السنة التحضيرية .. مين قال انها تعجيزية ؟! لدفعة 14 حدد سنتك بنفسك...

[An Engineer]

بسم الله الرحمن الرحيم

سنة مرة كلمح البصر , افتكر لمن سجلت واستلمت البطاقة واول يوم دوام , بالفعل ايام ولحظات اروع من رائعة

انا متاكد انكم كنتوا زينا في قمة التوتر والخوف من السنة دي , لكن اخواننا دفعة 12 ما قصرو معانا كانو جدا مساعدين .. شكرا ليكم يا دفعة رقم 12

راح ادخل مباشرة على الموضوع الاهم من دا لكـو :-

السنة التعجيزيــــــــــــــــــــــــــــــــــــــــــ ـــة !!
انتبه من دي الكلمة .. انا ابغى اعرف مين جالس يقول انها تعجيز كنت كتير اسمعها وانا في مثل وقتكم
كنت جدا خايف من ىهنا وهناك لكن كان في ناس ابطال يحمسوك عشان تدخل عالم التحضيري ...

السنة دي عبارة عن مراجعة عامةو لما في المرحلة الثانوية وانا متاكد تماما مع المناهج الجديدة انتو راح تحسوها عاااااادية جدا .. انا العت على مناهج التانوية جدا جدا مطابقة لما في التحضيرية لذا ابتسم وتفائل تخويا واختي


يلا نبدا بشرح بسيط وهوا عبارة عن تكرار لما فعلوه اخواني الغالين

السمستر الاول :- الخطة ( أ )

عبارة عن اربع مواد ___ بدون الانجليزي

نبدا 1) بالحاسب الآلي / من اجمل المواد بصرااحة وهيا كما قلت تكرار لما في الثانوية منى اكسل و وورد و اوت لوك و بوربوينت ...الخ
دي المادة الاستاذ لو دور كبيير فيها , يساعدك ويفهمك ويعلمك اشياء زيادة اذا تبغى يعني استمتاع
الاختبارات / دوريين من قسمين نظري و عملي ؛ النظري لابد تكون فاهم العملي مو تعاريف ولا تعداد فقط ، راح تحصل اسئلة في اختبار النظري على القسم العملي ! مثال ( في برنامج الوورد هذا الاختصار ctrl + c يدل على ---> النسخ وهكذا )
الدكاترة / انا درسني دكتور ارفع له قبعة الاحترام واسمو "ماجد عبد الخالق الششتاوي " جدا زبييييط وخلوق وكل حاجة وفي العملي الدرجات مرا يساعد ..
طريقة المذاكرة / امممم قبل الاختبار بيوم او يومين كنت امسكها لانو الدكتور كان يفهم صح واديها ساعة في الاسبةع قرائة واستذكار .


2) مهارات الاتصال / مادة مسلية وحقت فرفشة ومراجعة لتعاليم الدين الحنيف وطرق التواصل مع المجتمع وكيفية تطوير الذات وتحسينها وكيف تقدم خطاب سيرة ذاتية ومن دا القبييل ..
كمان اذا دكتورك كويس ي سلام يعلمك ويديك اشياء نايس ويخليك تسوي مشاركات ونقاشات ويعلمك كيف تتحدث بطريقة جيدة ولبقة ...
الاختبارات / مافي دوري اول ، في دوري تاني وعمل تسويه بسيييييط جدا يطلابوا دكتورك ويختلف من واحد لتاني وعليييه 30 درجة وهيا بيين يدينك ؛ طريقة الاسئلة جدا جدا سهلة وبسيطة ممكن تحله من غير مذاكرة ... ههه مو لدا الدرجة .. لا بالفعل اسئلة جدا سهلة وخلي احد ما ياخذي فيها ( a+ ) اقلك على حاجة الاختبار النهائي جدا اسهل من الدوري وكمان ركززز على اسئلة الدوري جاني كتير منها في النهائي ..
الدكاترة / تقريبا الجميع في مستوى واحد ..
المذاكرة / قرائة فقط مرة في الاسبوع .. من جد المادة سهلة ولا تخافوا منها


