الاحياء:الاختبار و الطريقة التي اتبعتها ^^

[BBS]

بسم الله الرحمن الرحيم
السلام عليكم و رحمة الله وبركاته

طبعا الكل عارف انه اليوم كان اختبار الاحياء 110 للاولاد الساعة 9 الصباح
و الاختبار كان كثيرين زعلانين منه و متضايقين و يقولوا انه جاء صعب
اختباري كان المجموعة D و انا ما ادري هل كان سهل او متوسط لكن في كم سؤال مكرر بين النماذج

عموما...انا حمد لله حليت كويس و حسيت اني بدعت
طبعا في كم سؤال مالهم داعي و كم حركة لف و دوران ما يجيبها الا حريفة الانجليزي (مع العلم اني لفل 4)

انتم يا البنات اختباركم جاي بعد كم يوم >>>معرف متى بالضبط و غير مهتم اعرف
ففكرت اكتبلكم طريقتي بمذاكرة الاحباء و ايش جاني بالاختبار
----------------------------------------------------

طريقة المذاكرة
ــــــــــــــــــــــــــــ
بالنسبة لي انا تعبت من الاشاعات و الكلام الفاضي اللي يطلع كل مرة
و خصوصا بعد كارثة الدوري الاول و موضوع التست بانك و التريننق قررت انه خلاص خليني على السلايدات و خليني في السليم احسنلي و اشد حيلي شويتين
طبعا جبت السلايدات و ما انسى اشكر الاخ "ع ـكاش" على موضوعه عاجل عاجل - للي ما ذاكر لحد الآن - احياء لاني فعلا ذاكرت منها و جات اشياء كثيير منها فشكره له :)
و انا انصحكم يالبنات تحملون سلايداته و تذاكروها و تركزوا اكثر على اللي يكون هو محدده ^^

حاولوا قد ما تقدروا تحفظوا مصطلحات لانه اغلب الاسئلة تكون خياراتها من كلمة واحدة و كلها مصطلحات و هذي هي اغلبية الاختبار عموما

الجداول و الرسومات ما جاء منها و لا ايييييي سؤال و انا اصلا ما ذاكرتها الصراحة فلا تتعبي نفسك فيها و راجعيها لو كان عندك وقت زيادة

نجي للكلام المهم...
اولا: كثييييييرين من الطلاب ذاكروا ملخصات نزلت قبل الاختبار و انا ما ادري عنها اي شي..
ما ادري مين نزلها و فين نزلت اصلا و ليش الكل معتمد عليها...لكن انا كنت اصلا مصر على السلايدات و ما كنت حذاكر غيرها

التريننق: التريننق مدري عنه و الله و لا فتحته
في ناس ذاكروا منه و جاهم كم سؤال...لكن كنصيحة:اعتبري التريننق مجرد تمرين >>اصلا من اسمه
يعني بعد ما تخلصي مذاكرة السلايدات راجعي التريننق و طقطقي عليها عشان تمرني نفسك على الاسئلة و المعلومات.

الاختبار
ـــــــــــــــــ

زي ما قلتلكم اختباري كان D (اللي لونه بنفسجي)
كانت الاسئلة متنوعة و لكن جاء من فصل New Bioenergetics اكثر من غيره و هذا في نموذجي فقط

كان في اسئلة مدري و الله ايش اوصفها...حسيت انها من برا المنهج و اول مرة اشوفها
و في كم سؤال يكون ملعوب بالكلام و المعلومة ما بتجيكي بنفس الطريقة اللي كانت مكتوبة بالسلايدات
يعني يجيكي نفس المعنى بس ما بيستخدموا نفس الكلمات لوصفه (بالعربي لازم تفهمي مو بس تحفظي)

الرسومات و الجداول ما جاء منها و لا اي شي بكل النماذج فلا تتعبي نفسك فيها لانها فعلا معقدة و طوييييلة

و طبعا اولا و اخيرا التوكل على الله و الدعاء و بر الوالدين هو السبب الاول للتفوق :)

----------------------------------------------------

ذاكروا يا بنات...ولا تخافوا
و الله والله لو شديتوا حليكم بتجيبوها
و لا تمشوا ورا اي كلام ينقال ايام الامتحانات لانه في اشياء كثير مالها داعي تنقال و الطلاب مساكين يروحوا هم فيها
خليكم على السليم و خليكم على السلايدات و انسوا موضوع التريننق و الملخصات >>ارجعوا للمخلصات و التريننق بعد السلايدات

موفقين..و يا ريت تدعولي ربي يوفقني لانه وضعي يخوف للحين
و شكرا لكم