نصائح لاختيار التخصص^_*

[dona-kun]

السلام عليكم يا عسولين
اليوم ابغى اتكلم عن موضوع مخوفنا كلنا اللي هو التخصص


ايش ادخل تخصص؟ ايش احسن تخصص؟ ايش اللي فيلو وظايف؟ ايش اللي مرتبو حلو ؟

اسئله كتيرة تدور في بالنا ومحيرتنا كتير لانو تقريبا دا هوا اول قرار ناخدو احنا لوحدنا كراشدين وهو اللي راح يحدد هويتنا ونظام حياتنا الجاي
اول شي اكيد كلنا كان عندو فكرة عن التخصص اللي يبغاه تقريبا من التانوي او اول السنه دي عالاقل
وبعضنا كان عندنا احلام بس معدلنا خاننا ومنعنا من تحقيقها
انا راح ابدأ بالاسئله اللي كتبتها واحللها
1- ايش اختار تخصص؟
انا انصحكم تسوو اختبار عالنت يحدد التخصص اذا ماتبغو ومو واتقين في الاختبارات حكموا عقلكم مو مشاعركم ورغباتكم صح حلو تدخل التخصص اللي تحبو بس الاحسن كمان انك تشوف قدراتك وايش الشي اللي انتا تحس انو مخك يعطي فيه عشان ان شالله تبدع فيه

2- ايش احسن تخصص؟
ابغى اقولكم حاجه ماااااااااااافي شي اسمو احسن تخصص ولا اسمى تخصص يعني اذا جيت للحق يمكن اهم تخصص نظريا هو التعليم (قم للمعلم وفه التبجيلا كاد المعلم ان يكون رسولا) يعني كم واحد فينا سبب تأخرو في عدة مواد هوا التدريس الضعيف اللي لقيه فالمعلم لو صلح تصلح معاه كل الاجيال اللي يدرسها ولو تنح يطلع
ناس متأخرة خلقيا وعقليا
فلو جيت للواقع كل تخصص لو رسالة ساميه ومهمه جدا في الحياه يعني اللي يقولك احسن شي متلا الطب(لاتقوموا عليا ياطلاب الطب دا بس متل والله) لانو انقاذ حياه البشر فيروح كل واحد شاطر يدخل طب وتخيل يسيرو كل العالم دكاتره طبعا راح تسير الدنيا خالية من الامراض حلو صح
يعني .... لانو بيني وبينك ايش فايدة الصحه من دون عقل مستنير اش فايدة الحياة اذا مافيها دين وعلم ورياضيات ونت ماتسوى تنعاش صح

3- ايش اللي فيلو وظايف؟
ابقول اقول كلمه شويه قويه بس بلاش زعل بطلو فكر الفقر دا
ايش وظايف دي صدقني لما تدخل اي تخصص وتبدع فيه اول شي الجامعه راح تعرض عليك وظيفه
وكل الوظايف راح تفتح ابوابها لك لو كنت شاطر صدقني مافي انسان متفوق في مجال عملو يعيش عطلان
طب افرض صرت مدرس ومالقيت وظيفة لو تحب شغلك من جد راح تدرس خصوصي وتجيلك فلوس وتساعد الناس في طلب العلم يعني حتى لو الفلوس مو مرا كتير راح يكون اجرك عظيم عند ربي لانك علمت شباب المسلمين ودا اهم من اي فلوس واش دراك يمكن تخترعلك اختراع او تطلعلك نظري ويعطوك جائزة ماليه تعيشك العمر كلو مرتاح( ترا مو صعبه علينا احنا السعوديين يجي مننا احسن)

4-ايش اللي راتبو حلو؟
شوف طبيب في مستوصف كم راتبو ودكتور في الجامعه تخصص دراسات شرعيه كم راتبو ؟ طبعا الدكتور في الجامعه احسن كيف وهو دراسات شرعيه؟؟ لانو متفوق
فانتا لما تكون متفوق تعتبر مكسب لسوق العمل
وصدقني راح تتنافس الشركات على توظيفك باعلى الرواتب وشوف ياخي حق شركة مايكروسوف bill gates
اذا ماتعرفو انا اقولك مين هوا (اغـــــــــنـــــــــــى رجل في العـــــالم)
وهو اصلا ماكمل دراستو الجامعيه
ليـــــــــه تتوقع عندي مال قارون وهو حتى شهادة جامعبه ماعندو؟؟؟
لانو عرف الشي اللي يحبو واللي هو مبدع فيه وراح واشتغل عليه
وهو اول مابدي الناس ماكان في شي اسمو لابتوبي ولا كمبيوتري كانت الكمبيوترات ما تنلقي الا في الشركات ومايستخدمها الا واحد محترف
بالعربي لو انتا شاطر في قص الشعر الفلوس حقتك راح تكون احسن من عالم صورايخ فاشل
اذا دا الكلام كلو مانفعك انصحك قبل ماتدخل التخصص تفكر ايش هو اللي محتاج لو ديني ثم بلدي اكتر شي
يعني تحس انو مررا البلد متأخره فيه او معتمده عالاجانب فيه ماتدري يمكن يكون عل يدك اول شركة سيارات سعوديو ولا اول نظام تشغيل عربي ولا اول رائد فضاء ولا توجد علاج للسرطان
صدقني مو صعبة بس يبغالها جهد حبتين اجدادنا سوو الاحسن من قبلنا وان شالله احنا نكمل المشوار

تانكيو حبايب

واتمنى الله يوفقكم في اللي تبغوه