فكره ان شاء الله توصل للجميع

[LucKy LAD]

بسم الله الرحمن الرحيم
هذا الموضوع شويه طويل اللي ما يكملو لا يبدأ فيه من اساسو
طيب
في البدايه احب افهمكم قصدي من الموضوع
انا عارف انو اغلب الطلاب معترضين على النظام وزي كذا
وكثير ناس مو عاجبهوم
وممكن اكون اول واحد فيهم
لكن انا من الناس اللي اكره ما على قلبي الظلم
وما احتمل اشوف الظلم باي نوع من انواعه
نيجي للكلام المهم
كلنا عارفين انو دخول الجامعه ماكان اجباري
وانه كلنا كنا خايفين اننا ماننقبل
لكن بعد ما انقبلنا كل واحد بدأ يعترض ويغلط ويقول الكلام الوحش
طيب ممكن كل اللي ينقال صح
لكن
ليش محد يذكر الجانب الطيب في الجامعه
والله اني اشوف كثير اشياء حلوه فيها وحاطرق لمجموعه من الاراء المنتشره
كبدايه
نشوف العالم اللي تقول ياريتني في البترول
انا اقوله يا اخي او يا اختي
والله اغلب اللي في البترول يقولو ياريتنا في جامعة الملك عبد العزيز وحتى ناس كثير بكيت دم عشان تتدخل وماقدرت
والكلام دا عن مشاهده
ولا يغرك اللي يقولو الغربه سهله
والله والله والله انها جدا صعبه ومايعرف الا اللي جرب
يعني نحن نحمد ربنا اننا وسط اهلنا وفي احلى اماكن في المملكه جده اللي الف واحد يحلم انه يكون وسطها
شي ثاني الدكاتره
ممكن كثير دكاتره مو كويسين واخلاقهم تعبانه لكن العكس صحيح
مثلا عندنا عشان لانروح بعيد البروفيسور والد احد العضوات <<<<اعذرونا كلللجنا
انا متاكد انه طبيعي حيكون طيب
حتى بدون ما اعرف اسمو
وتخيل انو احد يغلط عليه
انا اول واحد ما ارضى انه اي احد يغلط عليه لانو والد احد عضوات المنتدى
وقس على ذلك
بعدين حتى الدكاتره البيض او اللي شرحهم مش ولا بد
والله عندهم نوع من الطيبه
خذو مثال تاني
انا يوم الخميس خرجت من الاختبار وماسك الخط المميت السريع
وفي نص الخط اكتشفت انه المحفظه في الكلاس
ورجعت واتمرمط والله ما احد فكللي الباب
الين ماربنا ارسللي مدرس القرمر البكستاني
اللي انا اكرهو
وقد معايا وفتحلي الباب وبدونه كان خمجت هناك ولا احد سأل فيني
يعني قبل ما نحش اي احد خلينا نتذكر الجانب المشرق
والله مافي احد من الدكاتره يقرب لي بس احب اننا نكون محبين للجامعه اللي نحن لسنا اللا من طلابها
يلدرم له كلام جدا جميل ياريت اللي ماقريه يراجعه
ولاتنسو انو يكفي فضل الجامعه علينا
اننا عرفنا بعض من خلالها وفلسعنا اقوى فلسعات شلال وحركات <<<<<<<مافكر في المكافأه فكر في الشلال
والقادم اجمل<<<<ناوي شي جامد
اتمنى تكون فكرتي وصلت والله يا شباب ويا شابات
انه جامعتنا من افضل الجامعات بكل عيوبها

اخيرا كنت افكر بهديه للبوزي دا وشفت انه فكرت زيدس فاذر مو عاجبتو <<<<<<<<الله يستر
قلت مالي الا اهديه باقه من الورود فيها عدد
الورود يساوي الردود مضروب في المشاهدات <<<<<الولد ضيع من الاحياء بقوه
ورده
ان شاء الله تكون الفكره وصلت
انا حاولت اختصر والكلام اللي مكتوب مو مقصود منو تعبية سطور
المقصود منو
اننا مانكون ظالميييييييييين
تحياتي للجميع

[dr.hope]

مع انك شبكت كم موضوع مع بعض وتوهتني شويتين

لكن الفكرة العامة وصلت

وصح كلامك ليش احنا اذا ما عجبنا دكتور نقوم نتكلم من وراه

بالله تخيل/ي ان هذا الدكتور كان ابوك ومرة وانت ماشي سمعت شباب يتكلموا عليه ويقطعوا فيه

بالله ماحتزعل/ي

وفي النهاية ترى حياة الجامعة حلوة وذكرياتها حلوة وكلنا حلوين<<< احراااج

فلا تخلوا شي يخرب عليكم حتى لو كان مرة صعب<<< زي الأحياء

خلونا نشوف الجانب المشرق ونتخيل لمن تجي آخر السنة وكل واحد يكون حقق حلمه اللي يبغاه

ويفرح أمه وأبوه وأهله كلهم<<<< وبعدين يسوولك حفلة في الشلال

سامحوني عالإطالة

ونشوفكم على خير

[طقوس ..~]

انا معك ميه بالميه


الحمد لله

اصلا دى نعمه لازم نشكر ربنا عليها


ونحافظ عليها


اللهم لك الحمد كما ينبغى لجلال وجهك وعظيم سلطان


ويارب


يارب

يارب



سهلنا يارب


وترى للمعلوميه


الصعب لهه طعم خاص


خصوصا يوم تنجح فيه

[ROoOFaNA]

إذا كان الأمس ضاع .. فبين يديك اليوم
وإذا كان اليوم سوف يرحل .. فلديك الغد.. لا تحزن على الأمس فهو لن يعود ..
ولا تأسف على اليوم .. فهو راحل
واحلم بشمس مضيئه في غد جميل

الجانب المشرق في حياتك
أن تتفائل دائما بالخير
الجانب المشرق في حياتك
أن لا تيأس من روح الله .


