اشكر الله على السنة التحضيرية

[Mora]

السلام عليكم و رحمه الله و بركاته

مساء الحب و الخير

موضوعي قد لا يكون في محله... بس مع ذلك حسيت انه موضوع مهم..

لأني بتكلم عن السنه التحضيريه... و احنا كلنا طلاب سنه تحضيرية... إذن الموضوع يخص الجميع

من بداية السنة لحد هذا اليوم و احنا نتحسر و نندب حظنا, لأننا الوحيدين من بين كل الدفعات السابقة -وحتى اللاحقة- يللي طبقوا فيهم نظام السنة التحضيرية

طبعا انا زيي زي الكل ... كل يوم اقول ايش النحس دا؟ والله اختبار وزاره في سنة تالت ارحم من ده العذاب اللي نحنا فيه.... الخ كل يوم نفس اسطوانة الحسرة تنعاد

بس!!!

من ناحيه تانية!!!

هادي السنة غيرت كتير و كتير من مخططاتي

خلتني استبعد اشياء ما توقعت اني استبعدها!!
خلتني افكر في دراسة تخصصات ما تخيلت عمري اني رح افكر فيها!!
كنت حاطة في راسي فكره الطب زي كتيرين... بس و بكل صراحة ما كان حلمي اني اكون دكتورة لكن اسم "الدكتورة" هوا اللي كان هاممني و هاذا اللي خلاني افكر فيه,,,,,,, المهم
اني بعد ما دخلت السنة التحضيرية و شوفت بعيني الاحياء و الكيميا طبعا شلت فكرة الطب من راسي للابد!!!!!!!!!!!!!!!!!!
اكتشفت انه المادة ما تناسبني و لا تناسب مستواي .. لأني ما احب الاحياء
خلال هادي السنة ... درست و لأول مره مادة اسمها "الاحصاء" كمادة مستقلة عن الرياضيات

عمري ما فكرت بدي الماده قبل كدا!!!
و لا خطرت ببالي في يوم!!!!

لكن اليوم!!

سار حلمي.... اني اتخصص إحصاء !!!!
مع انه اغلب الشعب عندهم مشاكل مع دي الماده باعتبار انها صعبة.... بس انا ولله الحمد, درست الماده على يد استاذة متمكنة... الله يحفظها و يحميها ..... و انا اوجهلها كل شكري لأنها خلتني اعشق المادة لدرجة ان رغبتي الاولى سارت .. تخصص احصاء

اشكر الله على كل حال و اشكره على انه جعلني ادرس سنة تحضيرية و الحمدلله على تسخيره الظروف عشان ادرس مادة الاحصاء على يد استاذة ممتازة..
اشكر الله على السنة التحضيرية ... لأنها من احد اهم الاسباب اللي خلتني اتعرف بالمنتدى و بأعضاؤه اللزيزين
اشكر الله على السنة التحضيرية لأنها كونتلي فكرة عن المواد يللي احبها
شكرا لله لأني شلت فكرة الطب من راسي قبل ما اتورط و ادخل و احول و ادخل في معمعة ما لها اول من تالي

اللي ابغى اوصله هو لو اني ارجع لورا شوي ... و افتكر ايش كان مخططي.... و اقارنه باللي ابغاه دحين,,, فأنا اقوول الحمدلله اني ما مشيت على مخططي الاولاني, و اداني ربي فرصة -السنة التحضيرية- عشان ارتب و اعيد حساباتي من جديد

يمكن كتير مننا يتذمر من دي السنة ... بس يمكن هادي السنة خير علينا و احنا ما ندري فين ربي يكتب الخير... و بالنهاية عسى ان تكرهوا شيئا و خير لكم...