلينا نشوف المختبر واحتياجه ونرد عليكم السبت لان المقابلة كانت الاربعاء جينا السبت وانتظرناه بس تاخر ورحنا اليوم الثانى اتصلت اسال عن النتيجة قالت لسى اذا فيه شي احنا نتصل عليك.. المهم انتظرت اسبوع وبعدين اتصلت وكان الرد العيب في التخصص قلت ليش هو قسم في المختبر وعلى حسب ما قالوا ان المختبر جديد وفيه نقص كوادر بعدها ماعاد اتصلت عليهم ولحد كتابتى للموضوع ما جا رد
هذى باختصار تجاربي مع المقابلة الشخصية؟
في الاخير :
- المقابلة الشخصية في بعض الاحيان مقياس لشخصيه المتقدم وطريقة تفكيره؟
- وبعضها مناقشة لما هو مكتوب في السيرة الذاتية .. والاستفسار عنه؟
- وبعضها وضع الخطوط العريضة للوظيفة وما سيواجهه المتقدم فيما بعد؟
- والبعض دراسة الشخص ومدى مناسبته للوظيفة؟
لكن على الفرد ان يكون ذكى ويستفهم عن الوظيفة ومهامها وكل ما يتعلق بها حتى يكون فكره عامة عنها وبالتالى يستطيع اخذ القرار.. في بعض الاحيان طالبين العمل تخفى بعض الجوانب خوفا من ترك المتقدم للوظيفة ويكتشفها هو فيما بعد مثل القيام بمهام اخرى غير الوظيفة المتقدم عليها ..
كما على المتقدم عدم الرد سريعا حتى لو كان السؤال استفزازى او فيه سخرية والمحافظة على الهدوء.. واذا كانت الوظيفة لا تعجبه فمن الممكن الاعتذار بطريقة محترمة... او عدم الرد بالموافقة او الرفض حتى يعطى نفسه مهله بعد ان عرف طبيعة العمل؟؟ على المتقدم السؤال عن كل مايشغله بالنسبة للوظيفة .. طبيعة العمل .. الدوام ..
واى سؤال انا حاضره وبالشوفه....