محتااااااااااره بين جامعة الملك عبد العزيز و البترجي و البعثة

[bayan sait]

تعبت من التفكييييير انا كل اللي نفسي في اني ادرس علاج طبيعي محتااره انقبلت تحضيري علمي و انقبلت في بعثة الملك عبدالله و من زماان و كلية البترجي في راسي لأنو اعرف وحده فيها و مررة تمدح فيها , استخرت كتييييير و كل شوية اطلع قرار جدييد شكلها حتبدا السنة و انا مو عارفة فين ادرس

[NNOOSH]

انا اقلك يا عسل مدام انك تبي علاج طبيعي ركزي اكتر علا البعثه وكلية البترجي واختاري اللي قلبك يرتاحلو اما جامعة الملك عبد العزيز ف اذا دخلتي مح تضمني نفسك اني تدخلي اللي تبي لانو لازم تدرسي سنة تحضيريه وتجيبي معدل وبعد مايجي الفرز علا حسب معدلك يحطوكي في التخصص اللي علا قد معدلك
ورغم دا كلو استخيري ربك كتير وقدمي علا اللي انتي ترتاحيلو وتحسي مناسب ليكي
اتمنا اني افدتك^_^

[bayan sait]

شوفي من ناحية ما اضمن العلاج الطبيعي ممممم ما اتوقع لأني الحمدللله احب ازاكر و اجتهد و اجيبها
و نفسي ادرس بررة بس خايفة من الغربة و البترجي بكرة رايحتلها

شكرااااا ننووش على رأيك

[NNOOSH]

طيب انتي كدا مرررا اوووك ما شا الله عليكي الله يوفقك وييسر امورك ويسعدك ياارب^^ ولا شكر على واجب كان مجرد ابداء رأي

[nona2009]

نصيحه مني روحي بعثه او البترجي حاجه مضمونه اما جامعه الملك عبد العزيز
في بنات تعبوا وزاكرا وجابوا معدلات عاليه ومافرقت الا فاصله ومادخلوا التخصص اللي يبغوا
وانتي استخيري وتوكلي ع ربك والله يختارلك الا فيه خير^_^

[bayan sait]

منجد هو دا اللي خايفة منو انو بعد التحضيري ما ادخل اللي ابغاه و حيكون ضيعت سنة عل فاضي
يلا نشوف البترجي

[rory55]

السلام عليكم..
أنا مع رأي البنات لا تدخلي جامعة الملك عبد العزيز عشان ما تغلطي نفس غلطتي
لأني قدمت في البعثات و في الجامعة بس جاء رد الجامعة أول وبعد ماوديت ملفي جاني القبول في البعثات
بس كملت في الجامعة وما دخلوني التخصص اللي أبغاه بس الحمد لله انقبلت تمريض وان شاء الله أقدر احول بعدين.
انتي شوفي اللي يناسبك وربنا يوفقك ان شاالله.

[bayan sait]

المشاركة الأصلية كتبت بواسطة rory55 السلام عليكم.. أنا مع رأي البنات لا تدخلي جامعة الملك عبد العزيز عشان ما تغلطي نفس غلطتي لأني قدمت في البعثات و في الجامعة بس جاء رد الجامعة أول وبعد ماوديت ملفي جاني القبول في البعثات بس كملت في الجامعة وما دخلوني التخصص اللي أبغاه بس الحمد لله انقبلت تمريض وان شاء الله أقدر احول بعدين. انتي شوفي اللي يناسبك وربنا يوفقك ان شاالله.

والله شكلها في الاخر حروح البعثة و ان شالله ربنا يسهل مع اني لسا مترددة خايفة اروح و ما اتأقلم اللله يسهل بس

[Dr~NanoOok]

أولا استخيري قد ما تقدري الين لما ربنا يختارلك الخير
واسعي واسألي عن كل الفرص اللي قدامك

ومن بعدها وبأي مكان ربنا حطك فيه.. فهو الخير لكِ باذن الله ^_^

أشوف أفضل الخيارات هي جامعة الملك عبدالعزيز
المهم انك تشدي حيلك في السنة التحضيرية.. وباذن الله حتوصلي للشي اللي تبغيه
وكتير سمعتهم يقولوا انها سنة سهلة للي عرفوا كيف ينظموا نفسهم ووقتهم ومزاكرتهم

وأنا درست سنة أولى في الكليات الطبية "قبل نظام التحضيري"
وكانت تشمل مواد السنة التحضيرية وباختلاف بسيط
وأعتقد كانت أصعب وأكثر تخصص في المواد الطبية بشكل أكبر

لكني أشوفها سهلة.. واللي يشد حيله يقدر يجيب فيها معدل مره عالي

فكيف بالسنة التحضيرية ؟

وهي من أفضل الخيارات.. وأفضل الجامعات بالمملكة والحمدلله
وفعلا مين قد اللي يدخل جامعة عبدالعزيز اليومين دي !


ولو لا سمح الله .. ربنا ما كتبلك تدخلي الجامعة السنة الجاية
تقدري تروحي البترجي وتحولي لها بدون ما تعيدي سنة أولى عندهم

لأن موادهم بسنة أولى زي مواد التحضيري..
مواد عامة من فيزياء وكيمياء و أحياء وانجليزي.. فيعادلولك هو

او تختبري اختبار واحد للقبول في البترجي
إذا نجحتي فيه.. على طول تروحي على سنة ثانية

صحبتي كانت في علوم في الجامعة
وما درست أحياء سنة أولى.. اختبرت اختبار القبول حقهم ونجحت فيه.. وصارت بسنة ثانية هناك

,

بالنسبة للبعثة ..
طبعا كتيرين حيقولوا الدراسة برا أحسن والشهادات أقوى و و و......

لكنها طبعا أصعب.. وممكن سنواتها أكثر
ممكن تقولي سنة لغة.. غير الغربة و التعوّد عليها << وصراحة جدا صعبه.. وكم واحده من صحباتي جربوا هذا الشي وفعلا عايشينها
وأعرف أن دراسة التخصصات الطبية بالخارج سنواتها أكثر من هنا
مثلا طب الأسنان في أمريكا دراستها 10 سنوات !

وأنا أشوف ان دراسة البكالوريوس الأفضل تكون هنا داخل المملكة
بعدين بالدراسات العليا الأفضل برا
ع الأقل يصير اتعودنا شوية على المناهج بالانجليزي وعلى نظام دراسة الطب ومناهجه

,’

وربنا يختارلك الخير فين ما كان

[bayan sait]

منجد حتى انا حاسه كده , حدرس إن شاء الله في عبد العزيز لأني مرتاحة ليها نوعا ما , و البعثة نفس كلامي احس اخليها للماجستير و الدكتوراه انشااالللله حأشد حيلي قد ما اقدر في التحضيري و الحمدلله واثقة من قدراتي و انشاللله اجيبها و ازا ما جبتها لا سمح الله وقتها انشاللله احول للبترجي شكرااا نانوك سبحان اللله تفكيرك نفس اللي بفكر في