والله ما اسامحك ليوم القيامه يا.......

[LeLou]

و عليكم السلام و رحمة الله و بركاته..

شوفي يا عسل..
أنا مرة سمعت كلام من واحدة حضرت محاضرة و قالت لي الكلام إللي سمعته..
و انعادت عليا هذي المعلومة في محاضرة من محاضرات الثقافة..

يقول لك أنه الناس يوم القيامة،، طبعًا شي معروف أنهم راح ينبعثوا و ينحشروا لأرض المحشر و يقعدوا يستنوا بدء الحساب و ما يبدأ و يروحوا الناس يطلبوا الشفاعة من أولي العزم من الرسل و يتخلوا عنها و بعدها يجي الرسول صلى الله عليه و سلم يسجد عند عرش الرحمن و يطلب من الله بدء الحساب و هذي شفاعة عظمى لا تعطى إلا للرسول صلى الله عليه و سلم..
بعد كدا يبدأ الحساب طبعًا هذا الحساب راح يكون بينك و بين ربنا يعني ربنا راح يحاسبك على أعمالك إنتي..

بعد كذا لما يخلص الحساب إللي نار راح يروح النار،، الله يجيرنا منها و يحرم عليها جلودنا..
و إللي في الجنة راح يعدوا على الصراط..
ما راح أتكلم عن الصراط لأنه دا مو موضوعنا..
المهم بعد ما الناس تتجاوز الصراط،، راح يكونوا في مكان قبل لا يدخلوا الجنة اسمه القنطرة..
المكان هذا يبدؤوا الناس يتحاسبوا فيه مع بعض،، إللي شتم إللي اغتاب إللي نم إللي سرق إللي قتل،، إللي ظلم،، و ما إلى ذلك..
يبدؤوا الناس يدوروا على بعض و يتحاسبوا مع بعض..
و الحكمة من دا الشي عشان الناس لما تدخل الجنة ما يكون في بينهم و بين بعض غل أو حقد..

طبعًا يقول لك في حسابك مع ربنا،، ربنا ممكن يسامحك لأنه الغفور الرحيم الذي وسعت رحمته كل شيء..
أما في حسابك مع الناس ما في أحد راح يتنازل لك عن حسنة..
و ساعتها ممكن ناس تكون عندهم حسنات زي الجبال و تروح هذي للي سرقت منه و هذي للي شتمته و ما إلى ذلك..
يقول لك هذا الحساب ممكن يقعد 500 سنة و في ناس تتمنى ترجع قبورها بعد إللي حتشوفه في المكان دا..
الله يسهل علينا حسابنا و يجعل مثوانا الجنة..

فأنا شخصيًا ما أنكر أني اغتبت و ممكن أكون ظنيت في ناس ظن السوء..
لكني بين كل فترة و فترة أقعد مع نفسي و أقول يارب أنا مسامحة كل إللي غلط عليا قدامي و من ورايا إللي أعرفهم و إللي ما أعرفهم و إللي أتذكرهم و إللي ما أتذكرهم..
و أقول أنا ما أبغى من أحد شي و لا أبغى حسنات الناس أنا أبغى أجر ربنا..
أنا بالنسبة ليا أجر ربنا إللي يعطيني هو برحمته أعظم عندي من حسنات الناس إللي راح آخذها منهم..

و ربنا سبحانه و تعالى قال: "و الكاظمين الغيظ و العافين عن الناس"
و دايمًا أقول يمكن سبحان الله لما يجي يوم القيامة ألقى الناس كلها سامحتني من غير ما أدري زي ما أنا سامحتهم كلهم من غير ما يدروا..
و مافي شي بعيد عن رحمة ربنا..
و دايمًا أقول إن الناس ما سامحتني أنا راح أسامحها لأني ما أبغى حسناتهم أبغى أجر ربنا..

و إن شاء الله بإذن الله ناوية لما يتوفر عندي مبلغ كويس أني أتبرع للجمعيات في مشاريع الصدقات الجارية عن الناس إللي اغتبتهم و إللي غلطت في حقهم و ما قدرت أقول لهم يسامحوني..
و ربنا العفو الكريم..

أعتذر منك على الإطالة دودي و صح كلامي غير مرتب بس أتمنى أكون قدرت أساعدك بشي..
و بالتوفيق لك يا عسل||~