تجربتي من خطه ب مضمونه 100%

[dr.ro0ody]

سلام
كيفكم ان شاءالله طيبين

قبل ماأبدأ في حاجه وعشان ماتتشتوا انا بشوف طالبات كتير خايفين من خطه ب والاحياء
انا الحمدالله اخدت في الكيمياء 97 والاحياء 96
عشان كدا حابه اقولكم طريقه مزاكرتي وحابه افيدكم كيف كنت برتب الوقت ___ واكيد دحين ناس كتير خلصت الانجليزي عشان كدا عندكم وقت فاضي كتير

اول ماده_ الكيمياء_ هادي الماده جدا سهله وحلوة وممتعه وانتوا بتزاكروها بس عيبها طويله شويه
والمنهج حق الماده نفسوا حق التنوي خصوصا حق تالت السمستر الاول اللي بيتكلم عن الاتزان والحاجات اللي بتأثر على التفاعل الكيميائي هادي تاخدوها في الشباتر الاخيرة
الماده يحتاج لها اول أول لانو ابدا مااينفع بتراكم عليكم المنهج مررة طويل وهادا عيب الماده
وحتى لو تركتوه لحد قبل الاختبار بأسبوع كمان ماراح تمشوا فيلوا
الكيمياء بيحتاج دكتورة كويسه انا كونت عند د. هنادي جدا رائعه في الشرح __ بتشرح من السلايدات __ وقت المحاضرة حاولوا تشغلوا جميع حواسكم فتحوا عيونكم كويس افهموا كل حاجه تقولها الدكتورة اكتبوا معاها كل حاجه بتقولها مو واضحه في السلايدات في هامش كدا على جنب
اكيد عارفين المدرج اللي في مبنى 3 دايما ناخد فيها المحاضرات
انتوا حاولوا تجلسوا قدام في اول صف او التاني او التالت بالكتير وازا مااحصلتوا مكان عاادي اجلسوا في الارض فوق الدرجه الاولى
عادي حبيباتي لاتستحوا انا يوم المراجعه لقيت المدرج مليان جلست في الارض << أكييد عرفتوني
مصادر مزاكرتي اول حاجه السلايدات مع الدكتورة وتفهموا كويس بعدين لما ترجعوا البيت تزاكروا المحاضرة كويس وترجعوا لملخص السيد انا كونت بزاكر من الاتنين
وخصصوا 3 ساعات يوم الخميس او الجمعه راجعوا فيه الشابتر كامل بكل حاجه
يسير يوم الاختبار خلاص انتوا فاهمين كل حاجه بس تتطلعوا على اكبر عدد من النماذج وتحلوا بيدكم كتير
وانا بضمن لكم 95
اتكلم على اختبارات الكيمياء كانت سهله وحلوة بس الميد التاني يبغالوا تركيز شويه اكتر من الاول
وطبعا الفاينال راح يدخل معاكم جميع المنهج كامل فلازم تختموا من اول


ماده الاحياء _اللي للأسف انخسف منها طالبات كتير
المزاكرة من السلايدات وبس تحملوها من الموقع ___ لازم تخصصوا يومين في الاسبوع تزاكروا فيها احياء بس
المنهج طويل وماينفع يتزاكر قبل الاختبار لانو دش شويه
البنات اللي ماعندهم انجلش استغلوا الفرصه وزاكروها في الصباح بعد الفجر لانو من جد بتحسوا الوقت طويييل والعقل في الصباح استيعابه اكتر __ انا كنت بعمل كدا لانو بدأت بليفل 4
وفعلا كنت بحس المعلومات تتثبت بسرعه في الصباح وهدوء وتزاكري براحه نفسيه
لاكن بعدين لمااخدت الانجلش سرت بزاكرها في الليل واللهي كنت بحس بجد انو مااحفظ بسرعه
ولازم يوم الخميس او الجمعه كدا يوم تصحوا بدري وتراجعوا اللي زاكرتوه طول الاسبوع عشان المعلومات تتثبت اكتر واكتر
وشي طبيعي لما تزاكروا تحسوا انو المعلومات كتيرة وتتلخبط في بعض وممكن تيأسوا
حابه اطمنكم انا كونت بحس نفس الاحساس لكن اضغط على نفسي واكمل عايدي __ ولما اراجع يوم الجمعه خلاص اطمن واحس المعلومات الحمدالله تثبتت
وفيه حركه كونت بعملها كانت تنفعني كتير انو وانا ازاكر كونت اكتب المصطلحات في ورقه واترجمها واخليها في الشنطه ___ وفي الصباح وانا رايحه الجامعه بدل ماتروح نص ساعه كدا ع الفاضي ونحن نطالع في الشوارع على الفاضي طلعوا الورقه واقرأوها مجرد قراءه اعملوا هادي الحركه مع كل شابتر وفي كل صباح
صدقوني راح تحسوا انو المنهج يتسهل عليكم كتير
والاسئله ابدا لاتشيلوا همها نفس السلايدات وسهله ومباشرة
بالنسبه للبونس كان بس في الميد الاول 5 بونس وبعدين ماعد فيه بونس

