ظلم .. اجحاف .. قهر .. التصحيح .. الترصيد .. الدكاترة

[ضحايا الصمت]

السلام عليكم ورحمه الله وبركاته



مساكم الله بالخير جميعا :




طبعا الي يدخل المنتدى اليومين هذي يقول داخل ديوان المظالم .. ماتقرى مواضيع الا مارأيك في درجة كيذا ولا ظلمنا في كيذا ولا حسبي الله على الدكتور الفلاني ولا الجامعه ولا ولا ولا .....





طيب ايش السبب ؟؟


1- الدكتور : قد يكون الدكتور سبب بس مو كل شي على الدكتور ... وعلى قد ما اقرى في المنتدى ما اتذكر احد كتب شكر او كلمة حق في دكتور الا فييييييييين وفيييييييييين



2- التصحيح : قد يكون برضوا وليش لا جهاز وقد يصير فيه ايرور



3-الترصيد : برضو ممكن لانه الي بيدخلها ادمي ويخطأ زي مايصيب .. والخطأ مردود ويتصلح والي مو عاجبه درجته ويحس انه يستاهل اكثر يروح يراجع



4- والاهم .... الطالب : طبعا كل انسان وله طريقته .. ناس تطلع من الاختبار وفرحااااااااااااااانه ويحسب ان الاسئلة سهله وهوا مايدري انو فيها مليون لفه ولفه ويتوقع درجة عالية ويتفآآآآجأ بالنتيجة .... طبعا مو هوا الي غلطان ... الدكتور او التصحيح او الترصيد


اخويا الطالب الثاني يطلع من الاختبار ويراجع ويعرف انه عنده من الاخطأ هالكثر وانه حيجيب تقريبا تقريبا الدرجة هذي ( وانا الان خلصت السمستر السابع من فضل الله ... والله ثم والله ان درجاتي سواء كانت مرتفعه او منخفضة مقاربة لتوقعاتي المبنية على مراجعتي بعد الاختبار ) ليش مايظلموني !!!!


هل معناة كلامي مافي ظلم !!!!!


لا في .... انا اجزم وابصم بالعشرة انه في ظلم ولا طالب ولا اثنين ولا عشرة المظلومين .. اكثر


بس .... مو كل الجامعه







الي يدخل المنتدى الان يقول كل الي في الجامعه مظلومين

ولا في شي اسمه دكتور متساعد

دكتور يدف بالدرجات

اسئلة كلها اختيارية





طيب هل كل الي بيشتكو هنا بيروح الجامعه يطالبو بحقهم ؟؟؟ ولا نصهم ولا ربعهم يمكن




طيب ليش نقعد نعبي صفحات المنتدى بالمواضيع الي توقف نفس الواحد عن الدرسة وتكرهه في الجامعه وفي الدكاترة ؟؟




اقسم بالله العظيم ان بعض الاعضاء الله يهديني واياهم يدخل من موضوع لموضوع عشان بس يدعي على الدكتور فلان ولا فلان .... بدون حتى مايعلق على الموضوع نفسه ... يادوبك بس حسبي الله على الدكتور الفلاني ... والموضوع الي بعده وهكذا .... طيب ليش ؟؟




ترى على فكرة انا ماعرف الدكاترة ولا حتى اعرف اشكالهم .... يادوبك على قاعه الاختبار ومن القاعه على بره يعني مابيني وبينهم اي شي ولا ادافع عنهم ولا شي ولكن .... والله كلمة حق الواحد يقولها




كل انسان مننا يغلط ويظلم ... خلاص نستلمه انواع الدعاء والحسبنه والكلام هذا .... هذا اذا كان الدكتور فعلا غلطان وظلمه ماكان هوا عايش الجو هذا وبس



وللاسف ان البعض يحب يعيش الجو هذا ... طووول مسريته في المنتدى تظلم ودعاوي والدكتور هذا فيه وهذا مافيه .... اتبع المواضيع الي يشارك فيها وشووف !!!!!!!!






انا اشوف ان الي بيسير غلط في غلط ....



ولا تتكرم ادارة المنتدى بفتح قسم جديد بجانب قسم ادارة الاعمال والادارة العامة وتسمية قسم التظلم والشكاوي ... عشان تعطي مجال للي بيبحث عن فائدة ولا موضوع انه يحصل الي يبغاه من غير مايقعد يدور بين مية موضوع احس مالها صلة اصلا بشي اسمه منتدى جامعه الملك عبدالعزيز لها صلة اما بديوان المظالم ولا بمجلس ام فلانه للهروج وفلانه فيها وفلانه فيها





معليييييييييييييييييييييش اعذروني بس والله من كثر ماتعبت وانا اقلب في المنتدى بين المواضيع هذي








تقبلو تحياتي واتمنى انه ماحد ياخذ الموضوع بصفة شخصية ...فهذي وجهة نظر لاغير ...

[salem matare]

لا فض فاك

[حماده909]

كلامك صح 100%
حتى انا والله من بداية مادخلت للجامعه ولين ماتخرجت كانت الدرجات قريبه جدا من التوقعات
وازيدك من الشعر بيت
والله العظيم في اخر ترم من كثر حرص الواحد وانه مفتح عينه قد الريال
انى اطلع وانا عارف كم درجتى بالضبط
وصارت معايا دا الترم والله زي ماحسبتها بالضبط
كأني انا اللى صححت ورصدت الدرجة
والله يوفق الجميع

[ألف باء تاء]

عجبني,, كلامك,,

ما أقول ما فيه ظلم,, إحتمال فيه بس مش بهالنسبه الهائله إللي كل واحد/ـه, يطلعوا نتايجهم على طول مظلومين,,


