أين المسؤولين من تربية فتيات الجامعات ؟!

[kinda Funny]

الأخت صوت الحق ...
في البدايه استغربت موضوعك لأني ما عرفت انتي تتكلمين على اي كوكب بالضبط ؟؟
في نص الموضوع عرفت انك تتكلمي عن كلية السلامه !!!

طيب اللي يبغا يكتب موضوع عن حدث ولا ظاهره صايره في مكان ما يكتب اش هوا المكان ؟؟

على العموم ..

بالنسبه للمعلمات الأجنبيات الغير مسلمات .. أنا ما اشوف (عندنا ) انه اشكالهم ملفته للنظر بتاتاً ... ولا حتى واحد في الميه بل بالعكس كان فيه معلمات هنديات ومن جنسيات غير عربيه يلبسون العبايه عادي .. ولا مكياج ولا شي ويأدون شغلهم ويمشون .. ولا شي من الأشياء اللي ممكن انها تصير في كليتكم صايره هنا ( بالنسبه للمعلمات )

ثاني شي : انا ملاحضه ماشاء الله انه كله صاير بيمشي ويحلل ويحرم من عنده وكأنه هوا المفتي !!
الحجاب الشرعي بدون مكياج وبدون زينه وبعبايه معقوله مو ملفت للنظر وكل المسلمات في كل الدول هذا لبسهم وهذي طريقتهم هل معناته أننا مسلمات أحسن منهم ؟؟ هل يعني انهم يبغوا يلفتوا النظر مثلاً .. الغرض من الحجاب انه المسلمه تكون بمظهر محترم يليق فيها سواءاً غطت وجهها ولا لأ ...

مين مننا ما قد شافت بنات كثير محجبه وبدون مكياج ولا زينه وحالها حال نفسهاا ؟؟
ومين مننا ما قد شافت بنات كثير يغطوا وجيههم في مكان ويكشفوا بمكان ثاني ؟؟
ومين مننا ما قد شافت بنات مغطين وملفتين للنظر بشكل عجيب ؟؟
ومين ما قد شافت بنت شعرها كله برا والبنطلون خارج وحالتها حاله ؟؟

كله موجود ... علشان كذا اسمها جامعه يعني تجمع كل الناس .. ومهما سوينا ولا عملنا ولا شددنا ما نقدر نسيطر على اعداد هائله من البنات

توجيه اصابع الإتهام ماراح يفيد بشي .. واللي تجي تسويلي دراما وكأننا بمحاظره حقت ايام المدارس اللي كانوا يجو يقولولنا لا تلبسي شراب ملون تفتني بيه الرجال !!!

انا ما ابالغ ولا اقول النصح والإستنكار لما هو خطأ شي مو كويس .. بس مو معناته انا استنكر الخطأ واشمئز من منظر البنات > مصطلح مستخدم كثير في ذا الموضوع
قبل ما كل وحده منكم تكتب هالكلام تقول الحمدلله في قلبها أنه ربي ما ضعف ايمانها وخلا عندها
عقدة النقص اللي يعانوا منها الكثير من البنات اللي يحاولوا يلفتوا نظر الناس لأشكالهم

البنات اللي زي كذا ما جو من السما وما طاحوا كذا علينا من مكان بعيد ولا من كوكب ثاني
البنات ذولا ممكن يكونوا زميلاتك بالدراسه ولا حتى قريباتك ولا اخواتك ولا وت ايفر

يعني فيه مشكله .. والمشكله هيا بدال ما نقعد نسوي صجه ونلعن في المنتديات
وفيه عضوه هنا مدري عضو كاتب كلمة اللعن الصريحه استغفر الله ياربي لهالدرجه وصلت فيكم ؟

اذا كانوا كذا المسلمين بيعاملوا بعض اجل كيف إن شاء الله تبغوا الناس من برا يعاملوكم ؟؟

أذا احنا بنلعن بعض والعياذ بالله ونسب بعض وذي ما تستحي وذي اهلها ما ربوها وذي قبيليه وذي حضريه وذي شكلها يجيب الإشمئزاز !!!؟؟؟؟

اللي في قلبها قهر على حال بعض البنات تنضم للتوعيه الإسلاميه بيسووا نشاطات ومحاظرات فعاله
وتكلموا مع مجتمع الطالبات بعين العقل والتفاهم والحب لبعضكم بعض مو ذي عاصيه استغفر الله ما بقرب منها ولا اجي عندها !!! طيب اش دراك يمكن منشوره ولا دعوه ولا محاظره تساعدين في
إلقائها تكون السبب في فهم كثير من ذي الفئه للدين الصح ويرجعوا ينعدلوا !!

يمكن هيا ذي اللي مو عاجبتك تكون أفضل عند الله منك ؟؟؟ لأنك شفتي نفسك عليها وانها هيا العاصيه وانتي التقيه ( استغفر الله بس ) !!!

اتمنى أنكم تركزوا وخلوا تفكيركم في الحلول مو بس في المشاكل ..



ورده للناس اللي تفهم