3) الرياضيات Math 110 / مادة رائعة تتحدث عنما تم اخذوا سابقاً راح تاخذو : مجموعات الاعداد ، معادلات الدرجة الاولى والتانية ، الدوال ، اللوغاريتمات ، النهايات ، الاشتقاق ، نظرية لوبيتال...
دي الامادة اعتقد انو الدكتورة او الدكتورة لو دور فيها كان دكتوري الله يهديه ويصلحو مش ولابد كنت احضر ابغى افهم من قلب لكن للاسف اخرج كثيرا منكسر القلب ، لكن مو معناتو انك توقف وتقول صعب مستحيل x هذا خطا اتشجع وتفائل فالمنهج جميل لابعد الحدود ...
الاختبارات / كلو سهل لكن في واحد لابد يجي شوية مو كتير صعب لاثبات الطلبة
الدكاترة / البرفسور الجميل والطيب " حمزة ابو جبل " روح عندوا لو ايش دا منسق المادة وشرح عسل فرفشة وتفهم ويديك طرق ويا سلام ..
في واحد كمان اخلاق جدا جدا عالية اسمة " عزة " دا رحت عندو في القسم كم مسالة ساب شغلوا وجلس يفهمني والشباب ممكن درسهم
المذاكرة/ لابد تنزبط جدولك اسبوعيا دي المادة انصح بشدرة انك تفهم الدرس وتاخذ كم مسئلة وخلاص ترسخ كمان تاخذ مفكرة ابو جبل مليانة مسائل وافكار وعلى فكرة ترو جدا هامة


4) الفيزياء العامة Physics 110 / من اكثر المواد اللي يخافو منها الطلبة ويتعقدوا منها و فيها اشاعات خصوصا في النهائي ،، المنهج عموما يتحدث عن الوحدات العالمية ، قوانين السرعة ، المقذوفات ، قوانين نيوتن ، الشغل والطاقة ...
للاسف دكاترة القسم نعاني منهم لكن كثير جدا اثبتوا جدارتهم وبسهولة ، المادة ما في كتاب محدد وكل دكتور يشرح اللي عندوا ممكن تحصل معلومات عند زميلك جديدة ولا طريقة حل غريبة لا تتفاجئ خليك عاادي ..
الاختبرات / ما تقدر تحكم في دي المادة صراحة مرا يجيك معقد ومرا سهل ومرا متوسط واسئلة جديدة لكن تقدر تحلها وانا ماني جالس اخوف لا لا لكن جالس احمسك انو تدرس وتفهم من قلب مو تحفظ فقط ( بلييز لا احد يزعل )
الدكاترة / لا يوجد احد تمدحوا 100% ،، لكن في المنسق ( فرج الحازمي ) كانوا يقولون مو كويس لكن حظرتلو وطلع بالنسبة ليا ممتاز
كان يدرسني البرفسور ( طلال الحربي ) مو مرا لكنوا طيب ويزعق شويتين انا انصحك انو تحول من عندوا ، لكن مو معناتو انو جدا سيئ لا لا كان يفهم لكن الاختبار بطريق والكلام في طريق
المذاكرة / عليك ثم عليك بالملخصات جدا مفيدة

-------------- انتهت الخط -------------

السمستر التاني خطة ( ب )
عبارة عن ثلاث مواد_____ بدون الانجليزي


1) الاحصاء Statistics 110 / مادة سهلة جدا واحلى حاجة فيها سرعة فهمها ,, المادة تتكلم عن التوزياعت ومبادئ الاحصاء والاحتمالات بانواعها ...
المادة دي لا يحتاج بها ملخص ولا انصح به فالملزمة جدا كافية ومبسطة لابعد الحدود ..
الاختبارت / انا اعتبرها كانك جالس تلعب مع صاحبك سوني اولاين
الدكاترة / روح عند المنسق ( عبد القادر داغستاني ) جدا طيب وشرح جدا عالي
الدكتور ( احمد العم ) جدا فرفوش وحبوب و الاهم من ذلك شرحوا يشرح باسلوب رائع ويديك امثلة من حياتنا اليومية مية مية الدكتور دا
المذاكرة / رتب جدولك وما اعتقد تاخذ وقت كثير منك



