عشان لا توهي زيـّي , ابدأي صح

[كاساديا]

مرررررررررحبا جميعا ..
__________

غبت صحيح عن المنتدى ولكن اكتفيت بوجودي البصري حتى يكون هناك عودة كتابيه وهذي عودتي ..
اول شي اكيد كلنا هيصنا وانبسطنا في الاجازه ولله الحمد واكيد صارتلنا مواقف ما نبغى نفتكرها اساسا وبرضو الحمدلله .
جييينا للجامعه ورجعنا للقرف والكرف واللعب بالاعصاب ,
وكلمة تودي وكلمة تجيب وكل الي شفتو والي سمعتو هو كـ التالي:
بنات تحضيري مهم عارفين راسهم من رجلهم.
عشرين مره اشوف هالجمل ,,
1- بناااااااااااات انصحوني في جدولي ايش اخذ
2- بنات ايش رايكم في الاستاذه الفلانيه
3-بنات لو سمحتو ابغى انزل مواد سهله عشان ارفع المعدل قولولي رايكم
4- بنات الاوديس قفل ايش نعمل
5- انا حتجنن من الجامعة ياناااااااااس ساعدوني

واكثر واكثر..
كل الي رح اقولو اننا اصبحنا طالبات جامعيات يعني سبنا ماصات الدراسة ورانا والمريول سلمنا عهدتو للي بعدنا
يعني المرحله هذي مفترق طرق .
بس مجرد اسئلة رح اطرحها,
الجامعه هي الجامعه من يوم ماتاسست للأن طبعا اكيد اتطورت واتغيرت بس حكاية الفوضى وعدم وجود النظام الي بداية كل ترم جدا وارده
وخصوصا في اي منشاة تعليميه , يعني ليش كل كمية التذمر هذي ؟
ومع ذلك الى الآن بندرس ومكملين فيها , يعني دام الدراسة منتي راضيه عنها ولا اساتذه راضيه عنهم ولا مواد عاجبتك ولا طريقة دراسه ووظايف مافي
والشغله كلها واسطه , جالسه للأن تدرسي ليش؟
عشان اهلك؟
ولا عشان يقولو فلانه جامعيه؟
وكيف تستني من احد انو يقولك الاستاذه هذي رائعه ولا هاذي تخوف ولا هاذي ظالمه دام كللل وحده رح تجاوب من تجربتها الخاصة؟
ياستي طيب قفل الاوديس وين المشكله يعني تحرقي عصابك وترسلي رسايل سلبيه لمخك وتبدأي مرحلة الخذلان الي لها اول مالها تالي؟
من خلال معرفتي المتوااااضعه جدا في نظام الكليه سنه وبعدها نظام الجامعه:
ماراح اقول ايش الافضل لاني مو ف موضع تقييم ورح تعتبر اجابتي من تجربتي الخاصه,
خلاصة الكلام :
* حددي انتي تدرسي ليش عشان نفسك وثقافتك وتخلي نفسك قبل اهلك فخورين ولا عشان انتي ايش تنقصي عن غيرك زيك زيهم وفلانه وعلانه ؟
* لا تسمعي لاي احد يقولك بإستخفاف ايييش التخصص هذا ! ولا مالو مستقبل!
سواء كنتي جغرافيا او عربي او تاريخ او انقلش او دراسات ايا كان تخصصك..
* ولا تسمحي لاحد يحبطك لانه ثقتك في نفسك وفي ربك قبل اي شي هيا الي رح توجهك للأفضل.
* لا تستني احد يقولك هذي الاستاذه جيييده وذي لأ ,
* لمن تجي تسالي عن الاستاذه اسالي عن الي يناسبك والنقاط المهمه يعني بدل لا يكون سؤالك كيف هي جيده ؟
حددي اكثر.. يعني انتي لو تفضلي نظام الاستاذه الي شرحها سرد بس من كتاب وتأشير واسئلة موضوعيه اسألي عن طريقتها واختباراتها ..
ولو تناسبك الي شرح بوربوينت وتخطيط واسئله مقاليه أسألي عن الي يناسبك مو جيييده ولا لأه..
ولو يهمك اذا تحاسب ع حضورك وغيابك وطريقة لبسك وايش الي مسموح والغير مسموح اسالي عن كذا برضو ..
عشان تتعاملي صح مع كل وحده ولا تبخسك في حقك.
حتقوليلي طيب انا بسأل عن الاستاذات كيف جيده ولا لأ لانو بستفيد من تجربة غيري عشان اتعلم,
اقولك كوّني خطك الخااااااااااص ولا تتبعي خط احد,
* يعني لمن تكوني مذاكره واخلاقك لا يعلي عليها وشكلك عاكس مضمونك وواثقه ف ربك سبحانه وتعالى
محد يقولك ثلث الثلثه كم , حتقوليلي,,
طيب في استاذات مايعجبهم العجب ولا الصيام ف رجب ارد واقولك دامك سويتي كللل الي عليكي ومتاكده انك صح ولا قصرتي ف حقك اولا
وف حق اي شي ثانيا خلاص اتركي الباقي لله.
وان ما اخذتي حقك في دنيا الا ماتخذيه في الاخره ربك مايظلم عبااااده لو ايش ماصار.
* اسألي واستفسري في المنتدى اوكي ما اختلفنا لانو اساسا ما حطوه الا لهذا الغرض لكن قبل لا تتخذي اي اجراء اتاكدي وكوني ذكيه
في خياراتك واذا كانت المعلومات الي عرفتيها لها تفرعات ثانيه تعالي حطيها هنا وانتي متأكده وبطريقه مقنعه مو مجرد,
انا والله سمعت انو .......
ولا وحده من البنات سمعت انو .......
لانو مره عيب تتخذي اي خطوه ف حق ذاتك بناء على جملت سمعت ولا قالو ..
* اي اشاعه تسمعيها واي شي يوصلك من اي بنت روووحي انتي بنفسك واستفسري
لا تقولي استحي ولا مااعطوكي وجه لانو من ابسط حقوقك انهم يمدوكي بالمعلومات الي تناسبك
سنتري عند الشؤون خليهم يحفظو شكلك المهم حقك تعرفيه والي لكي والي عليكي

* صح في مواد سهله ومواد صعبه بس في النهايه كلها معلومات وانتي تتحدي نفسك في استيعابها
اتحدي نفسك وفاجئيها مو مشكله لو اخفقتي , عادي طيحي وارجعي اوقفي
وفي النهاية : احب اقول لكل بنت تعطي معلومه من راسها بدون مصدر موثوق ياريت تحتفظ فيه لذاتها
لانها بكذا توهت نفسها وغيريها وببساطه الي تعرف تذكر مصدرها سواء كان استاذه او اي مكتب في الشؤون
او رابط موقع
والي ماتعرف يااااااازين جملة ( حبيبتي ما اعرف إن شاء الله البنات يفيدوكي)

واي مساعده او استفسار انا اختكم وموجوده الله يقدرني اكون لكم
(الي حبيت انه احد يكون لي هوا) اووول مادخلت الكليه
وإن شاء الله افيدكم واستفيد وكل ذا بطريقه عقلانيه و مقنعه وماراح اقول مثاليه لكن اقرب للصواب

ودمتم مبتسمين وعام دراسي موفق للجميع ان شاء لله