نداء لكل طلاب وطالبات التحضيري وخصوصا المحطمين من الدرجات

[The love roots]

السلام عليكم ورحمة الله وبركاته

كيف حالكم ؟؟ إن شاء الله تمام

بدون مقدمات انا شايفة حالة اليأس الي كثير عايشين فيها بسبب التحضيري لأني عشت دي الأيام
اسمحولي أخد من وقتكم القليل وأحكيكم قصتي
في البداية طبعا انا هعرف بنفسي
انا طالبة في كلية الحاسبات وتقنية المعلومات المستوى الثالث يعني دوبي مخلصة تحضيري العام علما بأني من خريجات قبل العام وعلى فكرة اتخرجت من التحضيري بمعدل 4.8 ودخلت الكلية الي أتمناها الحمد لله
طبعا انا زيي زيكم كنت ادرس في مدرسة ثانوي وبعدين قدرات وتحصيلي وعديت من ده كله عشان ادخل الجامعة
وأخيرا دخلت الجامعة وبدأت رحلتي
انا كنت تحضيري علمي بدأت بخطة ب بدأنا الكفاح
كلنا حايسين محنا عارفين من فين نذاكر او كيف الاختبارات وكله انجلش وكل شي كان من جد صعب علينا
دخلت الدوري الاول وجبت درجات زفت فيه
جاء الدوري الثاني وجبت درجات أزفت
طيب فين المشكلة؟؟ انا بذاكر وعلى قد مابذاكر على قد ما بنقص وأخيرا يأست وقررت أحول اداري وفعلا قبل الاختبارات النهائية حولت اداري
بعدها اهلي اعترضو بشدة وبابا فرض عليا اسحب ملفي وأقدم علمي مرة ثانية
وجلست في البيت ترم كامل وطبعا راحت عليا السنة
قدمت مرة ثانية السنة الي بعدها وانقبلت الحمد لله
طبعا اتعلمت من اخطائي وبدأت بداية جديدة أخدت التحضيري تحدي يا انا يا هي
وكان دايما قدامي حلمي ( كلية الحاسبات وتقنية المعلومات)
بدأت امسك الملخصات واذاكرها نماذج قديمة كثير يجي منها وارجع للكتب كزيادة للفهم لحد ما الحمد لله خلصت التحضيري واتخرجت بمعدل يدخلني الكلية والحمد لله دخلتها
الخلاصة ترا من جد هونوها تهون ومن جد التحضيري اسهل سنة في الجامعة لا تستصعبوها بالعكس حاولو واجتهدو وهتلاقو
انا كان عندي شبح اسمه التحضيري والحين الحمد لله ابدا ماهي أزمة
نصيحة لكل اخواني واخواتي الي ناويين يسحبو من الجامعة او يحولو اداري والله حرام تدرس علمي كم سنة عشان تدخل الجامعة بتخصص علمي وفي النهاية تحول اداري
والله كلنا جبنا درجات زفت خصوصا في البداية بس من جد كلها دروس واتعلمناها ومن جد انا دحين ماني ندمانة انه ضاعت عليا سنة بالعكس كل تأخيرة وفيها خيرة حكمة ربي

والله ما نزلت الموضوع الا عشان ارفع معنوياتكم انتو من جد تقدرو تحلموا وتحققو احلامكم بس اهم شي بلاش اليأس والاحباط والله كلنا مرينا بنفس الشي وفي النهاية ارتحنا ودخلنا الي نبغاه طبعا لكل مجتهد نصي
اسفة على الإطالة وأي استفسار انا حاضرة وجاهزة

[سديم الزهراني]

الله يسعدك يارب ويوفقك أختي انا مره متحطمه من درجاتي كلامك اعطاني امل وريحني .


يارب هونها علينا ويسر كل عسير .

[M!SS Lara]

جزاكي الله خير ..
كلامك ملهم لنا جميعآ
وفقك الله

[سملّق :)]

ششششششكرا . وجزاك الله الف خير أختي ..

تقبلي المرور

[The love roots]

العفو على ايش بس احنا كلنا اخوان واخوات وماجعل المنتدى الا للاستفادة للجميع
انا بس ابغى اوصل رسالة للكل نهاية تجربتي
(طول ما انت عايش وتتنفس من حقك تحلم وتحقق حلمك ولا تخلي شي ابدا يعيقك وقبل كل شي خلي أملك بالله كبير وتذكر انه كله نصيب وان أمر المؤمن كله خير والخيرة فيما اختار الله ومو لازم تدخل كلية طب عشان تصير انسان ناجح بل النجاح في جميع مجالات الحياة المهم الإجتهاد والمثابرة فلا يوجد انسان فاشل بل يوجد انسان لا يعرف قدر نفسه)
وأي استفسار انا في الخدمة

[فــ-ــۈق ~ MμŞтẄқ]

الله يسعد قلبك ياشيخه
والله الكل خايفين ويدينهم على قلبهم
الله يستر ويسهل
وان شاء الله تعدي على خير وكل احد ياخذ ع قد تعبه والله يوفق الجميع

[The love roots]

الله يسعدكم أجمعين
أهم شي المثابرة والاجتهاد وعدم اليأس والتخلي عن الاحلام
موفقين يارب

[سأهزم المستحيل!]

طيب حبيبتي لماقدمتي مره ثانيه أختبرتي قدرات وتحصيلي ؟؟؟!!
وإلا بدرجاتنا الأولى؟؟؟
لأني أفكرأسحب وأرجع السنه الجايه؟؟بس بالأول بعطي نفسي فرصه

مووؤؤؤفقه يااااااااارب..والله يجزاك خير على مساعدتك لنا......

[احلاكم]

انتي كدا كأنيك تقوليلنا عيدو السنة و شدو حيلكم ... وتراكي بالعكس حطمتيني !!!

[fnoosha]

كيف احول من تحضيري علمي الى اداري او كلية أداب ؟؟
بليز احدد ينورني