مادة مو قادرة اعديها .. ما الحل ؟؟؟

[سمايل]

بسم الله الرحمن الرحيم
السلام عليكم ورحمة الله وبركاته

اخواني اعضاء المنتدى والمسؤولين فيه
حكايتي باختصار
انا طالبة في كلية التربية قسم اللغة الانجليزية .. كنت ادرس في المدينة المنورة واتزوجت وحولت اوراقي لمدينة جدة وباشرت الدراسة بس بعد ما طلعت عيني عشان احول اوراقي وانواع البهدلة
كل شي اتغير عليا المهم اني عديت اكتر المواد الحمد لله
بس مشكلتي مه مادة اللغويات العامة الفرقة الرابعة
اختبرت المادة هادي اكتر من مرة وللاسف ما نجحت فيها .. المادة ترم اول وترم ثاني
ما بقيلي الا هادي المادة على قد ما ذاكرتها مو قادرة اعديها
اكتشفت انه مشكلتي مع دكتورة المادة نفسها الدكتورة من اكتر والله يشهد مرة محترمة وذوووق ومخلصة في عملها شخصيا انا مرة احبها تعاملها جداا محترم بس مشكلتي معاها مو قادرة افهم اسلوب اختباراتها وعلى قد ما اذاكر المادة مو قادرة اعديها معاها
مادة المورفولوجي كانت مع نفس الدكتورة سنة ثالثة الصراحة ما عديتها من اول مرة بس اتغيرت الدكتورة وعديت المادة
دحين ما بقيلي الا هادي المادة واختبرتها والله يمكن 5 اختبارات (الاختبارات العادية واختبارات التكميلي وبرضه ما عديتها )يعني انا غبية لهادي الدرجة المفروض اني صامتها وانا احس اني فاهمة المادة بس مو فاهمة اسلوب اسئلة الدكتورة في الاختبااار ويبدا العك ....
سؤالي :هل في امكانية اني اغير الدكتورة واختبر المادة عند استاذة ثانية ؟؟؟ مع العلم اني دحين صرت مستنفذة والله تعبت من كتر ما اختبر ومو قادرة اتخرج وحرااام ما بقي الا هادي المادة افكر اسحب ملفي وما اكمل دراسة من كتر الاحباط الي انا فيه
والكلية دحين صارت تابعة لجامعة الملك عبد العزيز مو عارفة ايش الحل يقولولي ما ينفع تغيري الدكتورة لانه ما في غيرها يدرس المادة في الكلية ..ولا ينفع تحولي لكلية تانية لانك مو باقيلك الا اختبار فلازم تختبريه هنا ... ياربي ايش الحل ؟؟؟ سالتهم ليش ما اختبر المادة في نفس جامعة الملك عبد العزيز وما اختبرها في الكلية مو صرنا تابعين لها والشهادة صارت وحدة ليش مافي تعاون ومرونة وحلول .. مو عارفة ايش اسوي ممكن تفيدوني وسا محوني طولت عليكم ...