ماده _ الاحصاء _ ماده سهله وحلوة وخفيفه تقريبا هيا اخف ماده في الخطه __ انا للأسف اخدت فيها b __ مع انوا كان الميد الاول عالي والتاني فل مارك وكونت بدون مبالغه متوقعه +a
لاكن الله يسامحهم كان الفاينال بالمررة صعب 20 سؤال تنحت عندهم وماادري واخترت اجابات كدا من راسي و15 سؤال متأكده منهم و5 اسئله كونت شاكه فيهم
عشان كدا لازم تجيبوا درجات عاااليه في الدوريات لانو بجد فرصه كبيرة

المزاكرة طبعا وقت المحاضرة لازم يكون الكتاب معاكي وتفهمي كويس وتكوني عند دكتورة كويسه انا كونت عند د. فاتن
شرحها ماشاءالله جدا رائع وحلو
حاولوا تفهموا معاها كل حاجه وتكتبوا معاها الاشياء المهمه ولما ترجعوا البيت تزاكروا من الكتاب وملخصات السعدي
واكيد لازم بعد ماتخلصوا كل شابتر تراجعوه من البدايه
انتم لما تراجعوا طبعا من الكتاب وملخصات السعدي لاكن بيكون التطبيق من مخلصات اشرف بركات
لانو بيحل اسئله كتير وفيها افكار ومشابهه للأختبار

ماده الانجليزي _ انا بدأت من ليفل 4 مااعرف اللي قبلوا
لاكن كانت ماده حلوة وتحسوا انكم بتقرأوا قصص اطفال
ابدا لاتشيلوا همها بس القرامر شويه يبغالوا تركيز ومزاكرة لاكن الفوكاب والاشياء الباقيه بالمررة سهله وحلوة

واهم حاجه لاتخافوا وتقلقوا وتفكروا في المعدل لانو بتزيد الضغط والتوتر نفسي
وكل حاجه مكتوبه ومقدرة ولاتزعلوا ازا جبتوا درجه مو كويسه هادي خيره من ربي وهادا نصيبك وهادا المكتوب لكي
وازا حسيتوا بتعب واكتئاب انصحكم ب صلاه الليل وقراءه القران الكريم صدقوني راح ترتاحوا كتييير ___ وتزكروا انه انتوا في نعم غيركم بيتمنوها
ماراح تنفعنا الدراسه ازا كنتي على السرير تعبانه اهم حاجه الصحه والعافيه هاادي تكفي
والدراسه ان شاءالله مقدور عليها

لا أريد سوى دعواتكم ليا بالشفاء العاجل

[طموحاتي نطحت السحاب]

الله يوفقك وتتدخلي اللي تتمني
كنت مرررة خايفة من خطة ب بس ان شاء الله حمشي على نظاااااااااااااامك<<< ..ونكون سوى بالكوت الابيض نسوي كداا

[دره جده]

بالتووووووفيق .. وربي يكتبلك الشفاء العاجل..
اخخخخخخخ ياليت عرفت دي المعلومات لمن كنت بخطه ب ..هع <<وش تبغي خلاص مكتوب عليك

[املي بك يالله]

الله يشفيك عاجلا غير اجل
ويوفقك يااااااااااااااااااارب

مشكوورة عالمعلومات

قلبو انتي بالشرفيه ؟؟؟

[dr.ro0ody]

الله يعطيكم العافيه ___ وتسلموا حبايبي على الدعوات الحلوة
وهاادا واجبنا هنا في المنتدى نفيد ونستفيد
والحمدالله كنت مرتاحه في خطه ب ودرجاتي تمام ف حبيت افيدكم باللي اعرفوا

المشاركة الأصلية كتبت بواسطة املي بك يالله الله يشفيك عاجلا غير اجل ويوفقك يااااااااااااااااااارب مشكوورة عالمعلومات قلبو انتي بالشرفيه ؟؟؟

امين وياكي يارب

ايوا بالشرفيه يا الغلا

[عمه دادا]

اااااااااااااه حتى انا خااايفه كتييير من هالخطه بس ريحتيني الله يريحك دنيا واخره .

[اللؤلــــــــؤة]

مشكورة على الموضوع المفيد ...تمنياتي لك بالشفاء

[M!SS Lara]

مشكورة حبيبتي مره استفدت كتير كتيييييير الله يوفقك يارب ويشفيكي الشفاء التام

[Dr. Abdul]

ربنا يوفقك ويشفيكي يااارب


دوبها اتضحت الامور عندي كنت خايف جدا

[قطرات ظمــآ]

ما شاء الله تجربة ناجحة ...
راح ارجع اقرا الموضوع مرة ثانية عشان ارتب افكاري واحدد مصادر مذاكرة كل مادة