تحتاجي مساعدة في الانجليزي ؟

[Fufroora]

المشاركة الأصلية كتبت بواسطة الأمواج عزيزتي.. ممكن للإستفادة وليستفيد الجميع.. عن كيفية تطوير نفسك في الإنجليزي وماهي الأشياء التي ساعدتك لتكوني متحدثة متمكنة في الإنجليزي.. أكثر شيء ساعدك وش هو في تعلم اللغة؟..

بالنسبة لتعلم اللغة

سبق وان قلت المقولة الانجليزية :

Use it or lose it

وأكيد تلاحظوا الكلام دا في الاجازات ..

خصوصاً بالنسبة إلي ما يسافروا لدول اجنبية

يعني لمن نكون في الدراسة .. يكون ماشي حالنا في الانجليزي

بس في الاجازة تحسي ان الكلمات اتبخرت !

والوضع يصير اسوأ بعد التخرج .. إذا ما اتوظفتي مباشرة في وظيفة تتطلب منك استخدام الانجليزي !

عشان كدة .. كل واحد فينا لازم يكون حريص على لغته .. ويحاول ينميها كمان !

اللغة الثانية في المخ زي الغرفة إلي فيها أثاث ..

لمن تهمليها .. حتتغبر عليكي ..

يعني لازم تهتمي بيها اول بأول ..

لازم تدخلي الغرفة دي باستمرار عشان لا تنهجر !

وعندك 4 ابواب لها

Writing
Reading
Listening
Speaking

أسهل المهارات .. هي المهارة السمعية

بدليل ان الأطفال الصغار لمن تكلميهم .. تحسيهم يفهموا عليكي .. بس ما يقدروا يعيدوا وراكي

عشان كدة حاولي تسمعي للغة الانجليزية قد ما تقدري ..

عندك قنوات التلفزيون ما تقصر في الافلام الانجليزية على مدار الساعة

حتى لو انك بدك تخلي اخوانك إلي في المدارس يحبوا الانجليزي .. اهتمي بيهم من البداية

خليهم يتابعوا افلام كرتون بالانجليزي ..

حتى لو كانت الترجمة موجودة .. عادي .. يكون احسن كمان ..

عشان مع الايام الواحد حيحاول يربط بين الكلمة إلي سمعها وترجمتها !

وحتلاحظي ان كتير من المصطلحات ما تكون ترجمتها مباشرة ..

يعني يترجمولك المنعى المقصود من العبارة

مثلا

Break a leg

لا تعني اكسر ساق

تعني بالتوفيق !!!

زي دي العبارة نسميها بالانجليزي

idioms

وهنا موقع فيه العديد من العبارات المجازية

المهم وانت تتابعي الفلم .. خلي الصوت عااااالي .. وركزي مع الكلام .. واربطي بين الكلمة إلي سمعتيها والترجمة .

ولو أهلك من النوع الهادي .. زي حالتي .. انا رحت اشتريت من الدانوب سماعات وايرليس للتلفزيون .. قيمتها كانت 39 اول ما نزلت .. وصارت ب 29 على ما اظن .. تمشي مع جميع انواع التلفزيونات .. وحتى اللابتوب .

ولو انك من النوع إلي يسمع اغاني انجليزية .. أو عندك احد من اخوانك يسمع اغاني انجليزية .. فرصة كمان انك تتعلمي كم كلمة منها .. اهم شي انك قبل ما تنزلي الاغنية لازم تعرفي ايش كلماتها ومعانيها .. عشان لا ترددي حاجة مو كويسة وانت ما تدري عنها !

وعشان تعرفي كلمات اي اغنية انجليزية .. اكتبي اسمها في القوقل .. أو أي جملة منها لو ما تعرفي اسمها .. واكتبي كلمة Lyrics

وبعد كدة انسخي الكلمات وترجميها في القوقل المترجم .. وكمان لمن تسمعيها خلي بالك من الكلمات وكيفية نطقها .

وممكن إذا عندك افلام منزلتها من النت وملف الترجمة منفصل عن الملف الرئيسي .. حاولي انك تشوفي الفلم من دون الترجمة في البداية .. وبعدين تشوفي الفلم بالترجمة .. أو العكس

دا بالنسبة السمع .

بالنسبة للقراءة ..

كانت ابلة الانجليزي تقول اقروا جرايد بالانجليزي

بس انا عن نفسي اطفش من القراءة بالانجليزي ..

بس اشتريت رواية لزيزة وحلوة وظريفة من جرير .. اسمها Chocolate factory

هي مخصصة للأطفال في عمر 8 سنوات .. بس حلوة
ممكن إلي يحبوا الطبخ يقرأوا طريقة تحضير الأكلات العالمية من مختلف المواقع

يعني لو في بالك اسم طبق معين اكلتيه في مطعم ونفسك تسويه في البيت .. اكتبي اسم الأكله واكتبي كلمة recipe

بالنسبة للكتابة ..

حاولي تكتبي لو سطرين كل يوم بالانجليزي عن أي شي

عن مزاجك .. عن يومك .. عن امنتيك اليوم .. إيش نفسك تتغدي اليوم

بالنسبة للتحدث .. خليكي كول مع صاحبتك واجبريها على انها تتكلم انجليزي معاكي !!!!

يقولوا – والله اعلم – انو في مواقع زي الشات تعلم الناس تحدث اللغة الانجليزية بالمايك ..

انا بصراحة ماقد جربتها ولا دورت عنها

بس إلي يعرف عنها شي ياليت يفيدنا

امممم

دا كل إلي يخطر ببالي .. وانتم اهل العلم

وحاسة نفسي بأبيع الموية في حارة السقا

اعذروني على الاطالة

الله يوفقكم وييسر امركم