استفسارات عن الماجستير الخاص

[فندام]

اول شي ياأم راما حسب ماهو موضح تحت اسم المستخدم اذا ماكنت غلطان لاتلطشي اسم المستخدم تبع اخوكي سجلي بالمنتدى بأي اسم تبيه يعني كدا افضل
ثاني شي حجاوبك على أسئلتك الأربعة واجاباتي حتكون حسب معرفتي وعلمي ولو حصل وصدرت مني اجابة غير دقيقة اتمنى من الاخوان والأخوات بالمنتدى انهم يصححو هذي الإجابة وجل من لا يخطئ
بالنسبة للسؤال الأول : التقديم على الماجستير المسائي زي ما سميته انت او الماجستير الخاص زي ماسمته الجامعة هو مرة واحده كل سنه يعني مش زي البكالريوس او يمكن الماجستير العام الي التقديم لهم يكون كل فصل دراسي يعني مرتين بالسنه لا التقديم مرة واحده بالسنه وبما انو التقديم انتهى هذا العام فمالك الا تنتظري للعام القادم وتقدمي وهذا ترى أبدا مو شي سلبي بالعكس هذا شي ايجابي جدا عارفة ليش؟ لأنو حيكون عندك وقت كافي جدا عشان تستعدي لاختبار اللغة الانجليزية ولإختبار القدرات العامة وتدعمي السيرة الذاتيه تبعك بدورات تدريبية متنوعة و هذا كلو في النهايه حيدعم ملفك ويزيد فرصتك بالقبول بالماجستير الخاص العام القادم بإذن الله

بانسبة للسؤال الثاني : كل برنامج من البرامج الخاصة في كل سنه بيكون لو عدد مقاعد معينه مثلا عدد المقاعد المتاحة لماجستير المحاسبة المهنية هذا العام كان 40 مقعد و بانسبة لماجستير ادارة الاعمال التنفيذي كان عدد مقاعده المتاحه هذا العام 60 مقعد وقيسي عليها بقية البرامج
وهنا في نقطة مهمه جدا بدي انبهك لها وهي انو عدد المتقدمين كبير جدا واكثر بكثير من عدد المقاعد المتاحة خصوصا أنو يكفي للقبول فيه بالنسبة للتقدرير أنو يكون تقدير المتقدم بالبكالريوس جيد مع خبرة لاتقل عن 3 سنوات في مجال التخصص هذا بالنسبه لكل البرامج ومع هذا امكانيه قبولك ممكنه جدا لو استطعني تحققي درجات مرتفعة في اختبار القدرات العامه واختبار اللغه الانجليزيه وكمان لو حصلتي على دورات تدريبية في مجال تخصصك او في نفس مجال البرنامج الي حتقدمي عليه عشان تزيد فرصتك بالقبول

بالنسبة للسؤال الثالث: نعم الماجستير المسائي معترف بيه ومصنف بديوان الخدمة المدنيه بس والله ناسي على أي مرتبة بالضبط وعموما الموضوع هذا طرحه بعض الاخوان بالنتدى وذكرو كل التفاصييل المتعلقة بيه وممكن تيحثي عنه بالمنتدى وتطلعي عليه

بالنسبو للسؤال الرابع : اعتقد بما أنو عندك بكالريوس خدمة اجتماعية فإلي يناسبك هو برامج الماجستير في التربية وهي ثلاث برامج كالتالي:
1-ماجستير تقنيات التعليم
2-ماجستير الإدارة التربوية
3-ماجستير التوجيه والإرشاد
فشوفي ايش البرنامج الي يناسبك ولاتستعجلي لأنو عمليه الإختيار بين هذي البرامج الثلاث لازم تكون بيتروي وتأني وبناء على معطيات منطقية وبعد دراسة مستفيضه للظروف والأوضاع القائمة
وفي الختام اتمنى اكون جاوبتك على كل أسئلتك بالشكل المطلوب وتمنياتي لكي بدوام الوفيق وان شاء الله السنه الجايه تدخلي المنتدى وتبشرينا بخر قبولك بالماجستير