(( الدورة التدريبية في مستشفى الأمل ومستشفى الصحة النفسية ))

[إيحاء المطر]

السلام عليكم ورحمة الله وبركاته

كيف حالكم أخواني وأخواتي الأخصائيين النفسيين


اتصلت ع المستشفيات أسأل عن الدورات التدريبية

وقلت أقول لكم ايش طلع معايا يمكن أحد يستفيد


في مستشفى الصحة النفسية :

التقديم من الآن

الدورة للبنات تبدأ 1 محرم

وللشباب تبدأ 6 محرم

والشروط لازم تكون متخرج


وطبعاً بدون رسوم

في مستشفى الأمل رحت وقالوا لي حتبدأ الدورة تقريباً آخر ذو الحجة

يعني إن شاء الله الشهر الجاي ( كانت في شهر 3 وقدموها )

بس التقديم لها من دحينة

والشروط لازم تكون متخرج

وأكيد حتكون بدون رسوم


موفقين أعزائي

دعواتكم

[zezoo911]

هل هذه الدورة لها علاقة بالتدريب ميداني (2) لمدة أسبوع ام هي فقط بعد التخرج واذا كان كذلك فكم مدتها

[إيحاء المطر]

لا مالها علاقة بمادة التدريب الميداني هادي للمتخرجين ومدتها 3 شهور

بس ممكن لو تبغى تتدرب عشان مادة تدريب ميداني تروح وتقول لهم

إحتمال يقبلوك واحتمال لا ..

بس إن شاء الله يقبلوك

لأنو الترم اللي فات ماقبلوا كل طلاب الانتساب اللي قدموا

بس عموماً انتا روح وشوف ايش يقولوا لك

أنا اتدربت الترم اللي فات في مستشفى الملك فهد

رحت قدمت عند دكتورة منى رئسية القسم النفسي هناك

وادربت عند الأخصائية أمل الجنيد وعند الدكتور سعيد الشهري

ومرررررااا كويسين وماشاء الله كريمين في الدرجات

بس أهم شي تحضر معاهم

أساساً دكتور سعيد قال لنا ليش مايجوني طلاب بس اللي يجوا طالبات

ماجاني إلا طالب واحد بس

طريقة التقديم روح مستشفى الملك فهد في العيادات الخارجية

اللي فيها عيادات الأسنان

ادخل جواا واطلع الدور التاني

ودور على غرفة وحدة التدريب والتثقيف وقول لهم انك تبغى تدريب للجامعة مو 3 شهور

لأنهم هما كمان يعملوا دورة لمدة 3 شهور للمتخرجين

وحيدوك ورقة تختمها من رئيسة القسم لو قبلوك

موفق يارب

[إيحاء المطر]

شباب بنات ملاحظة :

نسيت إني أقول إنو مستشفى الملك فهد يعملوا دورة تدريبية

بس ماادري متى وقتها اللي يبغى يتصل ويستفسر

كمان مدة الدورات في الأمل والصحة النفسية والملك فهد 3 شهور

ويدوك شهادة خبرة

[zezoo911]

يعطيك العافية أختي كفيتي ووفيتي وكثر الله من امثالك

[إيحاء المطر]

ربي يعافيك ويوفقك وييسر لك ولكل الطلاب والطالبات هنا

أشكرك لتواجدك

تحياتي

[lulumoon]

مشكورة جدا اختى هل هذه الدورة احصل بعدها على بطاقة الهيئة الطبيه وكيف طريقة الحصول على بطاقة الهيئة الطبيه ارجو افادتي بذلك وهل يدربوني ميداني 1 انا طالبة انتساب شكرا جزيلا وكيف يكون التدريب الميداني كيف الطريقة هل كاني موظفة ام تدريب مع اطباء

[إيحاء المطر]

المشاركة الأصلية كتبت بواسطة lulumoon مشكورة جدا اختى هل هذه الدورة احصل بعدها على بطاقة الهيئة الطبيه وكيف طريقة الحصول على بطاقة الهيئة الطبيه ارجو افادتي بذلك

