مندوب قسم كيمياء خطة ( أ + ب ) ادخلوا و اطلعوا مو لازم ردود

[ميثان حلقي]

السلام عليكم و رحمة الله و بركاته

كيف حال دفعتنا الجديدة دفعة ( 12 ) ؟

طبعا مريتوا بالدوري الاول و شفتوا ما حدث مو مصائب و نكبات في الاحياء و الرياضيات و امور تسر القلب و تثلجه في مواد اخرى

لكن بعيد عن الفلسفة الزايدة انا كنت مثلكم السنة الا فاتت و عشت انواع الضغوط النفسية و أسوء شي راح تمروا فيه في نهاية الترم الثاني لما تختار الرغبات و التخصصات الا تبغاها و تنتظر الصيف كامل و تتفاجئ انك في تخصص مو تخصصك

طبعا الكلام سابق لآوانه بس الايام تمشي بسرعة و راح تنحط في هذا الموقف عزيزي الطالب يوماً من الايام

----------

تغير الموضوع شوية , معيار نجاح الطالب في الجامعة دخوله ( طب او هندسة ) و ترا الكلام ذا مو صحيح , كمثال كلية الحاسبات تخصص it قوي و مرغوب في القطاعات الخاصة مع ان الكل يقول ايش تبغى بالحاسب و دخوله سهل و مثال آخر كلية تصاميم البيئة كانت فرع في الهندسة لكنه تم فصلها و هي كلية المهندسيين المعماريين ( و حاس واحد بيجي يقول في كلية الهندسة في قسم هندسة مدنية و هي حقت المعماريين ) >>>> لا ترد من بدري

و احب اضيف انه بعد ما تخلص طب في اختبار يقيس انت ايش فاهم من الا درسته و اذا ما عديت تعب سنينك راح ادراج الرياح و مهندس معدله 3,5 هذا اذا قدر لها زي خريج معهد سياحة معدل 1 ( ارجو فهم السبب من المبالغة متغاضياً عن اسلوب التشبيه )

الا ابغى اوصل له يا عزيزي الطالب خلي عندك وعي لأنك جامعي و لا تخلي كل من مشى عبا راسك بكلمتين ( طب + هندسة ) , التخصص الا تحبه ادخله بدون ما تشاور احد , يعني شاور من باب تعرف مستقبلك الوظيفي , لو حاب الاثنين لا تخرج منها بمعدل يقل عن 4 عشان تكمل حياتك بدون حسرات

-------------

نرجع لمحور حديثا السابق و الان الحديث مخصوص للي يحس انه متقدم في الكيمياء , من الاخير كذا سوق المهندسين طاح طيحة ما اضن يقوم منها قريب و التركيز صار على الفنيين , حاليا في مدن صناعية جالسة تنبني و الصناعات في المملكة كلها بتروكيماويت , و الشركات فحتى لو بياخذوا مهندسيين راح ياخذوا قليل و لو كانت تاخذ لكل مهندس 10 فنيين ترا شي كويس مرة

ككيميائي تقدر تشتغل زي ما قلت لك في شركة صناعية مهما كانت و يا كثرها و يا كثر الا بتجي كمان , تقدر تشتغل في وزراة الصحة تمسك مختبر , الجودة النوعية برضو تحتاج كيميائيين , يعني اي مكان في مختبر يعني لازم كيميائي فيه , لو حاب تدريس تقدر تقدم معيد في الجامعة و اذا مرة مرة دبلوم تربوي سنتين و تصير مدرس , بس من وجهة نظر اخرى تقول خذ ماجستير سنتين برضو و تدرس في الجامعة اصرف لك

ارامكو و الشركات الكبيرة لك مستقبل فيها بس الا ابغى اقوله لا تستعجل على رزقك لأنه مكتوب لك قبل ما تولد و ما تموت حتى تاخذه و لو لقيت فرصة تكمل و تتعمق في الكيمياء كمل و ارجع براتب اعلى ( لو كان همك الراتب يعني )

لكل زمن ناس و الزمن هذا للكيميائيين من وجهة نظري عشان لحد يقول ذا متعصب

انا كنت ابغى هندسة كيميائية او صيدلية او اي شي كبير فيه كيمياء بس ما انكتب لي و الحمد لله اني كيميائي في علوم

صح سمعة كلية العلوم بالحضيض مدري ليش بس والله اذا حاب شي ادخله ولا تفكر بأحد لأن زي ما قلت الارزاق مكتوبة و الاستعجال على الرزق مو طيب

++++++++++++++

باختصار شديد

الا قلته فوق خلاصة الا شفته من السنة التحضيرية الا والله نفعتني كثير , بسببها انا راح ادرس 3 سنين في قسم الكيمياء لأن كل موادها متطلبات في القسم و راحت سنة من ربك

و اتمنى في نهاية الكلام الكثير التوفيق لكم في سنتكم هذه و لا احد يضيعها و اقول تمتعوا فيها لأنها والله راحة و الصعب فيها الضغط النفسي فقط

لو واحد عنده تعليق على كلامي او حاب يضيف او يصف يتفضل لأن كلنا اخوان في النهاية

كان الله في عونكم

ميثان حلقي