ممكن سؤال الي ماعنده جواب اكيد رجاء لايرد ..

[الشوق الجارح]

انا طالبه انتساب وحابه احول تعليم عن بعد ..بس ابسال هل شهادته معتمده ام لا ..

لاني مررررره تعبت من كثر ما ابحث ولا القى جواب شافي من مصدر موثوق ..

انا ابي شهادته معتمده مابي شهاده الانتساب اذا رحت اشتغل في مكان يقولولي انتساب ماينفع >>>لاني سمعت كلام كثير ..
ندفع فلوس وندرس بدون فايده..
واذا صار وحولت اقدر احول بين الترمين
والف شكر

[سارة إبراهيم]

والله الحال من بعضوو

بس عندنا في التعليم من الممكن تحول انتظام وتخش الجامعة وتدرس زي العااالم..واضمن وافضل ,,,

انا عن نفسي اتوقع نبلها ونشرب مويتها وللعلم على الشهادة راح يكتب نوع الدراسة

راح تقولي ليش تدرسي للامااانة لاشغال الوقت وكمان يعني اهو اصير جامعية

[ماريام]

الشهادة معتمدة لدى وزارة التعليم عالي وكل شهادات جامعة الملك عبد العزيز معتمدة حتى الانتساب اذا تخرجت بمعدل تتوظف

لكن برنامج التعليم عن بعد جديد ولم يتخرج منه أحد إلى الآن لذا ليس عندنا جواب لك عن ما بعد التخرج سوى أن الشهادة سيكتب فيها طالب متخرج بنظام التعليم عن بعد وهذا ماقررته وزارة التعليم العالي في لائحتها وتقرر ان يعامل كمعاملة طالب الانتظام من حيث الدرجات والمعاملات الاعتيادية

[سارة إبراهيم]

مريام مين قالت انو راح يكتب انتظام... شوفي الاقرار إلى يجي في الادويس قبل فترة كان يجينا كل ماندخل اذا تفتكري؟؟؟ كاتبين انو راح يكتب نوع الدراسة وهوا ((تعليم عن بعد))

[غاوية دراسة]

حتى خريجين الانتظام مابيلاقوا وظايف الا بشق الانفس ههههههه
الارزاق بيد الله
لكن مثل ماقالوا ان كان انتساب او تعليم عن بعد فالإنتظام أقوى
والانتساب معروف اكثر من التعليم عن بعد
وغالبا مجتمعنا عدو مايجهل وراح يعامل التعليم عن بعد كشيء مجهول
عن نفسي دخلت مثل ماقالت اختنا سارة حتى أكمل تعليمي واصير جامعية ان شاء الله
والوظايف بامر الله ثم بمعدلك وشهادات الخبرة الا عندك ودرزينة الدورات الي ماخذتها
يعني كل ماكبرت ورقة السيرة الشخصية .. كل مازادت فرصك الوظيفية
والله يوفق الجميع ..

[برتني]

انا بصراحة مابغيت ارد لانك كاتبه اللي مو متأكد لا يرد ..

بس انا قدمت لاختي بالديوان هي متخرجة .. وشفت في نوع الشهادة كاتبين << انتظام .. انتساب .. اخرى ؟؟

وحاطين في خانة اخرى مثال تعليم عن بعد .. بالمراسله

يعني لو مو معتمدة من الديوان والتعليم العالي ليش يحطو ديوان الخدمة التعليم عن بعد من انواع الشهادات المقبوله ؟؟
بس يقولو القسم الوحيد اللي يقبل بشهادة الانتساب هو اللغه الانجليزيه وبس ..

انا ادرس عن بعد والارزاق بيد الله مو بيد احد .. واللي كاتبه ربي باخذه ياما بنات شهاداتهم انتظام ولاحولهم احد بالبيوت قاعدين ..

[الشوق الجارح]

مشكورين الله يعطيكم الف عاااااافيه ..

اكيد الارزراق بيد الله حتى لو كنت انتظام بس الواحد يدور الافضل ..

طيب ممكن سوال اخير ..

كيف دراسه التعليم عن بعد ممتعه وتفهمون من المحاضرات ؟؟؟

والاختبار يكون في الجامعه ولا في البيت ..
يعني فكره مختصره ...

الف شكر

[ماريام]

المشاركة الأصلية كتبت بواسطة سارة إبراهيم مريام مين قالت انو راح يكتب انتظام... شوفي الاقرار إلى يجي في الادويس قبل فترة كان يجينا كل ماندخل اذا تفتكري؟؟؟ كاتبين انو راح يكتب نوع الدراسة وهوا ((تعليم عن بعد))

سارة أنا ماقلت راح يكتبوا على الشهادة انتظام
راح يكتبوا عليها خريج بنظام التعليم عن بعد
هذا شرط الوزارة

[الشوق الجارح]

وينكم ياجماعه

كيف دراسه التعليم عن بعد ممتعه وتفهمون من المحاضرات ؟؟؟

والاختبار يكون في الجامعه ولا في البيت ..
يعني فكره مختصره ...

[Mr.ahmed]

الإختبار حيكون في البيت طبعا وحيرسلولك سي دي لبيتهوفن مع الأسئلة
عشان يكون الجو كلاسيكي ورايق .. هههه امزح

الدراسة ممتعه جداً ... فيها محاضرات يومياً وفيها واجبات أسبوعية وإختبارات أسبوعية او شهرية
وفيه 50 درجة أعمال سنة على ماسبق إضافة إلى المشاركة في منتديات المادة ، والإختبار في الجامعة .. بإختصار