رد: مهزله
اخواني و اختي المشاركه معانا ,,
قبل لا اقول أي شي أحب أذكركم بقوله تعالي (وعسا أن تكرهوا شيئاً و هو خير لكم)
لأنه أنت تريد و أنا أريد و الله يفعل ما يريد
اللي حصل معاك اخوي أكيد شي يزعل ،، بس ليه تحصر تفكيرك في الجزء اللي مزعلك
فكر فيها من ناحية ثانيه و اللي هي حتفيدك أكيد،،
على سبيل المثال :
خلينا ناخذ الايجابيات و السلبيات في اللي حصل لك ..
السلبيات:
1) تغير وقت الدوام من الصباح إلى العصر.
2) الفله و الوناسة و مباريات أمم اوروبا يمكن تروح عليك.
الإيجابيات:
1) بإمكانك تخلص جميع امورك الحياتية في الصبح (بنك، أحوال، مستشفى -بعيد الشر- ، محلات تجارية ... الخ)
2) تقدر تستغل وقت فراغك الصبح في دوام من 9 لـ 5 مثلا.
3) لو حبيت تاخذ دورات المجال مفتوح (3d max، اوتوكاد، ريفيت، فوتوشوب، انجليزي، ..... الخ )
4) ترتاح من دوشة طلبات المدرسة.
5) أهم نقطه ،، ربك أراد لك من بين 200 طالب انه يحصل معاك كذا ،، ابسط ياخي ربك يحبك :)
دايما خلي نظرتك إيجابية و خصوصا في كليتنا تصاميم البيئة
لأنك لو حتزعل على كل شي زي كذا ،، صدقني ولا دكتور حيهتم فيك,,,
تحب تعرف انا كيف كنت عايش و الان كيف .. عشان تحمد ربك على اللي انت فيه
انا من اول ما تخصصت لين الترم الماضي و انا أشتغل نص دوام من 5 - 11 يوميا و عندي يوم واحد اجازة
تخيل طول النهار في الجامعه اخرج من الجامعه على الدوام اخلص الدوام ارجع البيت عندي تسليم مشروع و لي اكثر من 12 ساعه ما نمت غير المواد الثانيه
3 سنين عشت الحياه الصعبه هذي و تدقدقت مزبوط من الدكاتره و من شغلي ..
الان مع مشروع التخرج أبشرك
صرت مشغول أكثر من أول و صرت شغال في مكتب هندسي مع دكتور و ماسك النشاط في قسم عمارة البيئة و موقع القسم و مشارك في مسابقة عالمية و وحده محلية و عندي مشروع التخرج و مادة ثانية معاها :)
تصدق و تؤمن بالله اني ما اشوف اهلي إلا الليل لما ارجع الساعه 12 في الليل و احيانا ارجع 2-3 ما اشوفهم
لأني انام بعدهم و اصحى الفجر اشوفهم و عليها لين نهاية اليوم
اللهم لك الحمد ,, بعد كل هذا انا مبسوط فوق ما تتخيل
قول الحمدلله و عيش جدولك زي ما نزلك
و على قولة المثل ( أكبر منك بيوم أعلم منك بسنة ) خذ مني الكلام و افرح ولا تزعل ابدا
انا عارف اني تفلسفت كثيييير ،، بس تحمست معاك :))
بالتوفيق للجميع
|