[اقتصادي لغوي]

أستاذة شواقه حاب أتفاعل معاكي بخصوص مسألة صعوبة الدراسة ف القسم ومجالات التوظيف لخريجيه :)

من وجهة نظري لو انتي حابة المادة اللي بتدرسيها وحابة تعرفي عنها أكتر وحابة تستفيدي منها في المستقبل سواء في الدكتوراة والأبحاث ( مثلا عن طريق الابتعاث ) أو في المجال الوظيفي .. ما حتكون صعبة لذيك الدرجة

وحتكوني مجتهدة فيها أكتر ودرجاتك مرتفعة أكتر

أما بالنسبة للتوظيف أنا مؤمن بشيء واحد انو اللي يحب القسم اللي هوا مقدم عليه ويعشقو راح يبدع فيه

بالتالي معدلاتو راح تكون مرتفعة بالتالي راح تكون فرصتو أكبر في التوظيف من غيرو

أتذكر أول ما تخرجت قدمت على سابك وبنك البلاد وقدمت ع ديوان الخدمة وكان عندي أحقية اني أصير معيد ف القسم ...

سابك بطلت منها لأنها في ينبع في الهيئة وأنا ما أحب جو المصانع ههههه

بنك البلاد كنسلت المقابلة الشخصية لأني وقتها كنت ما أحب البنوك بس كانت تجربة اني قدمت وعلاطول طلبو مقابلتي

ديوان العمل جابلي من أول تقديم وظيفة في التأمينات في الجبيل وكنسلتها لنفس السبب اللي كنسلت عشانو سابك

المعيدية للأسف ضيعتها من يدي ولو استغليتها كان الآن أنا دكتور ف الجامعة :)

قصدي انو فيه فرص وظيفية لخريجين قسم الاقتصاد بس طبعا تعتمد على معدلاتك وعلى لغتك الانجليزية ووو الخ

بخصوص التوظيف كمحاضرة ف القسم النظام يقول ( حسب علمي ) انو اذا كان البكالريوس يختلف عن الماستر ما يقدر الواحد يقدم على وظيفة محاضر

بس طبعا اللي عندو فيتامين واو راح تمشي أموره :)

والبعثات زي ما الجميع عارف انهم شددو هادي السنة على شرط امتداد التخصص ...

لكن ممكن يكون فيه فرصة للي معاه ماستر ( وبكالريوسه مختلف عن الماستر ) انو يبتعث على دكتوراة في نفس تخصص الماستر اللي معاه

أنا الآن بقدم ع الماستر وناوي اخلصو ف سنتين عشان أقدم على بعثة دكتوراة في الاقتصاد بما انهم اضافوه لتخصصات الابتعاث :)

عموما ما أقدر أكون دقيق في الكلام عن الوظيفة للي معاه ماستر مختلف عن البكالريوس

لأنو مرات تحصل انو الواحد يتوظف بالبكالريوس مو بالماستر

ومرات واحد يكون معاه بكالريوس وماستر في نفس التخصص والشركات يقدمو عليه ف التوظيف اللي معاه بكالريوس مع خبرة ( لكن ما معاه ماستر )

يا ليتك تتواصلي مع رئيس القسم برضو وتذكريلو البكالريوس اللي معاكي وانو لو اخدتي ماستر ف الاقتصاد ايش ممكن تكون الوظائف المتاحة ليكي

بالتوفيق :)