صحيفة عكاظ تنشر معاناة الانتساب

[ميمي_غامد]

]السلام عليكم كيفكم .......
اليوم تصبحت بمقاله من الاستاذ فتحي حلواني اللي مستحيل افوت مقالاتو يوم الجمعه
كتب عن معاناتنا وعن القرارات الجديده وعن مطالبنا باسلوب حلو وخفة دم ولهجه حجازيه قرريبه من القلب
اخليكم مع المقاله .....

(طالبات السنترا يا مسؤولي الجامعة)

فتحي حلواني

الله يسامحك يا فتو خليتيني اخد حمام شمس ليا ساعتين زمان متسمر في السيارة والشمس والحر هلكوني وحضرتك لسة جية ؟. ايش اسوي يبويا على بال ما اتجمعوا البنات لأن بعضهم جايين من بره جدة هدا غير انه موظفات الأمن جابولنا الجنان مسويين فيها (كونان) ايش تبغوا؟، وايش عندكم ؟، وجايين ليه ؟.. المهم يبويا انه بعد ما اجتمعوا البنات في القاعة اللي خصصوها للاجتماع مع الدكاترة المسؤولين في الجامعة عشان يشوفوا حل لحكاية نظام السنترا .. ومن هما دول المسؤولين الدكاترة اللي اجتمعتوا فيهم ؟، مافي داعي أقول أساميهم هما عارفين نفسهم وإن شاء الله يكونوا صادقين مع نفسهم ويكونوا قد كلمتهم وينفذوا كل المطالب اللي يبغوها طالبات السنترا لانه نظام السنترا السنة دي بهدل الطالبات وجاب لهم وجع القلب والهم والغم والطالبات محتارين ومحتاسين مو عارفين راسهم من رجولهم .. وايش مطالب طالبات السنترا ؟، أول شي وهو دا المهم الإعفاء من الرسوم أو على الأقل تخفيضها من 6000 الى 3000 في السنة. وتاني شي يرجعوا برنامج سنترا زي ما كان أول، يعني محاضرات لمدة تلاتة أسابيع وتالت شي يصلحوا الخراب اللي موجود في برنامج السنترا لأنه طالبات الإنجليزي والرياضيات متبهدلين منه آخر بهدلة كل شوية والاتصال ينقطع ويشوفوا كمان حل لنظام السداد وغير كدا تنزيل الجداول وفتح الحذف والإضافة لكل الدكاترة ورابع شي يلغوا كلمة منتسب في شهادة التخرج لأنهم كلهم طالبات جامعة سواء طالبة منتسبة والا منتظمة وخامس شي يعطوهم ترم صيفي زي بقية الطلاب والطالبات وسادس شي تكون مدة الاختبار 3 ساعات ويزودوا عدد الأسئلة لـ 100 سؤال يعني بالبلدي كدا كل سؤال عليه درجة وسابع شي يعدلوا التقويم الجامعي بكتابة المواعيد كاملة من بداية السنة الدراسية عشان الطالبات يعرفوا يتصرفوا في محاضراتهم وتامن شي يرجعوا نسبة التحويل من انتساب لانتظام اللي هية 3.75 زي ما هو مكتوب في موقع الجامعة وبلاشي من تحويلهم الظالم اللي بيقول 4 للسعوديات و 4.75 لغير السعوديات، وتاسع شي التحويل للانتظام يكون متوفر لكل من كلية الإدارة والاقتصاد وكلية الآداب في المقر الرئيسي للجامعة وبجميع تخصصاته، وعاشر شي وهدا هو المهم كمان (الأمانة الأمانة الأمانة) في تصحيح ورقة الاختبار ومن حق الطالبة مراجعة ورقة الاختبار وإعادة التصحيح لجميع المواد .. ماشاء الله تبارك الله كل هادي مطالب ؟.. ايوه يبويا هيه دي مطالب الطالبات.. بس عسى لقيتوا من الدكاترة اللي كانوا موجودين رد حلوو ؟. والله كل ما سمعوا طلب من الطالبات يردوا عليهم بلسان حلووو (حاضر يابنتي).. طيب حنشوف وشمس تطلع خبر يبان.. وعيشوا كتيييييير تشوفوا كتيييييير..

وهنا الموضوع الاسااسي لاتنسون تدخلون ع الموقع وتعليقاتكم ع الموضوع الاسااسي وااكييد نشكر الاستاذ عمو فتحي حلوني ربي يسعدك دنيا واخره

http://www.okaz.com.sa/new/Issues/20...0928536026.htm

[7ṩaƒąђ ✿╗]

يسسعده يَ رب
ان شاء الله يسمعو لنا ويتحسن كل شي هالسنه

[عذبة آلروح]

هههههههههههههههه

عجبني الكلام بصراااحه

الله يعطييه العاااافية

تسلمي ميمي ربي يسسعدك

[جوريه حربيه]

وعليكم السلام ورحمة الله وبركاته .,.

يعطيه العآفيه :)
اكتمال التقويم وضح امور اهم ياريت تنتبهوا لهآ اخواتي
المده الزمنيه بين انتهاء السنترا 28-1 والاختبارات 14-2
اسبوعين فقط :/ تذكرت ايام التحضيري
فالي عندها 6 مواد تبدأ من الآن تنظم جدول مذاكرتهآ .,.
وعقبال الامتياز لنا جميعاً ^^

[سهورة الأمورة]

المشاركة الأصلية كتبت بواسطة جوريه حربيه وعليكم السلام ورحمة الله وبركاته .,. يعطيه العآفيه :) اكتمال التقويم وضح امور اهم ياريت تنتبهوا لهآ اخواتي المده الزمنيه بين انتهاء السنترا 28-1 والاختبارات 14-2 اسبوعين فقط :/ تذكرت ايام التحضيري فالي عندها 6 مواد تبدأ من الآن تنظم جدول مذاكرتهآ .,. وعقبال الامتياز لنا جميعاً ^^

[motr]
كلام سليم
[/motr]

[فيلسوف العرب]

الف شكر لهذا الكاتب ،،،الجميل

اني سوف اتابع اطروحاته...وسوف نبعث له رساله

نشكرهـ بها ...ونطلبه ببذل المزيد من هذه الراجمات

والشكر موصول لك اخت ميمي على هذا الطرح

[7ṩaƒąђ ✿╗]

^^

ايواا انا مرا تفاجأت ليه كيذاا
الله يوفققنآ يَ ربب

[ميمي_غامد]

الله يسلمكم ياارب
جوريه ايش اللي اسبوعين حرااام عليهم انا صراحه ماعرف اذاكر من بدري هذا غير انو عندي مادتين حظور ف الجامعه تشتت

[ساره الفيصل]

شكراً له لتوصيل صوتنا للكل

[هشّامية]

هههههههههههههههههههههههههه الله يعطيه العافية ...الحين نزل التقويم يعرف الواحد كيف يرتب نفسه ....بالتوفيق للجميع