كــآرثة جدولي . بس مادتين . الرجاء الدخول لتفهمو الموضوع . انا دفعه 09

[Cho Kakao]

السلام عليكم ورحمة الله وبركاتة

القصه طويله وتعبت والله وانا رايحه جايه الجامعه ولا مسؤوله راضيه تعطيني وجه كل وحده تحولني عالتانيه
وكل ما اروح للتانيه ترجعني للأولى
بالعربي أدور بحلقه مفرغه

القصه تبدأ لما درست الفصل الاول ونجحت بكل المواد ماعدا العربي 101
واعتذرت عن المستوا التاني ورجعت هادا المستوا وطبعا انا طلبت بالاول التسكين اقتصاد واداره وبعدو اداب طبعا فهموني غلط وحطوني اداب وانا لسا حتى مابديت دراسه ولا سددت ولا شي

بعدو بدأت مشاويري من الجامعه للبيت ومن البيت للجامعه تقولو كأني موظفه هناك
وطلبت تحويل من كلية الاداب والعلوم الانسانيه للإقتصاد والاداره ورحت لكل الغرف بالعماده بس وانا اشرحلهم حالتي إنو ما أبغى اداب وأنا لسا تحضيري يعني جدا بدري عليا التسكين
روحت من غرفه 2 ل 15 ل 7 ل الشؤون التعليميه ل 15 ل 7 ل 2

وبالاخر قفلو الباب بوجهي

وطبعا سلمت أمري لله وروحت سددت حق المستوا

وصبرت يومين وفجأه طلع الجدول

بس طلع بشكل جدا مخيف ::

مادتين بس

وانصدمت وقلت أصبر كمان فتره ممكن يزيدو

وأروح الخطه الدراسيه لقيت المواد مو زي البشر , مواد جدا مخيفه عربي 1 و2
وثقافه 2 وانجليزي 102

و

مافي احصاء ,, هنا صدمه كمان

سكت وقلت أمري لله ممكن يتعدل كل شي بعد فتره

وكم يوم طلع الحذف والاضافه واليوم الا تفعل

المصيبه والكارثه إيش اضيف ؟ فهموني بس إيش أضيف

بس انجليزي هادا اللي بقدر أضيفو ,

العربي مابقدر اضيف لا 101 ولا 201 لأني راسبه فيه بالمستوا الاول

والثقافه مابقدر أضيفو

ومافي إحصاء 111 زي البشر الباقيين

تعبت نفسيتي كرهت نفسي والله حاسه كأني منبوذه من دا المستوا

والاتصال بالجامعه اتصلت كل يوم بحاول

واخر شي قللي الرجال اللي يرد عالتلفون يا اختي انا ما اعرف إيش تسوي ما اعرف > حسسني إني جايه من كوكب تاني والله
وقفل بوجهي > مما زاد الدموع والألم

طيب أنا دحين معقول أدرس مستوا كامل على 3 مواد ؟ مهارات تفكير ومهارات اتصال وانجليزي 102 ؟؟

ودافعه 3000 ريال يعني على كل ماده 1000 ؟؟!!!

تعبت لدرجة لما ابويا يطالع فيا يسألني تعدل جدولك ؟ والله العظيم أبكي مني عارفه إيش اقولو

أقولو الجامعه كل ما اتصل يجلسو يحولوني كل شويه وبالاخر يسكرو بوجهي
وللا أقولو كل ما اروح العماده والتسجيل محد يديني وجه وبالاخر يسكرو الباب بوجهي

طلب التحويل للكليات مانقدر إلا لما نكون مخلصين مستويين والمعدل مرتفع

وأنا لسا بس درست مستوا واحد بس وجايبه 2,67 يعني لسا حتى ماقدرت ادرس المستوا التاني عشان أقدر أجيب مجموع ولا اختبرت العربي للمستوا الاول ولا شي

سرت أنام وأصحى وأنا صداع مو طبيعي وأطلب ربي يخرجني من دي الكارثه اللي طلعت بحياتي الحمدلله ياربي على كل حال

اللي أبغاه منكم تدعولي وتوجهوني إيش أقدر أعمل ؟
ممكن أحد منكم يعرف أحد سارلو زي موقفي أو حتى يعرف الحل

وتعبت من قصة التلفون والارقام والتحويلات مابقيت تحويله للإنتساب إلا وعندي

وسامحوني طولت عليكم
حتى موضوعي مافي شي يخلي الواحد يبتسم
.
سبحان الله وبحمده سبحان الله العظيم