من طالب سنه ثانيه طب :) .. دعوه للكل .. تعالوا خلونا نتفائل شويتين .. قصتي مع الطب :)

[ذهب محمد الى الحديقه ولعب]

سلام عليكم ورحمة الله وبركاته

اولا ابارك لكم انتهاء عامكم الدراسي واجازه سعيده للكل

طبعا الان الكل على اعصابه وينتظر نتائج التسكين
بس احب اقوللكم ( منذ كنتم في بطون امهاتكم ورزقكم مكتوب )

لما تطلع نتائج التسكين .. لازم اول كلمه تقولوها ( الحمدلله ) لانها لابد ان تكون خيره من ربكم

اولا هذي نصيحتي للي حاط خيارات التسكين بناء على رغبة اهله .... صدقني ماراح تمشي في التخصص اللي ماهو عاجبك .. حصلت مشاكل كثير بداية هذي السنه مع كلية الطب او غيرها في طلبات النقل ... لان الشخص اذا مادرس الشي اللي يحبه ماراح يبدع فيه :)

وهذي نصيحتي للي يبغى يدخل كلية الطب .... لازم تكون رغبتك قويه وصادقه لدخولك هذي الكليه .. مجرد التفكير في المنصب والمال صدقني ماراح يخليك تبدع في عملك خلي قلبك يتعلق بالطب من كل النواحي خلي هدفك من الطب هو الاجر العظيم عند ربك والرغبه في علاج الناس ومساعدتهم وتقديم الخير ...

طبعا هدفي من الموضوع هو اني شايف كثير متشائمين وحاب اقوللكم قصتي عشان تعرفوا ان المصاعب عمرها ماتوقف في طريقك لحلمك ... هي مجرد عثرات لا اكثر ولا اقل

بدايتي كانت بنهاية الثانويه جبت معدل كويس تقريبا 98 ومع التحصيلي والقدرات حصلت 90%
كانت نسبه حلوه لدخول الجامعه وللسنه التحضيريه ....
دخلت السنه التحضيريه متوقعها سهله كالثانوي .. لكن تفاجات بالمواد وكانت بدايتي مع خطة ب المتعبه !!! ... كانت المناهج باللغه الانجليزيه ... وللامانه كانت لغتي ضعيفه قليلا ... اول شهر .. واجهت صعوبات كثيره لدرجه اني فكرت في الخروج من الجامعه .... كانت الماده الاكثر صعوبه الاحياء :)
ياجماعه هذي الماده جابت لي حاله نفسيه .. وراح تستغربون لو قلتلكم ان درجتي في الاحياء كانت 65 :)

خرجت من الترم الاول بمعدل 3.77 ... هنا كانت بداية احباطي ... بدات احس اني بعيد عن الطب

لكن شوي شوي رجعت تمالكت نفسي وشديت الترم الثاني والحمدلله معدلي وصل 4.45

قدمت على التسكين وصار الطب رغبتي الاول والطب الموازي رغبتي الثانيه

وبقدرة قادر وضعت علوم طبيه اساسيه رغبة ثانيه وصار الطب الموازي رغبة ثالثه .. وهي مختلفه تماما فعلوم طبيه اساسيه يعني تتخرج كباحث وليس كطبيب ..!!

قبلوني في العلوم الطبيه الاساسيه ولما استفسرت عنها جاني احباط شديد مره اخرى وعرفت انه مو مقدر لي الطب ... مشت ايام الاجازه وانا نفسيتي تعبانه واشوف زملائي فرحانين بنتائج التسكين وكانت كلمة الحمدلله اكثر مايواسيني .....
بدأت السنه الاولى وطبعا اول سنه ادرسها مع طلاب الطب لتشابه المواد .... بعد اول شهر وبعد نصيحه من احد زملائي جزاه الله الف خير ... رحت رجعت لنتائج التسكين ... اكتشفت ان الطب الموازي بامكانه ان يقبلني لان نسبتي اعلى من اقل نسبة قبلوها ... رحت اراجعهم وبعد اسبوع ولله الحمد تم انتقالي الى الطب الموازي ............

والان ولله الحمد وبعد سنه طويله بقي لي اسبوع على اخر اختبار لي في السنه الاولى للطب
اختباري يوم الاربعاء ... قد اني تعبان وهلكان من هذي السنه المتعبه ... الا اني احس بالفرح والفخر لما اتذكر الصعوبات والاشياء اللي واجهتها وتعديتها ....

هذي قصتي اتمنى انها تكون دافع لكم ان تعرفو ان مهما كانت الصعوبات فحلمك باذن الله راح يتحقق والخير دايم ربك كاتبه لك مهما كان


__________

كلمه اخيره للي بينقبلو في الطب ان ان شاء الله..... دراسة الطب ليست سهله .. تحتاجون لتقوية لغتكم ... بعض المواد في الطب ستدعون ربكم ان تنجحون بها ولو على الحافه !!!
ماقوللكم هذا الكلام للاحباط لكن عشان تستعدو كويس وتفرغون نفسكم ... لو ماذاكرتم اول باول راح تندمون ......
بعد ماتنقبلون في الطب ان شاء الله شرفونا بقسم الطب في هذا المنتدى وراح نجاوبكم على اسألتكم

قبل ماتبدا السنه القادمه وتحديدا بداية شهر شوال .. دفعتي راح تقيم دورة باسم Teach me Medicine بمعنى درسني الطب ... هذي الدوره راح تكون مفيده للكل... افداتنا بشكل كبير قبل مانبدا السنه ... باذن الله تستفيدو منها

معليش طولت عليكم ...
بالتوفيق للجميع
ولاتنسونا من دعواتكم لاخر اختبار لي في هذي السنه


سلام عليكم ....