مثل ما قلت أخي,, إنت الحين لك السمستر السابع,, أنا خلصت السمستر الرابع

والحمد لله,, أطلع من الإختبار وأنا عارفه قد إيش بجيب,,


يمكن إللي حصل معاي بس في ماده وحده بس,, الإقتصاد الكلي توقعت أكثر من الدرجه إللي عطوني ب 5 درجات بس,,

بس حقيقةً والحقٌ يُقال,, أنا أحس التصحيح فيه نسبه كبيره من العداله,,



ودرجاتي تكون في الرينج إللي أنا محددته,, والله أنا متوقعه بين خلني أقول مثلا من 85 إلى 95 وآخذ الدرجه المتوقعه,,


يجوا الناس يقرأوا الكتاب قراءةً قبل الإختبار بيوم أو يومين حتى لو كان بتركيز ويبغوا ياخذوا 100 ويقولوا متأكدين,,


لا والله هالقراءه ما بتركزوا فيها,,

لو ما الواحد يذاكر مواده قبل بفتره من شهرين فما فوق,, لا يتوقع إن بياخذ مئات في مواده,, ولا يتوقع إن بياخذ نسبه كبيره في مواده,,


أنا معاكـ 100% في ما قلته,,


سلام

[ضحايا الصمت]

كلامك كلو صحيح ..... بس ليش ماشفت ولا احد كاتب موضوع في المنتدى يقول مافي اخطاء في التصحيح وانا باخذ حقي !!!


ليش على طول بنطبل للي بيقول مظلوم ؟؟


مو المفروض تقال كلمة حق في حق الجامعه او الدكتور ؟؟؟


ياخي روح جرب جامعه ثانية مانت مجبور تقعد تكبت وتقهر في نفسك

عندك الجامعه العربية المفتوحه وعندك جامعه الامام محمد بن سعود وعندك الملك فيصل وعندك طيبة ... كللللللللها فيها انتساب وفي جميع مدن المملكه تقريبا



ليش رايح للملك عبدالعزيز في جده ؟؟؟


عشان انت في قرارة نفسك عااااااااااااارف انها افضل من غيرها مليون مرة ومرة

[حلم عمري]

وعليكم السلام ورحمة الله وبركاته

طبعا الي يدخل المنتدى اليومين هذي يقول داخل ديوان المظالم

مزبووط والله نفس الكلام اللي ابغى اقوله هذا الترم مرره مرره بزياده كل ترم ممكن نشوف اعتراضات بس كانت نسبتها عاديه وماتلفت لاكن دا الترم ماادري اش الحاصل ادخل القسم نص المواضيع اعتراضات وماادري من مين السبب ؟

على ان عندي اختبار بعد ساعتين بس ماصدقت احد قال الكلام اللي ابغى اقوله

عموما انا كل ترم مااشوف كدا وأنا عن نفسي دائما كان اعتراضي ع الوقت وهذا مشترك ويوافقوني عليه الكل

[سـ ـ ـ ـاب]

يا شيخ الله يوفقك على هالكلام الرائع


فعلا كلامك صحيح وهذا اللي حاصل بالضبط

أنا في اختبار ادارة العمليات السمستر الماضي كنت طالع وانا متوقع احمل الماده بنسبة 70 % والحمد لله الدكتور خالد مشاها لي بـ d

مو عشاني مستفيد بشهد مع الدكاتره .. لكن مو الكل سيئين


بالتوفيق والسداد للجميع

[ماجد اصيدلاني]

يا اخواااان السبب واضح كل ما اجتمعو طلاب على ماده تتفاجأ بتغير الدرجات من قبل الدكتور والسبب اما اخطاء في

التصحيح اوغيره كما حدث في الترم الماضي في مادة المحاسبه اذا الثقه تقريبا اهتزت في رصد الدرجات ...اما بالامانه

الدكاتره لايشق عليهم غبار اونقول الاغلبيه العظمى ....والترم دا الملاحظ كل ما رسب شخص قال نجتمع تظلم

انا ما الومهم ....اذا لازم الجامعه تعيد الثقه للطلبه في رصد الدرجات ............

[حماده909]

المشاركة الأصلية كتبت بواسطة ماجد اصيدلاني يا اخواااان السبب واضح كل ما اجتمعو طلاب على ماده تتفاجأ بتغير الدرجات من قبل الدكتور والسبب اما اخطاء في التصحيح اوغيره كما حدث في الترم الماضي في مادة المحاسبه اذا الثقه تقريبا اهتزت في رصد الدرجات ...اما بالامانه الدكاتره لايشق عليهم غبار اونقول الاغلبيه العظمى ....والترم دا الملاحظ كل ما رسب شخص قال نجتمع تظلم انا ما الومهم ....اذا لازم الجامعه تعيد الثقه للطلبه في رصد الدرجات ............

صحيح كلامك هذا الترم ويمكن اللى قبله زادت حكاية تعديل الدرجات من بعد تظلم
وهذا اللى هز الثقه بنفوس الطلاب

[rubi]

مبادرة رائعة منك

كلامك صح

بس برضو في ظلم فالجامعة مثلا يقولو عن جزئية انها محذوفة
ويجيبوها فالاختبار

بالنسبة للدرجات
احيانا بينجحوني مدري كيف بصراحة

بس ما سارلي انهم نزلو الدرجة عن المتوقع بزياااااادة
يعني يمكن انا خرجت من الاختبار واحس نفسي حالة
والحقيقة اني طحت في الاشياء اللي تلخبط

يعني الاسئلة اللي فيها ودوران



امممم
احس انك كتبت الكلام دا لانك ما حضرت محاضرات وتعبت فالروحة والجايا وتسمع الاستاذ بادنك يقول
دا محذووووووف مو معاكم


وتفاجا بالاختبار انها جات


بس كلامك فيه شي من الصدق والامانه



مع احترامي وودي

روبي