أستاذة ريم :)
أنا جبت 88 في قدرات الجامعيين ( 86.5 في الجزء اللفظي .. و 89.4 في الكمي .. والتوتال 88 ) .. وهادي كانت أول مرة اختبر فيها هذا الاختبار .. والموزونة عندي 88.84
زمان عام 1426 هـ ( يعني قبل حوالي 8 سنوات ) اختبرت قدرات الثانوية وجبت 86
خريج ثانوية عامة ( علمي ) 1418 هـ بمعدل 98 ٪
أخدت سنتين هندسة ( تخصص كهربائية ) وما كملتها
خريج اقتصاد من جدة 1426 هـ بمعدل 4.47
حاليا باقيلي ترم واتخرج ماجستير تعليم اللغة العربية لغير الناطقين بها
وناوي اقدم على ماجستير ثاني في الاقتصاد في جدة عشان اخلصو واقدم لبعثة دكتوراة في الاقتصاد لأمريكا .. دعواتكم :)
حاب أشاركم باللي أعرفو وربنا يحققلنا اللي نتمناه
فيه البداية ماني حاب اتكلم عن الاختبار من حيث هوا ربحي أو أو الخ .. وهل فعلا يقيس قدرات حقيقية .. وهل فعلا نحتاج لهادي القدرات في الماجستير أو الدكتوراة .. وهل يجب أن يكون فيه قدرات جامعيين للمقلبلين على الماجستير وآخر مستواه أعلى للمقبلين على الدكتوراة .. وهل فعلا فيه فرق حقيقي بين اختبار قدرات الثانوية واختبار قدرات الجامعيين .. وهل قدرات الجامعيين مرات يكون اسهل في أوقات معينة من السنة وأوقات يكون صعب .. وهل اللي تخصصو لغة عربية مثلا أو تاريخ لازم يخوض هادا الاختبار الخ الخ الخ .. اكيد فيه ناس عاجبهم الاختبار وفيه ناس محايدين وفيه ناس تنتقد شيء أو اشياء في الاختبار .. وللعلم اختبار gre نفسو عليه اشكالات كبيرة في أمريكا نفسها حتى بعض الجامعات ( وان كانت قليل ) ما تعطيه اي اعتبار وتهتم في قبولها للطلاب على مؤشرات تانية .. فازا كان هذا حال ال gre العتيد فما بالك بقدرات الجامعيين اللي مالو كم سنة عندنا ولايزال محلي ما وصل للعالمية زي gre أو gmat والأشياء الكبيرة هادي ههههههههههه ..
المهم الآن هوا صار عائق في جيلنا ( ما واجهوه أهل أول ) عشان نلتحق ببرامج الماجستير أو الدكتوراة ولابد نلقى طرق انو نتجاوزو ونعديه ونجيب الدرجة المطلوبة عشان نواصل مشوارنا وما نوقف محلنا .. والقدرات هادا ان شاء الله لينا معاه كلام تاني ازا صرنا دكاترة او موظفين في أماكن تسمحلنا نطور فيه أو أو أو حتى نلغيه ونحط مكانو اشياء تانية حسب ظروف داك الوقت كمان .. فزي ما يقولو لكل مقام مقال وربنا يعين :)
عموما فيه بعض التكنيكات اللي استخدمتها في الإجابة في قدرات الجامعيين ( راح اذكرها بدون ترتيب ) :
1- مثلا في ذهني دائما انو الاجابة على السؤال الواحد أو الفقرة الوحدة ما تاخد أكتر من دقيقة
لكن طبعا عمليا بتاخد ع الاقل من دقيقة الى دقيقة ونص
والسؤال اللي احس اني اخدت فيه دقيقتين أو أكتر يعتبر مصيبة ارتكبتها واعاهد نفسي وأنا جالس اجاوب اني ما اعيد الخطأ الفادح دا مره تانية
خلاص كل سؤال لوه دقيقة وانتهينا لأن الوقت ما يسعف
2- عيني كانت دائما ع الساعة وكم باقي من الوقت مقارنة بكم باقي من الاسئلة ( وسويت الشيء هادا في كل قسم من أقسام الاختبار ) .. ولأني كنت قريب من شاشة البروجكتور فكان الوقت واضح وضوح الشمس قدامي هههههههه
3- من عاداتي السيئة في الاختبارات اللي من هادا النوع السريع اني اكون محني ظهري وأنا أجاوب وطبعا كان فيه واحد على يميني جالس وظهرو معتدل وشوية يحط رجل على رجل .. فأتمنيت أقدر أسوي زيو لأن هذا يريح الظهر وبالتالي يريح الأعصاب
4- أحاول اني أجي الاختبار مرتاح ونايم قبلها كم ساعة وآكل بس مو مره متقلها عشان تكون معدتي مرتاحة
5- السؤال اللي ما أعرف اجابتو اعديه واشوف غيرو واقول لنفسي ازا بقي وقت رجعتلو
6- عادة ما احب احط اجابات على طريقة شختك بختك .. مع اني في بعض الاختبارات سويتها مثلا لما قدمت لاختبار توفل لبعثة في الخطوط السعودية .. وللأسف ما انقبلت ههههههههه .. بس ما سويتها لما قدمت لاختبار أرامكو ( برنامج التشغيل ) عام 1419 وجبت المركز الأول في اختبار قدراتهم ..
