حالنا تحت مسمى الجامعه

[شريفه]

الى متى حيكون هذا حالنا فالكليه تحت مسمى الجامعه
السلام عليكم ورحمة الله وبركاته
الى
مدير الجامعه
انا طالبه فالجامعه وذي اخر سنه لنا
فكلية التربيه
والنظام اللي اتغير علينا وما ندري لوين حيوصلنا
يعني نصه مطبق نظام جامعه والنصف الاخر نظام كليه سابق
من معاناتنا مع هالنظام وانا عن نفسي حتكلم
فتوزيع الجداول
بعض الطالبات ناقص عليهم مواد مانزلت فالجداول واحنا بما انو اخر سنه غصبا عننا ندرس 10 مواد<<<فين نظام الجامعه هنا؟؟؟
طيب والوقت 50 دقيقه صرنا كطلاب المدارس بس زدتو علينا 5 دقايق>>>فين نظام الساعتين ونظام الكليه
لا غير كذا الدكتوره مايمديها تقول كلمتين على بعضها الا والوقت خلص
وهالموقف حصل معايه كطالبه
كان عندي محاضره على الساعه1 الى 1:50
وانتهى وقت الدكتوره واخذت كمان تاخذ الحضور والغياب وقلتلها يادكتوره عندي محاضره وقالت اجلسي
مكانك لحد مااخلص
يعني لوخرجت حتقول هالطالبه قليلة ادب وحتحطني فراسها وهالشي اكيد مو غريب على الاستاذه وشوفو مين ينجحني فمادتها
واذا جلست وسمعت كلامها حتاخر عن المحاضره الثانيه وحنطرد من المحاضره عشان الدكتوره قالت اجلسي فمكنك
اش حيكون موقفك انته كاستاذ او كمدير لو حصل معاك هالموقف وكيف حتتصرف؟؟؟؟
حتى في وقت الصلاه بعض الاستاذات عشان ماتتاخر على بيتها حتعطينا فيها محاضره فوقت الصلاه
وغير كذا لمن وزعو الجداول فالنت
تخيلو حطو رقم القاعه 203 في مبنى b >>>>وطلعت عياده
ونفس الشي فمبني c<<<<وطلعت حمامات اكرمكم الله <<<<وبعدين عدلوها ونحمد الله وحطوها 209
وبعد كاتبين مبنى c او b ورقم الغرفه a202 او 201a
وكل الغرف على هالحال الغرفه تكونa والمبني c او b

وكمان على القاعات تخيلو دكتورتين مكتوب فجداولهم نفس المكان ونفس الزمان وفالاخر كل دكتوره تقول هذي قاعتي وهذا وقتي
والجداول حق الاختبارات كل استاذه لازم تختبرنا 3 مرات يعني اختبارين شهريه واختبار نهائي
وطبعا كل اساتذه حاطه فباله وقت معين
مثل يوم الاربعامن الاسبوع السابع يكون عندنا فقه جهاد وكمان استاذة الملل تبغى وقت اختبارها فهالوقت
وياعالم مين بعد يختار هاليوم ويختبرنا فيه وياعالم مين من الاستاذات تتنازل عن هاليوم وتخليه لاستاذه غيرها
واكيد غيره من الايام حيصل فيها تضارب بين الاستاذات بسبب هالجدول

لدرجة حتى روحتنا للجامعه نكاد نحرم فيها اجر طالب العلم
المطلوب من سعادتكم والله يحفظكم لعيون ترجيكم
ان الوقت يكون ساعتين او 3 ساعات لكل محاضره <<<نظامنا القديم يرجع
ويكون في مبني واحد زي ماكنا سابقاً
قاعات الامير عبد المجيد
والمكيفات اللي هناك يوطو من درجت برودتها لاننا نعاني من هاللشي درجت بروده عاليه جدا
ونرجع اربع شعب زي ماكنا
والجداول تكتب من قبل الاستاذات وباتفاق بينهم عشان لايتلخبطو ولانتلخبط
يعني استاذات الاقسام وبذات احنا الدراسات
يتجمعو ويحطو الجداول مع بعض
ياتكون موحده لكل شعب الدراسات
يايحطوها مختلفه لكل قاعاه من قاعات الدراسات
لو فيه شي وحصل او تطورات او تغيرات او مطالب
باذن الله حنتكلم

مع كل الشكر والتقدير
واتمنى من كل قلبي نرجع احنا كطالبات رابع لنظامنا السابق ككليه تربيه وبعد التخرج
تعدلو هالنظام
ريحونا الله يريحكم
وفالختام السلام عليكم ورحمة الله وبركاته
معانات طالبة جامعيه
قسم الدراسات الاسلاميه
المستوى السابع
رابع دراسات
كلية التربيه بجده