بالنسبة للمنهج :
- مافي منهج معتمد للمادة.
- والدكتورة منى أصلا ما تشرح شي، بس تدخل المحاضرة تسأل إذا محتاجين شي وترسلكم الأوراق المطلوبة وتطلع.
- كمان رح ترسلكم ملفين pdf فيها نماذج توفل وتقولكم الاختبار ع نمطها.
بالنسبة للواجبات :
- رح ترسلكم أول مرة ورقة اسمها ورقة التسجيل، هذي الورقة تطبعوها وتكتبوا بياناتكم فيها، وكمان تعطوها جهة التدريب اللي تتدربوا فيها يكتبوا بياناتهم -أقصد مشرفتكم بالتدريب- ويختموا ختمهم الرسمي، بعدين تاخذي هالورقة وتسوي لها سكان وترسليها للدكتورة في قسم الواجبات.
- الواجب الثاني .. بعد فترة من تدريبكم رح ترسلكم ورقة الحضور والغياب، هذي الورقة تسجلي فيها يوميا اليوم اللي تداومي فيه، وساعة وصولك لمكان التدريب، وتاريخ اليوم، والساعة اللي طلعتي فيها من مكان التدريب، وعدد الساعات اللي مكثتيها في مكان التدريب. يعني مثلا داومتي الساعة 7:00ص وانصرفتي الساعة 1:00م تصير عدد ساعات مكوثك في المكان 6 ساعات. ولما تخلصي ساعات التدريب وفي نهاية الترم تسوي للورقة سكان وترسليها للدكتورة في قسم الواجبات.
- في الأسابيع الأخيرة ترسلك الدكتورة ورقة التقييم، هذي الورقة تعطيها للمشرفة اللي اشرفت عليك في التدريب تكتب فيها درجة تقييمك وتخليها في ظرف محكم ومختوم بختم المكان . يقال هذا الورقة سرية وما أحد يشوفها. وهذي الورقة ما تسوي لها سكان ولا ترسليها في قسم الواجبات.
طريقة التدريب (الجزء المهم)
- مو لازم تبدؤوا التدريب من بداية الترم، ع حسب ظروف الطالبة، متى سمحت ظروفك للتدريب روحي تمرني اقصد تدربي 😹
- في البداية لما تختاري مكان التدريب لاتبدئي التدريب، بس كلميهم انك رح تتدربي عندهم، وانتظري موعد المحاضرة وكلمي الدكتورة منى انك رح تتدربي في المكان الفلاني واذا وافقت سمي بالله وروحي اهجمي عليهم. وسلميهم ورقة التسجيل.
- طبعا مدة التدريب 60 ساعة. يعني اذا ضغطت ع نفسك وداومت أيام متواصلة رح تخلصي في حدود اسبوعين. وعادي اذا داومت ع أيام متقطعة او ساعتين في اليوم، بس انتبهي لازم تلتزمي بقوانين المكان اللي تتدربي فيه عشان تقييمك يكون كويس ويعطوك درجة حلوة.
- مثلا اذا اخترتي تتدربي في مدرسة، طريقة حسابك للساعات تبدأ مجرد دخولك للمدرسة، حتى إذا ما شرحتي للطالبات، المهم تواجدك في بيئة العمل.
- اذا كونتي موظفة بس يحتاج تعريف من جهة عملك فية المهام اللي تسويها و خلاص تبدأئي تكتبي تقريرك و تدي تقيمك لمديرتك عشان تقيمك .. يعني حتتدربي في مجال عملك .. و مايحتاج تعبي ورقة الحضور والغياب و يعتبر ورقة تعريفك انو موظفة بديل لورقة الحضور و الغياب .
نهاية التدريب :
- لما تستلمي من المدرسة ورقة تقييمك وفي نهاية الترم رح تطلب منك الدكتورة تكتبي تقرير Report عن تدربك في المكان اللي اخترتيه.
- عدد الصفحات من 2 إلى 3 صفحات.
- رح تعطيكم توجيهات وأشياء تكتبوها في التدريب مثلا:
تكتبي معلومات عن مكان تدريبك، اسم المكان وطبيعة العمل فيه، كمان تكتبي عن الأنشطة اللي سويتيها في مكان التدريب، وتكتبي عن المشرفة اللي أشرفت عليك، اسمها، وهل كانت متعاونة معك أو لا. كمان تكتبي عن العقبات اللي واجهتك في مكان التدريب، وتكتبي عن الايجابيات والسلبيات، وترفقي مع التقرير صور او نماذج لبعض الأنشطة اللي عملتيها، مثلا لو كان تدريبك في مدرسة، أرفقي مع التقرير نماذج من الاختبارات القصيرة اللي رح تسويها للطالبات، اذا وزعتي عليهم مثلا أوراق تساعدهم في المذاكرة وشروحات كمان احتفظي بنسخة منها، ارفقي مثلا جدول الحصص تبعك، واذا حبيتي ترفقي نماذج الاختبارات اللي تسويها لازم ترفقي النماذج اللي فيها حلول الطالبات وتصحيحك، لا ترفقيها فاضية. في نهاية التقرير تختميه بنصائح للطالبات الجامعيات اللي رح يجو من بعدك.
معلومة:
في اختبار الفاينل تعطيك سؤال مقالي تكون اجابته من التقرير اللي تكتبيه، في اختبار المناطق اعطت البنات سؤال عن اسم المشرفة اللي اشرفت عليك في التدريب. والبنات اللي اختبروا في جدة سألتهم عن المشاكل او الصعوبات اللي واجهتهم في التدريب. واذا كتبتي اجابة مختلفة عن كلامك اللي في التقرير رح تأثر ع درجة التقرير ..
يوم اختبار الفاينل :
مافي منهج تعتمدي عليه في المذاكرة، بس ركزي ع الملفات اللي رح ترسلها لك الدكتورة لأن فيها نماذج وفيها قطعة وكمان البنات اللي ارسلتلهم الملفات كمان ارسلت لهم ملفين للتوفل غير النماذج اللي عند الدكتورة، واحد منهم اعطتنا منه قطعة نسخ لصق ماغيرت شي.
اسئلة الفاينل :
السؤال الاول قطعة وعليها أسئلة.
السؤال الثاني املئي الفراغات وتعطيك كلمات جديدة وانتي تحطيها في المكان المناسب.
السؤال الثالث اسئلة قرامر.
السؤال الرابع سؤال مقالي عن التقرير.
توزيع الدرجات:
20 درجة ع التقرير.
40 درجة ع التقييم.
40 درجة في الفاينل.
بنات انتبهوا ..
الأوراق اللي ترسلها لكم وانتو تطبعوها و تعبوها و ترجعو سوو سكان لها و ترسلوها زي الواجب( ورقة التسجيل +ورقة الحضور و الغياب ) فقط
و كمانا ( ورقة التسجيل + ورقة الحضور والغياب + الظرف اللي فيه ورقة التقييم + تطبعي اوراق التقرير + النماذج اللي رح ترفقيها مع التقرير) كلها تحطيها في ظرف كبير وتقفليه تمام وتسلميه للدكتورة يد بيد يوم اختبار الفاينل مكتوب علية اسمك و المادة و رقمك الجامعي .