طموحي طب ولكن..

[جامعي مكروف]

السلام عليكم ورحمة الله وبركاتة..وبعد

طموحي طب ولكن الظروف ماتسمح

انا طالب بجامعه الملك عبدالعزيز
ونسبتي الموزونة في جامعه الملك عبدالعزيز 81 ونص
وهما دخلوا طلاب بنسبه 75..إنتظام صباحي (خطة أ)

حطوني خطة أ صباحي..وكنت مررة متحمس لكلية الطب وعزمت أغير طبعي فالثانوي (مهمل جدا)

بعد اسبوع بقدرة قادر صرت موازي خطة ب اداوم من 4 العصر لحد 9:50
ويومين اداوم من 4 العصر لحد 8:50 الليل حاولت افهم الموضوع قالوا (تبغى مكافأة روح عسفان) قلت مابغى مكافأة ابغى دوام صباحي بس (ماحد رد عليا)
وانا ساكن جنب الفرع الرئيسي (في السليمانية) مررة مشوار عليا اروح عسفان وسيارتي خربانه بالكامل

وهذا الشئ خرب نفسيتي مرة عشاني موظف ودوامي 9 ساعات ونص تقريبا
ووقت انتهاء دوامي يبدأ اول محاضراتي في الجامعه يعني 15 ساعة ونص اكون برا البيت

وكمان (كل المطاعم والمحلات تقفل في الجامعه بعد المغرب)
ومافي وقت اروح اكل او اشرب شئ لان بين المحاضرات 10 دقايق بس
يعني تقعد على لحم بطنك لين تخلص وتطلع (فيه بنقاله يبيعون الموية ابو نص بريالين)

ماعلينا

أنا الأن بدأت أغيب واتهرب من الجامعه بسبب ضغط أهلي عليا للمذاكرة وكل يوم اقوم من النوم على صراخ الورعان في البيت وكثرة طلبات اهلي ومشاويرهم حتى وانا بنص الكلاس تجيني رسايل طلبات منهم
والوالد والوالدة معلقين امالهم عليا اني اخش الطب بسبب أن بقية اخواني فاشلين

وفي الجامعه احاول افهم ماقدرت (شرح الدكاترة جدا سيئ وكلامهم لنا ع اننا مهملين عشان كذا جينا موازي) صرت اتعمد ما اسمع للشرح بس اطالع فيهم (تسليك)


خلصت قصه حياتي واتوقع عارفين ايش وضعي
وانا والله ابغى اجتهد واجيب درجات عالية عشان ادخل الطب
كل تفكيري (لو ماجبت نسبه وش اسوي في نفسي) مابغى غير الطب (تفكير سلبي بس غصب عني)

أبغى نصايحكم في المذاكرة والفهم وكم كلمة ترفع معنوياتي لانها زيرو صراحة

<<نفسه يفضفض بس حاس انه حيتلطش

انتظركم حبايبي

[SamuraiQ]

حبيبي حقيقتًا وضعك جدًا صعب والتفكير فاللي قلته خلاني احمد ربي على النعمة اللي عندي
نصيحتي لك يالغالي
انت اول شي حاول وحاول وحاول تركز مع الدكاترة يعني حاول باللي تقدر عليه فلو كانوا مو كويسين شوف لو في شعب ثانية عندها نفس المواعيد ودكاترة كويسين وحول لهم
ثانيًا حاول تكون مطلع على الأخبار زي نزول الملخصات والورك شوب عشان تعرف شوي تشد يعني
ثالثًا حاول تفكر تفكير ايجابي وادعي ربك يفرجها عليك وبإذن الله الأحد الصمد ييفرجها
وفي الختام الله يوفقك ويوفقنا ويوفق الكل

[Amal Bakhsh]

السلام عليكم

والله وضعك صعب جدا، الله يعينك يارب وتدخل طب.. لا تقعد تفكر كتير، بس حط في بالك انك تجتهد شوية شوية وان شاء الله تتعود على الوضع.. ولو لا قدر الله ما قدرت تدخل طب في جامعة الملك عبدالعزيز، تقدر تدخل في ابن سينا وبمنحة دراسية كمان، يعني يمكن لو تفكر كدا بيشيل عنك الهم والقلق..
وبالنسبة للمذاكرة، لو ما فهمت من الدكاترة فأحسن شي اشتري ملخصات، او احضر محاضرات مع منسق المادة نفسه..

