جدولك حلو ماشاءلله ومافيه ضغط لانك منزلة 4 مواد تخصص ومادتين عامة سهلة وبسيطة ان شاء لله .
بالنسبة للاستاذات
قانون تجاري : عندك الدكتورة أمل شلبي أحسن استاذة في مواد التجاري كلها وشرحها حلو وماتخرجي الا وانتي فاهمة بس اسئلتها مو سهلة مرة يعني لازم تذاكري تمام عشان تحليها وتكليفها كان سهل ومااظن احد نقص فيه . وعندك الاستاذة سارة الحارثي انا صراحة مااخذت معاها قانون تجاري لكن اخذت معاها مادة ثانية وشرحها مره حلو وتفهم واسئلتها سهلة وبسيطة وتكليفها حلو صح يبالك تشتغلي عليه شويه بس حتعطيكِ الدرجة كاملة . فسواء نزلت المادة مع الدكتورة امل او الاستاذة سارة كلهم حلوين .
قانون دستوري : اتوقع من يوم مافتحت الكلية ليومك هذا كانت الدكتورة صباح المصري تدرس قانون دستوري ومافي احد غيرها ، الدكتورة صباح مااظن فيه احد في الكليه مايحبها ، تدرسك من قلبها وتعطيكِ كل الي عندها وغير شخصيتها الحلوة وخفة دمها 😂❤ نعتمد على الكلام الي تقوله في المحاضرة اكثر من الكتاب ، بس انا السنة هاذي شفتهم منزلين المادة مع الاستاذة نسيبة والسنة هاذي اول سنة تدرس فيها فما اعرف شي عنها 😅.
أحوال شخصية : للحين ماأخذت المادة للأسف 🚶🏻.
مبادئ القانون : اخذته مع الاستاذة عايشة الشهري من أحسن الاستاذات الي مروا عليا 😍 شرحها حلو وتأشر معانا الكتاب وتكليفها مره كان سهل ومتساهلة معانا الله يسعدها يارب 💜 والاحلى من هذا كله انها كانت محامية متدربة فكانت دايما تحكينا عن المواقف الي صارتلها ومن واقع خبرتها فادتنا مره كثير ❤.
بالنسبة للتحرير الكتابي والثقافة الاسلامية هما ينزلولك الاستاذة من عندهم انتي ماتختاريها لان اصلا الاسئلة موحدة ومابيد الاستاذة غير الحضور والغياب وتكليف من 10 درجات والباقي كله بيدك انتي ومذاكرتك واجتهادك ، بس لا تشيلي هم ابدًا مره سهلة المادتين هاذي وحلوة بس اهم شي تذاكري تمام 👌🏻 .
والله يوفقك ويسهلك ويكتبلك الخير ❤.