Please Help -Cancer

[Dr.Passed]

السلام عليكم ورحمه الله

أنا عندي مشكله بعاني منها مع شخصه مريضه سرطان ( منتشر خلاص مافي امل)

هيا تقربلي ..
عندها بزوره مساكين في كبار وصغار

المهم الي حاصل انو هادي الانسانه مره ماهي اجتماعيه أبدا وماتحب انو تختلط بأحد

الفتره الاخيره حاولت اتقرب منها كتير عشان اقدر على الاقل اشتغل على نفسيتها شويه امكن يتحسن حالها..يعني قاعده أحاول اضحك فيها واخرجها على البحر واحطلها افلام كوميديه أجيبها اقلها تعالي نلعب بلوت

مره جبتها المطبخ وقلتلها تعالي نطبخ نتسابق نشوف مين يخلص اول

يعني قاعده أحاول اشغلها حياتها بكل الطرق

لكن دحين سرلها حوالي اسبوعين بس تصرخ من الآلام تقول انها مكتومه ومايعجبها شي
فسرت بس وهيا محلها اتكلم معاها ..بس ماتبغى تتكلم

دايما مكشره..دايما تبكي
ماترضى تاكل مايسير كده
أنا احس انو برضو بمبالغه
ماترضى تلتزم بأدويتها ..اصلا تاخدهم بمزاجها

( لاحظت انها تبالغ) يعني بعض الاحيان احس انها تبالغ في الام عشان تبغى تجذب انتباهنا مره بيأثر على البزوره أنا شايفه
أنا سايره ما اعبر كتير عشان توقف مبالغه ( ونجحت في هادا الشي) احس اني لمن اسوي انو مره قلبي عليها واني خايفه ومتأثره منها تزيد وتزيد وتستغل الموضوع..ولمن ما اعبر واسوي نفسي ما احس تهدى

وحسستها كم مره اني عارفه انها بتبالغ واحس اني نفرتها مني

أنا عارفه انها مريضه وبتعاني بس معليش في مبالغه في الالم يعني مايحتاج الصراخ الي بيصدر منها بتفجعنا كلنا خايفين

لمن تكون لحالها عايديه بس لمن تسمع انو في احد دخل البيت تبدأ تصرخ من الالام وانا امتحنت الشي دا بنفسي ..جربت اتسحسب كم مره وبعدين اسوي صوت فجأه في الدرج ولاحاجه تقوم تبدأ تصرخ واسمع البكى كأنو في مصيبه

ما اعرف ايش الحل او طريقه التعامل معاها

أنا خايفه لاسمح الله انتو عارفين ما ابغى اقول ( اعوذو بالله اعوذوبالله)

بس المهم

ايش التصرف الي المفروض نتصرفو؟
( علما انها مالها الا أنا وبزورتها ماتحتك في احد أبدا ) تضايق وماتحب الجمعات ولاتحب احد يدخل في حياتها ولايكلمها ولا اي شي

أنا مني عارفه ايش اتصرف..

مالها علاج ..انتهى
اخدت كيماوي الين ماقالولها توقفي عشان مافي امل
جبنا شيوخ وسوينالها تقريبا كل شي

دحين جسمها كلو الام وضعيييييف جدا ( عشان مابتاكل) وصعب تقوم وتقعد وتتحرك مره صعب

من كتر ماهيا ضعيفه أنا اقدر اشيلها من جد ضعيف جدا وباين تعبان يعني حتى يدها لمن امسكها أخاف اكسرها بالغلط من جد مره سايره ضعيفه

الموضوع مره مأثر على نفسيتي

ايش الحل..؟

نفسي أساعد اكتر من كده =(
نفسي يروح منها السرطان
كل الناس الي حولينها بتتألم عشانها غير الستريس الي هيا حاطه نفسها في

هيا بتبالغ ومابتساعدنا ولا بتتعاون معانا

أنا مايئست منها حقعد معاها الى النهايه بس أنا تعبت من الستريس هادا وتعبت وانا اشوف الكل حزين اولادها وبناتها

ايش الحل؟؟
ايش في تصرف ممكن اسوي يحسن صحتها؟؟

أنا فكرت نتفق مع دكتورها يسوي نفسو شافها ونخلي يقولها انو السرطان بي يخف وهيا سليمه واتحسن حالها ( احس مره حتمشي عليها) لأني أنا عارفه انو 60% مبالغه

بس قالوليانو قصه انو نتفق مع الدكتور هادي غير مقبوله اصلا لأنو المريض من حقو يعرف كل حاجه

مااعرف ايش ممكن نسوي

مع العلم انها في اخر المراحل
يعني اتوقف الكيماوي عشان مافي امل
والله يشفيها أنا عارفه انو ربي قادر انو يشفيها وبإذن الله أنا عندي إيمان بهادا الشي

ما اعرف ايش رايكم
او ايش ممكن يكون عندكم اقتراحات

[miss you]

مدري بس احس انها ماتابلغ

الكانسر خطير وقاتل فاكيد هي تتالم جد

الله يعينها ترا الكانسر سمعت انو في ناس تشافت منو يوم راحو لمكة ودعو ربهم وشربو موية زمزم

[JuStice]

.