الله يوفقك

[l.f]

الله يوفقك ويساعدنا ع التحضيري وينال كل انسان مطلبه

ان شاء الله يكون لك مكان ف الطب

[iRe]

وعليكم السلام ورحمة الله وبركاته

والله عتبي على الجامعه اللي تحول شخص منتظم الى موازي
على كل حال عساها خيره، بس انت رحت لهم ؟ سألتهم ؟
على كل حال تأكد ان كل شي له حل مافي شي مستحيل
اتفق معاك انه دوام الصبح افضل لاننا متعودين على هذا الشي من زمان
بس صدقني المسألة تعتمد على التنظيم تمامًا
والله في عالم دوامها صبح ولا استفادوا من هالشي
وبعدين مو انت طموح وعندك هدف ؟
خلاص هذا كافي يخليك تستحمل وتصبر ومع مرور الوقت بتتعود
والمثبطين امثال اللي ذكرتهم اللي مو مالي عينهم الموازي
مايحتاج تثبت لهم انك افضل ولا متفوق والله مو دارين عن احد
بس يحبون يبردون حرتهم بالخلق ،، خليك مركز على هدفك وبس
اذا على الدوام مو مشكله انا كنت اخرج من الساعه 6 واداوم الى 5 العصر
مع ان دوامي الفعلي من 8 الى 11 او 1 بالكثير ،، فيعني تعب مرره
عندك الصبح تذاكر فيه والليل بعد ،،
واذا عن شرح الدكاترة مو تمام ،، ممكن تستعين بالملخصات
او ممكن تحضر عند اي دكتور ثاني
صدقني لو استسلمت او استثقلت الدراسه ماراح توصل للي تطمح له
توكل على الله وربي مايضيع تعب
وترا هالمرحله كلنا مرينا فيها ،، سواء انتظام او موازي
واذكرك بأن التنظيم مهم مهم مهم ، و ذاكر اول بأول خليك قد طموحك !
الله يوفقك ويسر لك

[S.Bn]

ـ شوف اعلم انو هذا قدرك و مكتوب لك من قبل ما تخلق السماوات و الارض .

ـ و اعلم انك انت احسن من غيرك يعني في غيرك يتمنى يدخل للجامعة او ما عندوا مواصلات او او او و لكلن ظروفه .

ـ و دائما قول ( الحمد لله على كل حال ) و اي مشكلة تقابلك قول ( اللهم اجرني في مصيبتي و اخلف لي خير منها ) و الله حيسير اللي تباه او احسن من اللي تباه .

ـ خلي كل من في البيت يفهم وضعك انو عندك دراسة و انك ما حتكون زي الثانوي و انك حتتغير للافضل و هما لازم يساعدوك بشرط لازم تثبت لهم ذلك عشان يستمروا معاك .

ـ تعاون انت و اخوانك في اغراض البيت و الطلبات و اقنهم انو يخففوا الطلبات عليك .

ـ فهم امك و ابوك انو الجامعة مو زي الثانوي انو فيها كرف اكتر بكتير من الجامعة و انو لازم تقللوا من الطلبات اللي في ايام الدراسة و لازم تتجمع لاخر الاسبوع .

ـ فهم الورعان انو اللي حيصحيني رح يتصفق تصفيق محترم مو قصدي تصفيق بس يعني يعرفوا انك لازم تنام كويس عشان تصحى و تذاكر و تجيب طلباتهم .

ـ سالفة الاكل ما قدرت افيدك فيها .

ـ لا تتهرب من المحاضرات لانو دي اكبر مشكلة و الهروب ليس حلا لها حاول تركز مع الدكاترة و لمن ترجع البيت اقرأها بتركيز عشان تتثبت و كل خميس و جمعة ذاكر مادتين اما طرق المذاكرة في دا الموضوع حيفيدك
http://www.skaau.com/vb/showthread.php?t=584498
و الملخصات من هنا
http://www.skaau.com/vb/showthread.php?t=586279

ـ اعرف انو دخول الطب مو نهاية الطريق لا الطب بداية طريق اصعب و لازم تشد حيلك اكتر و في كرف اكتر بكتير .

