همسة الى طلاب و طالبات خطة أ و ب

[ymosh]

بسم الله الرحمن الرحيم

الى جميع طلاب و طالبات السنة التحضيرية

.

.

انا اكتب هذا الموضوع لاني متفاجئة من رد فعلكم بخصوص موضوع التست بانك و الأحياء و اعتراض جميع طلاب خطة ب على هذا الفكرة بمنطق "لازم يكرفوا زي ماكرفنا, ينقصوا زي مانقصنا, هذا العدل ", صح ان ظلم المادة تتسهل لنصف الطلاب و النصف الاخر راحوا فيها وضاع مستقبلهم و درجاتهم , لكن اللي ابغى اقوله ان هذا شي ماصار لسة و احتمال بعيد انه حيصير مستحيل حيرجعوا التست بانك هما حذفوا التست بانك لسبب و مااعتقد حيرجعوا , وانتوا و لسة ماصار شي كلها اشاعات و اوراق, ظهر الحقد و العداوة و البغضاء من الخطتين أ و ب , اللي يقولوا ليش احنا اللي تعبنا و هما اللي يرتاحو و خطة أ يقولوا انتو حظكم و راحت عليكم , يريت تفكروا تفكير منطقي بعيدا عن العواطف و الحقد , هل تعتقدوا ان كل الناس درجاتهم نازلة في الاحياء ؟ صح الاغلب درجاتهم منخفضة لكن في كتير درجاتهم كاملة عشان كدا ماحيرجع التست بانك , صح ان مصعبيين المادة و كثروها لكن الجامعة لاحظوا ان تقريبا تلات ارباع الجامعة يبغوا تخصصات صحية و مافي مقاعد الناس كتروا لازم يعملوا تصفية , الطب كلها 200 مقعد عدد الطلاب اللي يبغوا طب فوق الالف, اللي ماقدر يمشي في الاحياء بسبب اللغة او بسبب ان مو فاهم الطريقة او ان المادة كثيرة , هل يعتقد ان بامكانه يمشي في الطب ؟ الطب حتى مو مصطلحات انجليزية مصطلحات لاتينية يعني كل واحد احسن يعرف مستواه من دحين , انا ما اوافق على هذي الفكرة المفروض كل واحد يدخل التخصص اللي هوا يبغاه لكن الجامعة يفكروا بهذي الطريقة , اللي يبغى يدخل هندسة او ادارة او انجليزي او حاسب او اي تخصص مايحتاج في الاحياء و يقول ان الاحياء ينزل معدله , مااعتقد ان في هذي التخصصات يحطوا دي المواد في الاعتبار يعني اهم شي كل واحد يشد حيله و يجيب الدرجة اللي يقدر عليها , هو مو تحطيم بس واقع مو كلنا حندخل التخصصات اللي نبغاها , و كلنا حنتعرض للظلم احنا لسة في بداية حياتنا لسة حنشوف انواع الظلم في وقت التسكين لما يبدأ شغل الواسطات , او في التوظيف , او في المعاملات او اي شي في حياتنا حتشوفوا الظلم هذا , يمكن الجامعة تهيئنا للتحطيم و تعدنا للحياة, لكن لازم نتوقع كل شي ولاتخلوا مادة واحدة تحطمكم لسة المجال مفتوح في 7 مواد غيرها بامكانكم تعوضوا درجاتكم , لكن اتركوا الحقد هذا , انا اول مرة اشوف حكاية " نفسي نفسي" لما دخلت الجامعة دوبني الاحظ دا الشي و كل واحد يفكر بنفسه لكن انا و الله و ربي شاهد مو عشان انا خطة أ دحين اقول دا الكلام لكن لو انا خطة ب و درجاتي ضاعت في الاحياء بسبب دا الظلم و ضاع حلمي بسببه , ماحاقول ان لازم كل الناس يصيرلهم نفس الشي عشان تكون الفرص متساوية , بالعكس حأحس فيهم , واذا هما ماجابوا درجات هذا الشي ماحيرفع درجاتي ولا حيقلل فرص دخولي للكلية اللي انا ابغاها لانو في الحالتين في اكتر من 200 طالب على الاقل حيجيبوا درجات عالية , ياريت كل واحد يترك الحقد و الحساسية و نطبق الدروس اللي لنا 12 سنة ناخذها مو معناه ان ماندرس دين دحين يعني ان نسينا ديننا و لا كل شي درسناه كان حبر على ورق انتهى اول ماخذنا الشهادات خلاص , و الدين مو صلاة وصيام و بس , الدين اخلاق يريت نطبقها في حياتنا العلمية , و اول شي نطبقة الحديث الشريف " لايؤمن احدكم حتى يحب لا خيه مايحب لنفسه " يريت كلامي يوصل و يريت الخطتين أ و ب يقدروا بعض , خطة ا يقدروا ان طلاب خطة ب انظلموا , وخطة ب يتمنوا الخير لطلاب خطة أ ,,, و شكرا لكم