هنا تجمع للمقبولين في التحويل من كلية الى اخرى

[MeeEeemaa]

...الـــــســــلااام عــــلــــيـــــكـــــــــم...

في البداية الف مبروك لكل الي حولو واخيراااا حولناا

طيب انا حابه انو يكون هادا الموضوع يختص بكل الاسئلة والاستفسارات عن التحويل من كلية لاخرى ويكون مرجع لكل واحد يبا يحول..
والي عندو اي حاجا عن التحويل لا يبخل بيها عن اخواتو واخوانو خصوصا الي قيد حولو من كلية لتانيه .. ...

طيب حأبدا في الاسئلة..
- دحين انا كونت في كلية الاقتصاد المنزلي فرع البنات وعملت طلب تحويل لكلية الحاسبات وتقنية المعلومات والحمدو لله اتقبلت فيها ونزلولي جدول فيلو 4 مواد المهم دحين انا لمن يفتح الحزف والاضافة هل اقدر اضيف مواد لانو انا دحين راح عليا ترم وابا امشي ع الخطة الدراسية تبع القسم؟؟؟
والسؤال التاني: اش معنى كلمة مستجدة ؟؟؟؟
واسؤال التالت: متى اقدر اتخصص ؟؟.

بليز الي عندوو اي فكرة عن هادا الموضوع لا يبخل بيها وانا جاهزة لأي استفسار وسؤال للي حاب يسأل مهما كان السؤال لا تستحووو انشاالله نقدر نجاوب عليه ..

اتمنى تتفاعلو مع الموضوع وشوكرن جزيلا ليكم ..

[~..candy..~]

مبرووووك اختي وعقبالنا يااارب
ثانيا بسألك متى شقتي نتيجه تحويلك وكم كان معدلك ضرووري واذا تعرفي احد غيرك حول
وشكرا :)

[الاميره فلونا]

ماشالله والف مبروك ياحلوه
انا كمان قدمت تحويل لكلية الحاسب
مدام انقبلتي معناتو انا ماانقبلت لانو مااتغير تخصصي طيب متى طلعت نتيجتك وفين لقيتها وكم وقفو المعدل؟؟؟
اما سؤالك عن متى تتخصصي اكيد السنه الجايه لانو بنات الحاسب بيدرسو ترم عام وبعدها يتخصو صحبتي كذا
وانتي حتاخذي اول ترم موجود عندك بخطة الحاسب لانك مستجده
إن شاء الله قدرت اوصلك معلومه وافدتك واتمنى تفيدينا بجوابك عن الاسئله
ومشكورا

[بكـآء آلـرٍـوٍح ..!]

في انتظار الاجابة على اسئلة البنات :(

[~..candy..~]

انتي حولتي من كلية التربيه فرع البنات ومو من الجامعه صح

[MeeEeemaa]

الله يبارك فيكم كلكم ياااعسوووولين وعقبالكم ياارب

وبالنسبة لأسئلتكم:

انا شوفت التحويل اليوم الصباح ع الساعة 8 اعتقد..
ومكتوب في معلومات الطالب>> .. محول من كلية لاخرى.. مستجدة في كلية الحاسب وتقنية المعلومات..
ومعدلي 4.81 وللافس مااعرف ولا وحدا حولت

الاميره فلونا.. تسلمي ياعسل وخيرها بغيرهاا لا تزعلي نفسك ومرااا شوكرن على معلوماااتك اكيد افدتني وافيدتي الناس التانية

ايواا ياكاندي انا كونت فرع البنات مو في نفس الجامعه

اتمنى من الي حولو لأي كلية يدخلوو ويفيدوناا اكــتـــر

[الاميره فلونا]

يعني انتي ماكونتي عندنا بنفس الجامعه
يالله نورت الجامعه بوجودك
كيف كانت دراستكم عربي ولا انقلش بنفس الكليه

[MeeEeemaa]

المشاركة الأصلية كتبت بواسطة الاميره فلونا يعني انتي ماكونتي عندنا بنفس الجامعه يالله نورت الجامعه بوجودك كيف كانت دراستكم عربي ولا انقلش بنفس الكليه

تسلمي يااعسوولة الجامعة منورة بنورك يااقمر..
والدراسة هناكا كلها بالعربي..


وبليززز ياحلووين احد يقولي مش عارفة ازا يمديني اعمل حزف واضافة ولا لاْا

[كنق الغربيه]

اذا نزل لك جدول فيه مواد حاسب تقدرين

[hanaa_11]

انا أخت hanaa_11
بنات انا من امس افتح في الاودس مقفل ومو عارفه انقبلت ولا ايش احس بقلق والله
ابغى اسال لولو مثلا انقبلت انا قدمت ع الاقتصادوالاداره كنت محتاره بين قانون ولا محاسبه ومعدلي 4,59التراكمي والى الان ابغى احد يساعدني مو عارفه ايش اختار الي في هذي التخصصات ليت يفيدوني :(