ساعدوني في اختيار التخصص بلييييز

[بيتر جدة]

السلام عليكم ورحمه الله وبركاته


كيفكم يامهندسين


حبايبي انا طالب في الترم الرابع في الكليه وطبعا في الترم الثالث طلبوا تقديم التخصصصات


وانا ما قدمت مشيت على كلام ( عبدالعزيز التيفوتي) قالي لا تقدم دحين لازم تخلص المستوى الثاني في الكورس الانجليزي


المهم اصحابي قدموا وانا اتحنط مزبوووووووط <<<يلا الحمد لله حصل خير



لاكن ياحلوين انا دحين محتار في اختيار التخصص


انا كان في بالي كيميائيه من زمااااااان , بس العيال الخبره في الكليه يعني اكبر مني بسنين يقولولي

الكميائيه مالها مستقبل او بالاصح مستقبلها تعتمد على معدلك


ونصحوني اني ادخل ( بور كهرباء) يقولوا المستقبل فيها


واانا بصراحه مررره ما احب الفيزياء , وخايف ادخل تخصص البور وما امشي فيه


تكفوووووووووووون ساعدوني والله اني مررره محتار

يوم كهرباء ويوم انتاج ويوم كميائيه , وانا من اايام الثنويه كنت ابغى كميائيه بس دحين خفت


يلا مستني ردودكم الله يخليكم ,, واذا احد شايف تخصص فيه مستقبل وحليو يقلي



..... تحياتي , بيتر جدة,,

[dre]

كل تخصصات الهندسه لها مستقبل
انا عن نفسي اميل للمدنيه عشان كدا دخلتها
انت شوف ايت تخصص اقربلك راح تبدع فيه حتى لو صعب

كتر طلاب زي حالتك ما يعرفو يحددو ايش يبغو
لكن حط في بالك انو التخصص زي الزوجه ههههههه
يعني راح تفضل فيه طول العمر ( لو كملت )

[eng.am]

الكيميكال مالها مستقبل << عيال الخبرة مييييين ولد خالي متخرج من الكيميكال ومعدله 3.00 والان متوظف في أكبر الشركات ومع أحلى راتب ..

بما إنك تحب الكيميكال خشها ولا تحتار ولها مستقبل على امتداد البصر

[مالك معاذ]

والله كيميائية حلوة وياكثر شركات البتروكياويات عندنا

وراح تزيد هذه الشركات اكثر واكثر مع المدن الاقتصادية

بس عيب الكيميائية الوحيد بوجهة نظري هو ان العمل والوظيفة غالبا بره جدة

وبالشرقية او ينبع غالبا

اما من ناحية الوظيفة فالرزق بيد الله وما اتوقع انو راح تواجه مشكلة

لكون الطلب عليها عالي برأيي الشخصي

[* تركي *]

/

شُوف يـَ الغآلِي ، دآئِماً فِي اختيآر التَخصص " اتبع مُيولك ، قُدرآتك ، اهتمآمآتك " ،’..

لـِ أنه اذا دخلت تخصص ترغب فيه ، صَدقني سـَ تُبدع ، وَ اذا العَكس دَخلت تَخصص مآ يتنآسب مَع قُدرآتك وَ مُيولك

مآرآح تِمشي فيه إِلآ " بـِ صعوبة " ،،

أَمآ مِن نآحية مُستقبل الكِيميآئية ، أنآ أَعتقد ان مُستقبلهآ مُمتآز وَ متوفر ، الآن عندك جبيل الصنآعية + ينبع الصنآعية ، وَ الكثير مِن الشركآت بَل أَغلبهآ تطلب مُهندسين كيميآئيينْ ،’

تُوكل عَلى الله ، وَ لآ تَشيل هَم المُستقبل عَلى أَكتفآك ، رَكز بـِ الدرآسة وَ المُعدل أولاً :)


مُوفق

::

[صقرر]

خير الكلام ما قل ودل

عزيزي امشي على كلامك انت اولا واخيرا

اذا انت تبي كيميائية ادخلها وما عليك من كلام الناس

الهندسة كلها لها مستقبل وظيفي رائع جدا بس انت شد حيلك

الناس تتكلم وتقول الباور افضل تخصص !!!

على عيني وراسي بس هذي مو رغبات كل الناس صح ولا لا ؟


توكل على الله اخوي

[الخيال@]

ياحبيبي سيبك من كلام الناس كلامهم كتير وفاضي الواحد يدخل تخصص مو ميوله ويقول صعب وماله مستقبل ويكون معدلو طايح اكيد راح يتعب في التوظيف حتى الكهربيه لو طلعت بمعدل طايح راح تتعب في التوظيف
ياخوي ترى الكيميائيه حلوه ومستقبلها جدا رائع وكمان الترم هذا جا عليها طلب غير طبيعي لدرجه انها قفلت معدل عالي
ياخوي انت تبغى كيميائيه توكل على ربك وصدقني راح تنبسط لانك تحب التخصص هذا:)
كل اقسام الهندسه واعده بلا استثناء:)
وبالتوفيق

[تهندسي تكهربي]

اهم شي رغبببببببببببتك..
صدقني لو شخص دخل اي تخصص في الجامعة مو شرط في الهندسة حتى لو كان هذا التخصص انقرض من زماان وهوا رغبان فية صدقني راح يبدع ويتميز ...وراح يحصلوو احلى وظيفة بسسب ابداعو في هذا التخصص ..
رغبتك كيميائيه ادخل كيميائية .. صدقني راح تشبع رغبتك بتميز وابداع ((( اسأل مجرب )))...

[samo5611]

الشباب كفو و وفو
بس حاب اضيف شي اذا انت متعلق بالكيميائية صدقني انك راح تبدع بالمكان اللي انت مخطط عليه واذا انت مو حاب القسم اللي انت داخلوه صدقني راح تمشي وانت قرفان وتكره حياتك يعني بالعربي اتبع ميولك وربي يوفقك بس برضو لاتستعجل واسال اهل الخبرة علشان تدخل على اقتناع تام وربي معاك

[ابداع]

انت اللي تختار تخصصك .. ولا تسمع كلام الناس ..

شوف سابك وارامكو اكثر الطلاب اخذوهم من الكيميائيه ..

عشان كذا لا تصدق اللي يقول مافيها مستقبل ..

والانتاج والكهرباء والكيميائيه كلها من نفس المستوى ..

كلها مضمون مستقبلها بأذن الله ..

اذا انت ما تحب الفيزياء والرياضيات فما انصحك تدخل كهرباء ..

تحياتي ..