معلومات مهمة عن التسكين

[بنت عز ما تنهز..]

بسم الله الرحمن الرحيم
السلام عليكم ورحمة الله وبركاته

كثير من طلاب وطالبات السنة التحضيرية يتسالوا عن الفرق بين الانتظام والموازي

الفرق بين الانتظام والموازي في السنة التحضيرية أكيد خلاص عرفتوه

بس نجي للفرق بين الانتظام والموازي في التخصص
في بعض التخصصات فيها انتظام وموازي
زي كلية الطب والجراحة وكلية طب الأسنان وكلية العلوم الطبية التطبيقية وكلية الهندسة وكلية الحاسبات...الخ

الفرق بين الانتظام والموازي
الفرق بين الانتظام والموازي فقط في المكافئة
يعني الانتظام والموازي دوامهم صباحي وأحيانا يدرسوا في نفس الشعب
والفرق بينهم فقط في المكافئة << المكافئة للأسف تشمل المكافئة الشهرية ومكافئة التفوق
لان للأسف مكافئة التفوق ترتبط بالمكافئة الشهرية<< ادري إنكم انصدمتو وأنا زيكم لما عرفت دي المعلومة انصدمت
وحبيت أوضحها لكم الآن قبل تنتهي فترة ترتيب الرغبات

وغالبا الطالب أو الطالبة اللي يتقبل موازي ممكن يستمر الين التخرج موازي << على حسب أنظمة كل كلية بس اتوقع كل التخصصات تمشي ع نظام واحد

وعلى حسب استفساراتي خلال الفترة الماضية عرفت انو كلية الطب البشري تقبل تقريبا 30 طالبة موازي
وبعد يخلصوا السنة الأولى في الكلية تحول لــ3 الأوائل على دفعة الموازي فقط ويصبحوا طالبات انتظام ويستلموا مكافئة
أما الــ27 طالبة الباقيين يستمروا موازي

ولكن قبل شهر تقريبا سالت في الشؤون التعليمية وقالوا لي احنا نحول فقط الاولى على الدفعة لانتظام والباقيين يستمروا موازي الين التخرج


الشهادة
مافي فرق بين طلاب الانتظام وطلاب الموازي وقت التخرج
زي ما قلت الفرق فقط في المكافئة


وأنا حبيت اوضح دي النقطة لان في بعض الطلاب والطالبات تهمهم المكافئة
أو محتاجين المكافئة لتلبية احتياجاتهم الشخصية أو متطلبات الكلية وفي بعض البنات يحتاجوها عشان يدلعوا نفسهم ويكون في فلوس بيدهم متى ما يحتاجوها يلقوها بدل تكلف على أهلها
فلازم ياخذو بعين الاعتبار ايش يعني انتظام وايش يعني موازي


نصائح:-
النصيحة الأولى:- الطالب أو الطالبة اللي مهمة بالنسبة له المكافئة من وجهت نظري لا يحط رغبات الموازي في البداية
يرتب رغباته على حسب الأولوية بالنسبة له وبعدها يحط الموازي

مثلا لو الطالب يبغى المجال الطبي وبعده الهندسة
يرتب كالآتي:-
طب انتظام
طب أسنان
صيدلة...الخ
هندسة
وبعدها يحط رغبات الموازي
طب موازي
طب أسنان موازي...الخ
هندسة موازي




النصيحة الثانية:-
وكمان بالنسبة للطلاب والطالبات اللي حابين اذا لا سمح الله انقبلوا في كلية ما يبغوها بسبب معدلهم في التحضيري ممكن يدرسوا في الكلية اللي بينقبلوا فيها سنة ويحاولوا يرفعوا معدلهم خلال اول سنة ويحولوا بعدها للكلية اللي يبغوها هذي كمان فكرة حلوة وطريقة مناسبة عشان يوصلوا للي يبغوه

بالنسبة لشطر الطالبات في شروط وضوابط للتحويل

1-ممكن التحويل للكليات الصحية فقط من كلية العلوم تخصص الاحياء والكيمياء الحيوية
2-ممكن التحويل لكلية الحاسبات من كلية الهندسة او من الكليات الصحية او من كلية العلوم..بس أي تخصص بالضبط ما ادري واتوقع ممكن كمان من الادارة والاقتصاد
3-كلية الهندسة بشطر الطالبات لا تقبل التحويل اليها ابدا
اما قسم البنين ما اعرف بس اتوقع ممكن التحويل للهندسة من كلية العلوم تخصص فيزياء>>بس احسن تسالوا عشان تتاكدو


من وجهت نظري
الطلبة اللي حابة الهندسة تحط الرغبة الاولى الهندسة
واللي حابة المسار الصحي تحط الكليات اللي حابتها من المسار الصحي وبعدها العلوم
اما اللي محتارين بين الهندسة والمسار الصحي استخيروا وحاولوا تقرروا انتو ايش حابين
لان مافي تحويل من المسار الصحي للهندسة او من الهندسة للمسار الصحي


النصيحة الثالثة:- قبل تنتهي فترة ترتيب الرغبات استخيروا ثم استشيروا ثم ادخلوا في الاودس اختبار تخصصي المناسب وشوفوا ايش هيا التخصصات اللي تناسبكم
وبعدها رتبوا الرغبات الترتيب الاخير وانتو على قناعة تامة لترتيبكم للرغبات


بالتوفيق يا رب
والله ييسر لكم كل ما تتمنوه ويكون خير لكم في دينكم ودنياكم عاقبة أمركم

أي سؤال أو استفسار أنا موجودة وبخدمتكم