العفو عزيزتي وماسويت إلا الواجب

بطاقة الهيئة الطبية ماعندي عنها أي خلفية

المستشفى بالتأكيد حيدوك شهادة خبرة

بس ماأدري عن الهيئة الطبية

انتِ لما تروحي تقدمي للتدريب اسألي رئيس أو رئيسة القسم النفسي

وإن شاء الله يفيدوك

وأي أحد من الإخوة عنده خلفية ياليت يفيدنا

المشاركة الأصلية كتبت بواسطة lulumoon وهل يدربوني ميداني 1 انا طالبة انتساب شكرا جزيلا

العفو قلبي ..

التدريب اللي تطلعوا فيه لمستشفى أو مركز تأهيل أو مدرسة ... إلخ

حيكون في مادة تدريب ميداني 2 الدكتورة اللي تدرسكم تتفق معاكم

ع المطلوب

أما مادة تدريب ميداني 1 مافيها تدريب عملي برااا

مجرد منهج تشرحوا لكم الدكتورة وحيكون عن الماقاييس وميثاق أخلاقيات الأخصائي

وفي مادة تدريب 2 حتطبقوا اللي أخدتوه في ميداني 1

يعني لو انتِ برا جدة .. وحتى لو في جدة

نصيحة مني لاااااااااااازم تحضري المادتين مع الدكتورة من البداية للنهاية

ولازم تبذلي جهد وتجيبي درجات عالية ماتكون أقل من 80 أقل شي

عشان المادتين مهمة للتوظيف لو تبغي تتوظفي

ومهم انك تحضري الشرح

ويابانات تدريب ميداني 1 و2

خدوه مع دكتورة مريم عثمان أو دكتورة إيمان عبدالحليم

نصيحة لوجه الله

المشاركة الأصلية كتبت بواسطة lulumoon وكيف يكون التدريب الميداني كيف الطريقة هل كاني موظفة ام تدريب مع اطباء

التدريب على حسب المستشفى

في البداية إحنا شرحوا لنا بعض المقاييس

بعدين صرنا ندخل معاهم كل طالبتين أو تلاتة في العيادة

المفروض مايدخل مع الدكتور في العيادة أكتر من 2

بس عشان زحمة الطالبات والضغط

ممكن لو كان في وقت يخلوك تتعاملي مع المرضى برضو

على حسب المستشفى والأخصائي والوقت

في الصحة النفسية بنات طبقوا على مرضى

ولو كان مافي مرضى ممكن تطبقي عليهم

الدكتورة ماحتقول لك لا ولا ليش

تقول لك احضري في المستشفى ولو مافي مرضى

طبقي المقاييس على أي أحد المهم إنك تطبقيها

لاتخافوا في دي الناحية إن شاء الله راح يسهلوا لكم

موفقين يارب

ولاتنسوا تدعوا لي بالتوفيق في آخر ترم ليا إن شاء الله

[وهج المشاعر2009]

جزاك الله خيـــــــر

[إيحاء المطر]

المشاركة الأصلية كتبت بواسطة وهج المشاعر2009 جزاك الله خيـــــــر

هلابك ياعسل وربي يجزيك كل خير انتِ كمان

معليش قلبي ماأقدر أرد ع الخاص لأنو عدد مشاركاتي قليل

والصراحة الأرقام دحينة مو معاية ..

بس أنا اتصلت على 905

وطلبت منهم

يعني انتي عادي اتصلي على 905

واطلبي رقم المستشفى اللي تبغي

بعدين اتصلي على المستشفى

يقول لك ادخل رقم التحويلة أو صفر للمساعدة

اضغطي على صفر واستني لمن أحد يرد عليك

وقولي له حولني على وحدة التدريب

وهواا يحولك

ولمن يردوا عليك وحدة التدريب اسألي اللي تبغي


موفقة قلبوووو

وأي خدمة تانية أقدر عليها تبشري إن شاء الله