الدفعة الجديدة حياكم ||~

[كوبالـت_Co]

بسم الله الرحمن الرحيم

السلآم عليكم ورحمة الله وبركاته

ما راح اقول زملائي لأني أحس أخواني أقرب للقلب

أخباركم أخواني و أخواتي إن شاء الله تكونون بأتم الصحة و العافية ؟!

اببدأ أتكلم و أعرف عن نفسي ^^ بعيداً عن الأسماء المستعارة

أخوكم محمد الجعيد كيمياء عامة مستوى ثامن دفعة 10

انا عارف الكل سوى كذا ( ) عشان قلت كيمياء متعود من المجتمع

---------------------------------------------------------------------------

و أبرحب فيكم في جامعة الملك عبدالعزيز و نقول ألف ألف مبروك لكم القبول و إن شاء الله إنكم ما انقبلتم بالجامعة إلا و أنت قدها بإذن الله

الجامعة هي أهم منعطف في حياة الشخص ,, إما يحقق حلمه ! و إما يضيع و يفشل !!

الجامعة هي الي تحدد ؟! لا ,, أعضاء هيئة التدريس هم الي يحددون ؟! كمان لا ,,

أنت الي تحدد فين المكان الصحيح لك أنت بنفسك بعزيمتك بقدرتك بطموحك تحدد فين ممكن تكون

أنت شايف إنك تستحق الطب ؟! بعزيمتك و طموحك حتدخل طب
أنت شايف إنك تستحق الهندسة ؟! بعزيمتك و طموحك حتدخل هندسة
أنت شايف إنك تستحق الحاسبات أو الكيمياء او الفيزياء او الرياضيات أو الإدارة و الأقتصاد أو اي كان ميولك و طموحك ؟! بعزيمتك و طموحك حتدخل المجال الي انت تبغاه

طبعاً لازم تفهم شيء واحد !!

إنه مافيه شيء يجي بالمجان ! ,, لا تجلس تقول الدكتور فلان حيزودنا درجات الدكتورة هاذي طيبة و حتدفنا

لأن درجاتك هي الي بتوصلك للمكان الي انت تبغاه و تستحقه ,, و لا تعتمد على أحد عشان يوصلك للمكان الي انت تستحقه

لا تخلي طموحك درجة النجاح ( 60 ) خلي طموحك +A أو A ,,

ولا تقول ما اقدر قبلك ناس اخذوها و بجدارة ايش الفرق بينك و بينهم ؟!! .


انا كان حلمي ادرس كيمياء و اتخصص كيمياء و الحمدلله تخصصت كيمياء و درست و الآن انا بترم تخرج و اعتبر الجامعة من اجمل مراحل حياتي

و السبب ؟! أني دخلت الميول الي ابغاه بينت إنه كفاءتي في الكيمياء قبل لا ادخل الجامعة و بعد ما غلقت التحضيري و حتى بعد ما ابتخرج ابثبت هذا الشيء

ايش الفرق بيني و بينك ؟! مافي فرق ممكن أنت أحسن مني كمان !! ممكن افضل مني بمراحل ممكن طموحك اعلى من طموحي !!

بيدروسون معي زملائي كان طموحهم تخصص غير الكيمياء بيضربوا خدهم بكفوف الندم ليتنا درسنا ليتنا عملنا عشان ندخل المكان الي نبغاه !!

و اذا فات الفوت ما ينفع الصوت !! و لا تقول ابدخل كلية مش الكلية الي ابغاها بعدين احول !! خليك انت الأول بالدخول لا تلف ولا تدور من التحضيري

ع طول ع ميولك ع مجالك ع تخصصك !,, خليك بالمقدمة دائماً الكلام سهل و التطبيق سهل على اصحاب العزائم و الطموحات العالية !!

ابنصحكم نصائح يمكن تفيدكم يمكن لا يمكن تأخذوا بها يمكن تضربوا بها عرض الحائط ,, الأمر راجع لكم ^^

بالسنة التحضيرية حتواجه عقبات كثيرة

أولها المحبطين و هذولا ناس عايشين بفشل وما يعجبهم إنه احد من أقرانهم ينجح فيحبطوه بإِشاعات مزيفة مالها مصدر موثوق ولا صحة

ثانياً مسائلة البونص ,, الكيمياء فيها بونص الفيزياء فيها بونص ,, وهذولا ناس وضعوا امالهم بإشاعات مزيفة و ناس إتكالية تنتظر الدكتور يشفق عليهم

عشان يزيدهم و بالأخير ما بيزيدهم شيء لأنه الـ 100 درجة هي حصيلتك بالأختبارات تذاكر تجتهد حتحصد و العكس صحيح !

انا ابقول هالكلام ابغاكم من بدري من قبل يبدأ الترم تكون عندكم عزيمة و قوة و هدف معين

اسألوا التخصصات الي تبغونها كم معدل طالبين كم درجة بالمادة الفلانية طالبين ؟! و حطوها هدف لكم و نصاب عينكم و شدوا على انفسكم و اتعبوا عشان تحصلون عليها

( إنما النصر صبر ساعة ) و إنما السعادة بحياتك الجامعية و المستقبلية صبر سنة وحده بس تتعب تحصل على مبتغاك و تسعد ,, تتكاسل و تفشل حتجلس طول حياتك

الجامعة تسب و تصيح و ياليت وياليت ,,,

و بالأخير احب اقول لكم


( المؤمن القوي خير من المؤمن الضعيف )

و أنا والله ,, كلي أمل و متأكد بإن بعضكم اذا مو الأغلبية منكم بيحقق طموحه والله ثم والله ثم والله ^^

بس لو تشدون حيلكم و تتعبون شوي بتلقون الي يسركم

و هاذي فيديوهات لكم اتمنى تتابعونها يمكن تفيدكم بشيء !!


http://www.skaau.com/vb/showthread.php?t=711443





بالأخير عارف إني طولت عليكم و ابغى أقولكم شيء

انا مالي مصلحة شخصية إنه افتح هالموضوع و اكتب هالكلام

بإمكاني الحين اكون مكبر المخدة و نايم

الي بيحقق حلمه يحققه و الي بيفشل يفشل و الي بيتعلم يتعلم

و انا ايش لي دخل ؟! إن شاء الله كل الدفعة رسبت كلها فشلت ايش المشكلة بالنسبة لي ؟!

انا افتح هالموضوع و اكتب هالكلام ,, لأني عارف اللذة الي تغمر الشخص لما يدخل تخصص هو حابه

و ابغى الكل يحس بنفس هاللذة و يتذوقها و يحس إنه نجح و سوى شيء بحياته !!


و بالأخير لو انت أو أنتي حسيت بإنه الموضوع أفادك ,, ابغى منك شيء ,, دعوة لي بظهر الغيب بإن الله يوفقني

لمبتغاي و تحقيق طموحاتي و الدعاء لوالداي بالخير و طول العمر و الدعاء لكل استأذ علمني حرف أو علمني معلومة

^^ بالتوفيق للجميع و المتعة بدأت الآن و كل واحد يحصد الي بيزرعه ! ,,

أخوكم \ محمد الجعيد ^^