رد: تجارب الطالبات مواد + أستاذات
السلام عليكم ورحمة الله وبركاته
راح اعطيكم تجاربي بالتفصيل وبالتالي ان شاء الله كل وحده تدخل تكتبلنا تجربتها بالتفصيل والله يوفق الجميع
READING I
اخذت مع استاذه ريم فطاني وكانت عاديه جدا ودرجتي معاها توقعتها اعلى بس نجحتني على الحافه مع انها خلال وقت المحاضره طيبه جدا
READING 2
اخذته مع دكتوره خديجه باوزير مره تجنن وطيبه وكلامها يخلي الواحد يثق بنفسه اكثر تعطي اندفاع وتساعد وتحب تشوف الوحده فاهمه واختباراتها اسهل شي اذا هي سوتها وتسوي تحسين ماتقصر لكن اخر شي توقعت علامتي بتكون اعلى من اللي اعطتني وممكن ماظلمتني وانا استاهل الدرجه ليش لا !!
WRITING I +2
كلهم اخذتهم مع استاذه ابرار مجددي وهذي عاشر مليون مره اقول الاستاذه هذي مافي زيها في القسم كله متساهله جدا وتشرح شرح يجنن وفي النهايه انسانه مراعيه لاقصى الحدود وطيبه
FRENCH 1
اخذته مع استاذه هبه ميره شرحها جدا جميل لكن دقيييييييييقه وتحب المشاركه ويوم مبسوطه ومية يوم معصبه
FRENCH 2
اخذته كمان مع استاذه هبه ميره بس راحت في نص الترم وكملت مع استاذه صالحه القحطاني وماشاء الله عليها انسانه طيبه جدا ومراعيه وتمنيت لو اني اخذت المستوى الاول معاها
LISTENING & SPEAKING I
اخذته مع دكتوره سهام فطاني وكان مره حلو الكورس معاها ممكن عشان المادة من المواد اللي ابتدائيه وطبعا ماتاخذ حضور وغياب الا لمن تحصل معجزه واخذت معاها درجه اعلى مما توقعت اصلا اسألتها كانت كلها من الكتاب تحدد لكن النهائي جابت كم فقره واضحه ومو واضحه ماعرف كيف اشرحها !!
LISTENING & SPEAKING 2
اخذته مع استاذه الاء المحمدي مره تجنننن الصراحه وطيبه لاقصى الحدود واسلوب واخلاق لكن زي كل الاستاذات تحب اللي يتفاعل معاها وتحب الوحده تكون فاهمه والعروض عندها كل اسبوع اهم شي
LINGUISTICS
اخذته مع استاذه الاء المحمدي وكان حلو مره بس يبغاله مذاكره اول بأول وتركيز في اسألتها مو عشان هي صعبه بالعكس بس عشان المنهج يبغاله حفظ فمحتاج مذاكره
LITERATURE
اخذته مع استاذه ايمان حمزه خوفوني منها البنات وقالو عصبيه ومن هالكلام وكلللللله بالنهايه طلع غلط بالعكس جزاها الله الف خير تشرح بكل امانه بس تحب ان اللي قدامها يحترمها وتعطي درجات تحسين على المشاركه والحضور والكورس كان معاها يجنن اصلا الاختبارات متكرره حقت كل ترم يعني اللي عندها اوراق الناس اللي قبل تمشي في الماده وبعلامات تجنن انا اخذت عندها علامات ماخطرت على بالي لان اصلا اسألتها مره واضحه اللهم ان المذاكره لازمه في كل الاحوال
TRANSLATION
اخذتها مع دكتوره ناريمان ياناااااس عليها عسل الحرمه هذي في البدايه خوفتنا وسوت علينا عصبيه وبعدين صارت تجنن ومتساهله جدا واختباراتها سهله وطيبه تساعدك قد ماتقدر وفي النهايه اخذت معاها علامه حلوه
RESEARCH METHODS
الريسيرش وماادراك مالريسيرش اخذته مع دكتوره ابتسام فكهاني جدددددا دقيقه الصراحه مع انها طيبه لكن دقيقه مع كثير من الغرور تفشل اللي قدامها وهذا الموقف اللي شلته عليها اكثر شي وتحب الدقه وماتبغى الا شغل ابداع المهم اللي تشتغل معاها اول بأول اتوقع تمشي اما انا طفشني الكورس معاها حسيته ممل حتى الاختبارات كانت تحددلنا كم ورقه نذاكر منها واذا جات الاسئله احس اني مااذكر ولا شي وفي الاخير رسبت في الماده مع اني اتوقع فيه كثير عدوها
وبس هذا كل اللي عندي اتمنى اني ماقصرت مع احد وماابغى منكم الا الدعاء واي مساعده انا حاضره ووجهة نظري في الاستاذات خذوها بمبدأ وجهة نظر طالبه مستواها جيد لاني ترا مو هذيك الدافوره
واتمنى تقولون لي خبراتكم في المواد هذي بالتفصيل مع رايكم في افضل الاستاذات اللي يدرسونها ابغى اراء شخصيه مو تجارب احد ثاني
PHONETICS - phonology - MORPHOLOGY - SYNTAX - FICTION - research
الله يوفق الجميع
|