موضوع هام جدا...الملخصات للفصل الدراسي الاول..ارجو الافادهـ

[الخلوق]

وعليكم السلام ورحمة الله وبركاته
أخوي أنت قلت تبي الأمانة في الرد ،وأنا أبعطيك من قلبي هذه النصائح عن الملخصات .ولكن يمكن اللي أعجبني وإرتحت له ما يعجبك ، وأنا لا أعلم ما هي خطتك وما هي موادك ، فأنا أبعطيك بشكل عام عن كل المواد أفضل ما وجدت من خلال تجربتي :
-في مادة الكيمياء :ملخص الأستاذ يوسف زويل (لكن المذكرة مهي كاملة إلا إذا كملها السنة الجاية مدري) ،الجزء اللي مهب موجود في المذكرة هو الكيمياء العضوية تذاكره من كتاب اسمه (مختصر الكيمياء) وهو بالعربي وممكن تذاكر منه أي شي هذا الكتاب ساعدني كثير في الفهم ،وتذاكر من الكتاب الأساسي للمادة التعاريف والملاحظات هي تجي في الكتاب مربعات ملونة يكون فيها تعاريف وملاحظات هي اللي تذاكرها من الكتاب الأساسي ترا يجي منها في الاختبار.

-في مادة الأحياء :-ذاكر من التست بانك فقط ، أنا واحد سمع كلام الدكتور وذاكر من الكتاب والشرائح اللي يعطينا الدكتور وضيع وقته صراحة عليها ،ومن ثم حملت المادة وأخذتها صيفي ،لكن يوم جا الصيف وطنشت الدكتور ولا سمعت كلامه ،وذاكرت بس من التست بانك أخذت درجة فوق 85 الحمد لله.

-في مادة الرياضيات:-ذاكر من مذكرات أشرف بركات.

-في مادة الإحصاء:- ذاكر من مذكرات أشرف بركات (وإن كانت كثيرة ،لكن الشرح مهو كثير اللي مكثرها مسائل).

-في مادة الفيزياء :- ذاكر من مذكرة أشرف بركات.

-في مادة الانجليزي:- لك طريقتك في المذاكرة ما أقدر أقول لك شي لأن حنا كانت إختباراتنا موحدة يعني كل المستويات اختبارها واحد ، لكن أنتم إختلفتو عننا راح يختبر كل مستوى من كتابه.

-والمواد الثانية بالعربي حاسب ومهارات اتصال تذاكر من الكتاب وإن شاء الله ما عليك خوف.

....وترا هذا الكلام اللي اقوله عن الملخصات شي من تجربة شخصية وارتحت لها ،وفيه ملخصات وكتب ثانية قد تكون أفضل من اللي قلت لك ممكن ترجع لها لكن أنا قلت لك اللي أعرفه......

أتمنى إني أفدتك................وشكرا...........

[بو حجه]

يعطيك العافيه حبيبي

بس وين القاها هالمذكرات الي قلت عنها من وين اشتريها؟؟
وايش هو التست بانك



وين القاها كلها هذي؟؟؟؟؟؟؟؟

[الخلوق]

المشاركة الأصلية كتبت بواسطة بو حجه يعطيك العافيه حبيبي بس وين القاها هالمذكرات الي قلت عنها من وين اشتريها؟؟ وايش هو التست بانك وين القاها كلها هذي؟؟؟؟؟؟؟؟

تلقاها في مكتبة الشقري اللي في الجامعة فيه مكتبة الشقري في العمادة وفيه عند بوابة 6(خلف كلية الهندسة) ....... لكن أنصحك تروح المكتبة اللي عند بوابة 6 لأنها هي المركز الرئيسي وكبيره ولها قسم خاص بالتصوير ، فأما التست بانك فهو-ترجمته بالعربي-(بنك الأسئلة) ، ويتألف من ثلاثة أجزاء :-الجزء الأول:إختيارات ،والجزء الثاني:إختيارات أيضا بس إختيارات على رسمات .يعني:تجيك رسمة وعليها إختيارات ، الجزء الثالث:اسئلة مقلوبة وهي:أسئلة وتلقى أجوبتها في الكتاب مقلوبة،وهذا الجزء إذا جاء منه في الاختبار يجي منه شي بسيط ، وبنك الأسئلة تنزله من موقع الكتاب بيكلمكم وبيعلمكم عنه الدكتور إن شاء الله ، وبنك الأسئلة موجود في المكتبة أيضا ولكن ما أنصحك تأخذه من المكتبة نزله بنفسك من الموقع لأن المكتبة ممكن تعطيك تست بانك قديم يعني حق السنة الماضية والتست بانك يتغير من سنة إلى أخرى ، والمكتبة تبيع تست بانك مترجم _ولكن إنتبه_ نصيحة من أخ مجرب وحمل المادة :لا تذاكر من تست بانك مترجم، ترجمه بنفسك ،لا تشوف كثرة المعلومات وتقول الترجمة صعبة ، أنا كنت أقول هذي الكلمة ولا استفدت شي ، لكن يوم قسمته وترجمته بنفسي رسخت المعلومات في عقلي ويوم الاختبار ما احتجت ترجمه وحتى لو نسيت معنى كلمه أتذكر السؤال اللي فيه هذي الكلمة وأكون فاهم معنى السؤال.
-الجزء الثالث اللي هوالأسئلة المقلوبة ممكن تأخذه من المكتبة يكون محلول ، أنا كنت آخذ الجزء الثالث من المكتبة أسهل لي وممكن تلقاه مترجم بس ترجمة أي كلام ،الجزء هذا ما كانوا يهتمون فيه الطلاب لأن كلامه ومعوماته كثيرة ولا يجي منه في الاختبار كثير ،كانوا يذاكرون الجزء الأول والثاني وإذا خلصوا منها يذاكرون الجزء الثالث أو أقدر أقول يطلعون عليه ، وهذا اللي كنت أسويه أنا.
أتمنى إني أفدتك .....وسامحني على الاطاله....بس أحببت التوضيح .