وعليكم السلام ورحمة الله وبركاته,

أولًا, نسأل الله لها السلامة والعافية والشفاء العاجل.

ثانيًا, نصيحتي أن تذكّريها بالله حتى تستغل آخر أيامها بالانشغال في طاعته وفي الأعمال الصالحة وأن تحتسب الأجر عند الله في كل آلامها ومعاناتها..

والله المستعان

.

[miss you]

^^^

ليش تقول اخر ايامها

حرام يا اخي انت ماتعرف متى حاتموت اولا

وثانيا ممكن تعيش اكثر منك ؟؟؟؟؟؟؟؟؟؟؟؟ الاعمار بيد الله

مانقول الا الله يشفيها ويخليها للبزورتها

[JuStice]

المشاركة الأصلية كتبت بواسطة miss you ^^^ ليش تقول اخر ايامها حرام يا اخي انت ماتعرف متى حاتموت اولا وثانيا ممكن تعيش اكثر منك ؟؟؟؟؟؟؟؟؟؟؟؟ الاعمار بيد الله مانقول الا الله يشفيها ويخليها للبزورتها

.

صحيح.. الأعمار بيد الله, وقد تحيا هي أكثر مني.

ولكن الظاهر لنا هو أنها في أيامها الأخيرة بما أن لديها سرطان منتشر بجسدها وقد قرر الأطباء بأن شفاءها لا أمل فيه طبيًا.

ولو أنك قرأت ردي جيدًا ولم تتسرع بالتعليق والتهجم عليّ لكنتَ لاحظت بأنني دعوت لها بالشفاء.

.

[Dr.Passed]

ياجماعه أنا اقلكم السرطان وصل للرئه مافي اسوأ من كده

الصراحه ملاحظين و الكيماوي متعبها دحين عشان وقفتو شويه بدأت تتحسن ( من أعراض الكيماوي فقط)

المشكله مو هنا

المشكله انها بتبالغ بزياده ( حتى الدكتوره قال انو من نحيه الالام هيا بتبالغ)

يعني مو كلامي أنا بس
كمان ما أبغى اقلها لاتبالغي وبعدين تسير ماطيقني عشان ما بأعبرها ..يعني مني قادره اصارحها زي الناس واقلها بس وقفي الي تسوي


اصلا هيا قاعده تزيد على نفسها بالطريقه دي والله قاعده تزيد على نفسها
الشغاله تقول انها هاااااديه من الصباح بس لمن يجي احد البيت تبدأ تصرخ وتبكي

ومساكين البزوره متأثرين مره..حرام تسوي كده فيهم ..يمديها تجي على نفسها شويه

أنا مابا استهين بمرضها أنا والله مقدره وفاهمه انها مره مريضه ( بس بتاخد كل المسكنات) بتاخد مورفين من الدكتور!!! كيف تصرخ كده وتقول انو مايسويلها شي) طريقه بكاها مخيفه تحسسنا انو من جد الالام مستحيله ..يعني احنا عارفين بس كمان مو للدرجه دي ..بننفجع عليها كل شويه

تبغى لفت انتباه واحنا بنعطيها لفت الانتباه الي هيا تبغى بس مني فاهمه كمان لمن نعبر بزياده تزيد


نبغاها تتغير

أنا أومن انو نفسيتها حتتحسن وامكن بقدره الله تتعافى ( هيا ماشالله تصلي وتقرا قران وقريبه من ربها) لكن لازم عمل..لازم تغير نمط حياتها شويه بلاشي تزيد على نفسها بالطريقه دي كلنا حولينها

مني عارفه ايش الحل =(
الله يشفيها أنا مو عايشه معاها في نفس البيت جاني اكتئاب بالأسلوب دا

مساكين البزوره الله يشفيها بس

طلبت منها قلتلها تعالي نوديكي عند دكتور نفساني خاصمتني

أنا مو شايفه انو عيب ولا فيها شي
بالعكس اشوف احسلها واضح انو عندها شي نفسي ( عشان كده تحس انها تبغى تبالغ) امكن المشكله نفسيه

حاولت اقنع فيها مره مافي فايده
خلاص مني عارفه ايش اسوي في عمري

[miss you]

قولي لها انتي اصبري بس عشان بزورتك حرررررررام عليك بيخافو وياثر عليهم نفسيا ممكن تتعدل

[Dr.Passed]

الله يرحمها ويتغشاها بالرحمه
اليوم من غير اي مبالغه كان اصعب يوم في حياتي ولسا ما خلص اليوم
حنغسلها ان شالله بعد كم ساعه

يارب ارحمها يارب لطفك ورحمتك يارب
يارب هون علينا مصيبتنا
استغفر الله العظيم ..انا لله وانا اليه لراجعون

[محمد الداود]

إنا لله وإنا إليه راجعون
عظم الله أجركم وأحسن عزائكم وغفر لميتكم
أسأل الله أن يغفر ويتجاوز عنها وعنا

[miss you]

لاحول ولاقوة الا بالله اقشعر بدني من صدمة الخبر

دوبك كنتي تقولي انها مع اولادها فجاءة كذا تتوفى ؟؟

الله يرحمها