بصراحة قعدت افكر قبل اختبار قدرات الجامعيين هل استخدم في الاسئلة اللي ما اعرفها شختك بختك ولا ما استخدمها .. فقلت لأ لا تستخدمها مهما حصل لانو ممكن يكون فيه طريقة معينة في التصحيح تخليهم يعرفو انو هل انتا جبت اجابة قريبة أو بعيدة مره .. بالتالي اذا اتكررت الاجابات الخاطئة البعيدة جدا عن الصحيحة ممكن هذا الشيء يخليهم ( او يخلي الكمبيوتر ) ينقصلي درجات من باب استخدامي للعشوائية بدلا من استخدامي للطريقة العلمية .. لكن في حالات نادرة اذا كنت حاس الاجابة صحيحة بنسبة 98 ٪ مثلا اختارها واقول ربنا يستر .. فالحاصل تركت اجابات كثيرة بدون جواب وما استخدمت شختك بختك
7- دائما قبل ما أفتح كل قسم من أقسام الاختبار القي نظرة سريعة على القسم بسرعة واعرف نوعية الاسئلة في هذا القسم هل هيا قطع أكتر أو رسومات أكتر أو رياضيات اكتر الخ .. واقارنها بالوقت المعطى لاجابة هذا القسم .. عشان لا يكون عندي دائما رهبة او قلق من الجاي قدام في القسم من اسئلة
8- القسم اللي نطلع منو ونروح على قسم ثاني ما احاول ارجعلو ابدا لأني احس بكركبة وضيقة خصوصا انو هذا الشيء كمان ممنوع في الاختبار فانتا تخاف احد يكفشك ههههههههه
9- بالنسبة للقطع استخدمت طريقة قرأت عنها في الكتاب التعريفي الخاص ب step .. اللي هيا اقرأ الأسئلة قبل ما تروح للقطعة .. بالتالي انتا ما تضيع وقتك في قراية قطعة كاملة ما راح تحتاج لكل معلومة صغيرة وردت فيها .. وفعلا استفدت من هادي الطريقة
10- طبعا استفدت من كتاب البابطين وكتاب محمد حسن طيب لكن للأسف ما اعطيتهم حقهم في المذاكرة خصوصا الكتاب الثاني .. وطبعا ما نظرت في أي كتاب ثاني ماهو مخصص لقدرات الجامعيين تحديدا .. ومن الاشياء اللي استفدتها من كتاب الباطين خصوصا وممكن وردت كمان في الثاني انو مرات يعطيك لحل المسألة الرياضية طريقتين وحدة ممكن نسميها بدائية وتانية تقليدية .. وكمان تتعلم منو ومن التاني انك تفكر في السؤال وتكون لماح لأشياء في السؤال تساعدك على اجابة المسألة الرياضية بدون جهد يذكر لأنو مرات تكون الأرقام معطاة بطريقة تسهل الحسابات بشكل سريع لو انتبهت ليها .. وطبعا لا شك استفدت كتير من كتاب الطيب في طريقة حل اسئلة الرسوم ( الأشكال ) اللي يقولك اذكر الشكل التالي او يقولك ايش هوا الشكل الغريب عن المجموعة الخ .. وكمان لاحظت انو كتاب محمد حسن الطيب النص التاني منو تقريبا كلو عن الأشكال الهندسية ( مثلث دائرة مربع متوازي الأضلاع هرم مخروط اسطوانة الخ ) فما كنت مهتم كتير اني اذاكرو لانو من خلال اطلاعي على نماذج للاختبار في كتاب الباطين وبعض النماذج اللي مرت عليا في النت هنا في الموقع وكدا لاحظت انو مافيها كثافة في الاشكال الهندسية او تكاد تكون نادرة جدا .. فما اهتميت اذاكر الجزء هذا وقلت لو جاء شيء من هادا راح تكون القوانين معطاة عندي بس الله يعينني افكر في المسألة واستخدم القوانين وربنا يعين :)
