•° اداره اعمال في ثقافات متعدده د/ فهد العيتاني •°

[ABooOooDIBooty]

سلام عليكم للجميع..


بعض الاخوان بيقولو احفظو الاسئلة وادخلو الاختبار..

صح الدكتور فهد ما عمرو قصر مع الطلاب واسئلتو بطلة وسهلة ومافيها لف ودوران زي بعض الدكاترة ولكن حصل لي موقف معاه في وحدة من المواد السنة الي راحت..

الدكتور السنة الي راحت كان يدرس تلاتة مواد ,, جا وقت الاختبارات وكانت مادتي هيا المادة التالتة الي هوا يدرسها..

كلمني واحد من الشباب الفجر وقلي اسمع ترى باقي على الاختبار ساعتين وترى الدكتور يدرس تلاتة مواد والمادتين الي اختبروها الطلاب جابها بنفس الاسئلة وماغير منها حرف
قلتلو طيب !؟

قلي افتح الموضوع الفلاني ونزل الاسئلة واحفظها زي اسمك ,, رحت زي المجنون وقلت جبت الفل مارك يا وحش وجلست احفظ واحفظ واحفظ الييييييييييييين ما دخت وانا بس احفظ الاسئلة واجوبتها..

الطااااااااااااااااااااااااامة ,, انو غير الاسئلة في ديك المادة بالزاااااااااااااااااااااااااااااات..

جات اسئلة غيييييييييييير عن السنوات السابقة واسئلة جديدة بتاريخ جديد وكل شي جديد..

فنصيحة يااخوان ( ادرسو من المذكرة واقرو الاسئلة وحلوها ,, جات الاسئلة نفسها !؟ الف مبروك وجبت الفل مارك , اتغيرت الاسئلة!؟ اسمك دارس وفاهم وعارف ايش ملة المنهج )


انا مو قصدي احبط احد بس دا الي سار معايا ,, والله يوفقني ويوفقكم كلكم يارب..

وان شاء الله تجي الاسئلة سهلة زي ماهيا وكلنا نجيب اعلى الدرجات..