السلام عليكم ورحمة الله وبركاته..
الله ييسر لكم ويعينكم على اختبارتكم يارب..
أنا بصراحة مستغربة من إسلوبكم: (رح نضربها، إش سالفتك، حسبي الله عليك.... ) كبنات جامعيات مثقفات.
بصراحة أتوقع أن يكون نقدكم وملاحظاتكم على الدكتورات فيها شيء من الموضوعية والاحترام ولا تنسوا في النهاية إنو كل الأستاذات بشر قد يخطئون ويصيبون في تدريسهم وتعاملهم معنا..
وللأمانة.. أنا أخدت مع د. ناريمان ولمن كانت تعصب كنت أعتبرها زي والدتي لما تعصب علي عشان أكون أفضل مو لأنها ما تحبني.. هيه مرة زعلانة من مستوانا في الإنجليزي مقارنة بجامعة عفت ودار الحكمة ومعاها حق ..
لأنو هذا الشي صح مليووووون في المية..
يا بنات د. ناريمان أطيب من قلبها ما في.. بالله في دكتورة في القسم تسوي إعادة للاختبارات زيها!!
والكلمة اللي دايما على لسانها لمن تقول: لمن بنت ترسب عندي كإنو أنا اللي رسبت..
صحيح إنو الدكتورة تطلب واجبات كتير.. بس كل واجب بتحليه يرفع مستواك من جد.. أفتكر لما أخدت معاها ترجمة أول قطعة كان طولها 5 سطور وأخدت مني ساعات!! بعدين كل يوم كانت تعطينا قطعة وكنت أترجمها.. وفي آخر الترم حسيت إني من جد أستفدت من هذا الكورس.. وقدرت أترجم بسرعة وبطريقة صح..
أما لما تكوني غايبة طول الترم وتجي على النهاية تبي تنجحي وإنت مو عارفة إش أخطائك.. كمان الدكتورة مسؤولة إذا نجحت بنت..
يا حلوات.. المشكلة فينا إحنا إنو تعودنا في المدارس نذاكر شي بسيط وكلو مأشر.. إحنا اللي مرة مدلعين ومو قادرين إنو نشد حيلنا للمستوى المناسب لطالبات الإنجليزي..
يا بنات أعطوا كل دكتورة حقها.. ما يجوز دا الشي.. ومرة تانية حأقول يا ريت لمن نكتب عن أستاذة.. نكتب بطريقة موضوعية بناءة متوافقة مع مستوانا الأكاديمي..
أنا الشي اللي خلاني أكتب هنا.. إنو أنا أخدت في أول أختبار مع د. ناريمان درجة واطية.. بس لما عرفت خطئي عرفت إني كنت أستاهل الدرجة الأولى وقدرت إني أرفع مستواي بشكل كبير.. بس اعرفوا أخطاءكم وعدلوها وحتلاقوا نتيجة..
الله يوفقكم كلكم يارب وينجحكم..