2 ) الاحياء Biology 110 / مادة الطلاب يعتقدوا بانها مستحيلة لكنها حقيقتا ممتعة وتقدر انو تذاكرها ، المنهج يتكل عن مقدمة في الاحياء ثم الخلايا ثم التنفس ثم الاجهزة ثم التكاثر ثم الوراثة ....
المادة كثيييييييييرة الاشاعات انتبه !! خليك ماشي مع دكتورك ،، المادة لا تحتاج ملخص والمنهج واحد وثابت وهوا عبارة عن سلايدات بالانجليزي ومترجم بالعربي لكن ركز على الانجليزي لانو الاختبار كلو انجليزي
الاختبرات / المادة مافيها درجات زيادة لكن يحطون اسئلة يجي منها بالاختبار والاختبار انتا مو حافظ ماراح تحل فلذلك خليك مذاكر صح
الدكاترة / مع الدكتور ممكن ما راح تفهم فخليك دكتور نفسك في البيت اقرا السلايد تفهمه على طول
المذاكرة / خصص وقت لها وياريت يكون كبيير وما يكون ظغط عليك لانو المادة مو تعجيز



3) الكيمياء Chemistry 110 / مادة اعتبرها من اجمل مواد التحضيري خصوصا دكاترتها جدا رائعين ,, المنهج عموما يتكلم عن مقدمة في الكيمياء ، معادلات ، كيمياء عضوية ، الروابط ، العناصر ، الجدول الدوري ، الاحماض والقواعد .....
المنهج مشكلته مافي منهج معين لكن في كتاب مسوينو القسم لكن ايضا ينقسه اشياء فانا انصح بسلايدات المنسق فهيا الاختبار لا يخرج منها ابداً
الاختبارت / سهلة لكن كم سؤال للطلبة الفاهمين مو مرا كثير ممكمن من 2 الى 3
الدكاترة / اولهم المنسق ( سالم باواكد ) جدا اخلاق و طيب ويضحك في المحاضرة وشرحوا جيد وعليك بملخصه ..
الدكتور الكبيييييييير ( ياسر العنقري ) انصحك به وبشدة كمان انسان عاجز عن وصفه شرح 100% ومهما تسال لا يمل و اخلاق عالية وعندوا زحمةن شديدة وانصح اول يومين تحول عندوا لانك راح تنبسط
المذاكرة / كنت من دفتر العنقري لانو يكتب على السبورة وجدا كافية


------------------- انتهت الخطة ------------------

هنا نضع ما يتعلق بالملخصات : -

الرياضيات / عليك بملخص المنسق اللي هوا الاسئلة ، اذا حبيت كمان حق جمال السعدي جيد تحصلوا في مكتبة 2000 في شارع السليمانية .

الفيزياء / عليك باشرف بركات انا كنت ادرس منو واستفدت جدا هوا يكتب الملخص بيده واذا ما حبيت عندك احمد العربي و يوسف زويل كلهم صراحة جيدين .

الاحصاء / لا تفكر بملخص .

الاحياء / مافي الا السلايدات وفقط .

الكيمياء / عندك السيد يديك بنك من الاسئلة وجدا حلوة فيها الصعب والسهل لكن اعتقد انك تحتاج تروح عنده عشان يديك اشياء مو في الملخص بس مو لازم ، ايضا عندك يوسف زويل جيد الاخ .


اذا تبغون ايت حاجة او خدمة نحن جاهزون

اخيرا اخي طالب/ـة السنة التحضيرية اغتنم سنتك فهي جدا جمييلة و ممتعة ونستنى اعلى الدرجات وارقى التخصصات وكل ماتتمنوه وانصحكم نصيحة اخيره اختبار الدوري الاول جميع الطلاب لسى يفكروا انهم لسى في الثانوية لابد تستعد وتذاكر لانو اتلطشنا فيه ودخلنا وحنا مرتبكين وخايفين فانصحك تعلم من التجارب فيها مفيدة وكمكان عليك بالنماذج القديمة فهي مهمة ومطابقة لفكر الاختبار .... لا تنسونا من صالح واطيب دعائكم اخوتي ,,, والسلام عليكم ورحة الله وبركاته