ـ غير طريقة تفكيرك و خلي كل تفكيرك انك تجيب فل مارك في كل المواد لانك لو جبت فل في المواد رح تدخل اي تخصص تبغاه .

ـ حاول تفكر في ايجابية و الله عز وجل يقول في الحديث القدسي { أنا عند ظن عبدي بي إن ظن بي خيرا فله ، وإن ظن بي شرا فله } و دائما خلي ظنك خير و حسن .

ـ الدعاء و الدعاء و الدعاء و الدعاء دائما ادعي ربك في الصلاة و في سجودك ( لا يرد القضاء الا الدعاء ) .

ـ اكثر من الاستغفار ربي بيفرج كرباتك و احزانك قال تعالى : ( فقلت استغفروا ربكم انه كان غفارا ).

ـ و اعرف انو لكل ظروفه المختلفة لكن الشخص الناجح هوا اللي يتصرف فيها و يحلها بذكاء

ـ اسفة انو الرد متأخر بس لين رتبت افكاري .
و بالتوفيق

[جامعي مكروف]

الله يعطيكم العافيه على ردودكم إلي ترد الروح

ماقصرتوا لاعدمتكم

وان شاء الله اخذ بنصايحكم

أؤمن بأن الإنسان لايدرك كل مايتمناه
ولكن لايمنع من السعي ورا طموحي دام عندي القدرة
ولو بعد 10 سنوات إذا اراد الله


الله يوفقكم كلكم ياللي رديتوا عليا والقارئين يارب

في امان الله

[جامعي مكروف]

أسف للي أرسلت ليا رسالة ماقدرت ارد عليها
لان مشاركاتي أقل من 100 ولكن راح انسخ ردي هنا
وان شاء الله تشوفيه

__________________
ماشاء الله عليكي الله يوفقك يارب
(من كانت بدايته محرقة كانت نهايته مشرقة)

يارب توصلي للي تتمنيه وتتيسر كل امورك

صراحة كلامك حفزني مع كلام الأخوان في موضوعي

اسف لاني تاخرت بالرد كنت بالمدينه المنورة ولو رحت المرة الجاية
حأدعي لكم إن شاء الله

والوعد قدام بإذن الله

بالتوفيق لكي

في امان الله
_____________

[حمني !]

حبيبي وضعك صعب جدا بس ايش تسوي هاذا قدر ربي وترى لو تشوف وضع الي اخص منك تشكر ربك ترى في غيرك انتساب وودهم يتخصصو طب ولا هندسة انتظام وهما ماعندهم لا محاضرات ولا مكافات وفوق كذا يدفعون 3 الاف في الترم وغير يبيله يروح عند مدرس يفهمه المادة وتدخل عليه المادة 1000 يعني حالك طيب وشوف حبيبي انا لو منك ما اداوم دوام كامل روح اي وظيفة دوام جزئي 6 او 5 ساعات واستمر عليها ولاترجع البيت قلهم انا بالجامعة وذاكر على مهلك في السيارة ولو خلصت ارجع البيت وترى الوقت من 4 ل 9 مو ذاك الزود يعني تقدر تصبر تشتري مويه من برا وادخل بيها الجامعة انا اداوم والله من 7 احرك من البيت الين ارجع 4 ونص وما اخذتلي الا قارورة مويه تكفيني , وترى المكاتب الي عند بوابة 4 تشتغل كلها وروح مكتبة 2000 في ملخصات يبيعها تفهمك اكثر من الدكتور نفسه والله انا عايش عليها لاني زي حالتك ماعندي دكتور واحد يفهم ,, واتفاهم مع اهلك بخصوص البيت والطلبات لو يبوك تدخل طب لازم يخصصولك وقت معين تذاكر فيه ,, وذاكر اول باول لا تتراكم عليك المواد وتكره نفسك قبل الاختبارات

[فستان فوشي]

الله يعينك ويسهل دربك يارب