الجانب المشرق في الحياة
ان تفكر بإيجابيه لكي تشعر بالسعاده

[silver ^_^fox]

معاك في كل كلمة انا ماعندي اعتراض على اي دكتور

عندي اعتراض على النظام النظام قاسي مرة

مافيلو اي مرونة وادارة الجامعة ماتبى تتعاون مع الطلاب

هنا المشكلة

اما الدكاترة لاغبار عليهم>>>عصام الشوالي

هههههههههههههههههههههههه


مشكلتنا الاساسية الاختبارات كيف دكتور يشرح ودكتور يحط اختبار

ماينفع

الله يعطيك الف عافية على الموضوع الرائع

[kojak]

أنا بصرااحة كل شي في دي الجامعة مو عاجبني

[ROoOFaNA]

الحمد لله على كل حال

ورضا الناس غايه لا تدرك


تجري الرياح بما لا تشتهي السفن

وما خاب من اتوكل على رب العالمين
الله يوفق الجميع ان شاء الله

[LucKy LAD]

de hope
الف شكر لمرورك وانا معاك في كل كلمه

خوخا
امين وبرضو متشكرين اوي على تشقيرك على الموضوع <<ايش اللغه بالتحديد

النور السعودي
كلامك من احلا ماسمعت والله يوفقك وبرضو ثانكس على دخول موضوي المتواضع

سلفر فوكس
النظام قاسي وانا من رأيك لكن سوف احتمله بكل عيوبه لاني استطيع رؤية ايجابياتو
كوجاك
لي ياعمو زعلان بالعكس ارفع معنوياتك وافتخر انت في احلا جامعه

اخيرا
الف شكر لكم جميعا والفكره اننا نحب جامعتنا<<<<خلينا نحب في حالنا بلا لقافه
ونغلط على ابوها بس بحنيه <<<حدد موقفك يامضيع
انتظر الشباب والشابات الباقين بفارغ الصبر <<<<ليش مو بمليان الصبر ؟
تهياتي بالهندي كما عودناكوم

[Bo0oZy]

ياعيني عليك يا لكي لاد ..

يالله يا شباب كل واد يرد .. او حتى بس يشاهد << يبغا يزود الباقة ككككك


بالنسبة للموضوع .. مرة كلامك سليم 100 %


انا ما عندي اي اعتراض على المدرسين .. خصوصا ً مدرسينا .. صح انو في كم واحد بيض .. لكن لو جيت من ناحية الطيبة وكدا .. والله كلهم قلبهم أبيض .. ويتفهمو .. صح حق الليسنينق احيانا يجي معصب وينزل حرو علينا .. بس والله كلهم طيبين .. والجامعة كويسة والله .. مبنى حلو .. وكبيرة .. واحس انو بتحاول ترتقي .. ولازم احنا نرتقي بيها .. لانو احنا جزء منها ..

لكن انا اعتراضي كلو على التنظيم .. احسهم حطو السنة التحضيرية بدون دراسة مفصلة .. فصارت الشغلة بزوطة .. خاصة الأحياء ..كان لازم يحددو عدد معين من الشابترات .. يعني خطة ويمشو عليها .. زي الاحصاء .. لكن لا حياة لمن تنادي .. واهو احنا قاعدين ناكل على راسنا .


لكن فعلا ً عشان ما نكون ظالمين .. الجامعة دي ليها فضل كبير .. ويكفي انها لمتنا بدال ما نتشرد في الشوارع ككككك

احمدو ربكم انكم انقبلتو يعني في الجامعة

وانا اخويا في البترول .. يقول امنيتو انو يدرس هنا .. فعلا ً الغربة صعبة

ومن ناحية الشغل ولا كدا .. والله اعرف ناس واصلييييييين فووووووق في كبرى الشركات وخريجين ( عزوز )

الجامعة هيا أمنا التانية << بدأ النفاق كككككك



لا بس والله انا حبيتها .. ويكفي على قولة لكي لاد الفلسعات اللي اتعلمناها هنا كككككك



واي واحد مو عاجبتو .. ترا مرة سهل تسحب ملفك كككككك بس حاول تدور يمين شمال .. اكيد في شي حيعجبك في الجامعة


وتحيااااتي الجليلة للكي لاد .. وزي ما قلتلكم اللي ما يبغا يرد يشاهد على الاقل .. خلوني ازود رصيدي في الباقة كككك

سلملم


اخوكم
بوزي

[كيتا الكتكوته]

والله يا لاكي لاد الكلام مررررررررررررره طوييييييييييييييييييييييييييييييييييل
من اخرها كدا .. انا ما قريت شي غير كلام كوجاك عشانو قصير .. واوافقو الراي
والي تقولو انا معاك