الخلاصة الكتابين هادي ( وشفت فيه كتاب تاني من جزئين بس ما اشتريتو ولا أدري عن محتواه ) تفيدك من ناحية انك كل ما اطلعت على اسئلة اكتر وحاولت تجاوبها واتعرفت على طرق اجاباتها يصير عندك حصيلة لا بأس فيها عن نوعية الاسئلة اللي ممكن يجي زيها في الاختبار .. يعني في الأخير انتا بتحفظ بالتدريج طرق الاجابة على معظم اسئلة القدرات وكلو واحد وذاكرته وطريقتو في الاستعداد للاختبار في مدة قصير او مدة طويلة .. طبعا المدة الطويلة والعمل على مراحل وهدوء أفضل بكتير من العجلة لما نحضر لاختبار زي هادا :)
11- اخدت فكرة لا بأس بيها عن الامتحان انو الامتحان لقدرات الجامعين يركز اكتر شيء على المنطق وبدرجة أقل على الرياضيات وعلى معرفتي بمفردات اللغة .. لانو تقرييا المنطق والعلاقات المنطقية في نظري هيا جوهر ولب اختبار القدرات .. طبعا مع القدرة على تفعيل مهارات التفكير السريع وتظليل الاجابات والاشياء السابقة اللي ذكرتها ليكم فوق :)
12- طبعا ما أنسى أقول انو هادي اللي الاشياء اللي انا مقتنع فيها .. وممكن تناسب أحد تاني وممكن ما تناسبو .. بس كمان ممكن يكون فيه اشياء متفق بين الجميع انو لا خلاف عليها .. فلابد نستفيد من بعض
13- جبت معاية مراسيم ( اقلام رصاص ) ومساحة كلها جودتها عالية .. بس اكتشفت انو مراسيمهم افضل من اللي انا جبتها من ناحية التظليل للاجابات .. مراسيمهم من نوعية المراسيم اللي تتعبأ من ورى المرسام .. كل ما خلص الرصاص تشيل قطعة وتركبها من ورى المرسام وتطلعلك قطعة جديدة تستخدمها .. بس مساحة المرسام هذا سيئة جدا .. فالأفضل تجيب معاك مساحة ممتازة
14- وكنت جايب علبة موية صغيرة عشان ازا عطشت اشرب منها .. وطبعا الاحسن انك تروح على دورة المياة وتتأكد انو بطنك فارغة نوعا ما من المياه والسوايل الخ خصوصا اذا كنت زيي تتوتر اذا كنت في اختبار ومحتاج تروح الحمام وما تقدر تطلع وانتا في وسط الامتحان .. فالأفضل بكل تأكيد انك تروح الحمام قبل ما يبدأ الاختبار عشان اعصابك تكون رايقة وذهنك صافي
15 - أخيرا كان نفسي آخذ دورة في الاعداد لهذا الاختبار بس من سوء حظي ما دخلت أي دورة من الدورات
وسلامتكم :)
يعني هادي تقريبا أهم الأشياء اللي في بالي عن اختبار قدرات الجامعين وطريقة التعامل معاه حبيت اشاركم فيها
وحاب أسمع منكم ونتناقش سوا ويا ليت جميع اللي اختبرو هادا الامتحان وجابو درجات عالية يشاركونا بطرقهم في التحضير للاختبار والتكنيكات اللي استخدموها في الاجابة على الاختبار عشان تعم الفائدة الجميع
تحياتي وربنا يحققلنا اللي نتمناه