[彡yS❤Ry彡]

I Have no Idea

انا شايف اغلبكم يقولون نبغا تخصص معين وهو لسى مادرس شي في الطب
ترى فيه ناس سنه خامس وسادس ولاحددوا ايش يبغون لسى
هو شي حلو انه يكون عندك فكره مبكره عن التخصص اللي بتدخله

بس فكروا في التخصص من كل الجهات
يعني مثلا تخصص طب اطفال
فكر زي كذا اولا شخصيه المريض بما انهم اطفال بتلقى صعوبه في التعامل معاهم شويه اذا كان يبكي ولا خايف ولا شي زي كذا بنفس الوقت حلو لما تعالج طفل ويجيك اليوم الثاني مبسوط وينطنط قدامك شعور حلو
وفكر كمان دراسة الاطفال كيف بتكون وماراح تعرف هذا الشي الا لما تجرب تدرس شي عن الاطفال


تخصص اورام سرطانيه مثلا
حلو انك تحاول تعالج واحد من امراض خبيثه زي كذا بس
كمان شوف كيف بتتعامل مع شخصيه المريض يعني بتتعامل م مرضى احتمال انهم يموتون بعد فتره بسيطه
او كيف تقنع واحد يقطع او يستئصل جزء من اعضائه عشان ماينتشر المرض عنده ع سبيل المثال

وقيس ع هذي المثالين باقي التخصصات
وكمان حاول دايم تختار الشي اللي تحبه وتحس انك تميل له وتبغا تمشي فيه
لاتختار شي لمجرد انه سهل او صعب لآن كلها تختلف من نظر شخص لآخر
اختار الشي اللي انت تحب تدرسه وتحب تكون فيه ركز ع " تحبه "


ماقصد من كلامي تثبيط همه احد او تخريب عليكم
بس برضوا الواحد يحب يساعد اصحابه بعض الاحيان

معليش كلامي مراااا طويل بس لاني ماكتب مواضيع عن شي معين اصلا الا نادرا
فلما شفتكم تتكلمون عن هذا الشي حبيت اكتبه في رد احسن من اني اكتبه في موضوع مستقل

<< داااايم يتفلسف مادري ليه