[ام حمدان]

ياقلبي الله يعوض عليكم جميع
والله ماادري اذا كان الحل عندي مثل ماتتوقعون او لا
انا طالبه عاديه جدا لاني دافوره ولاني مهمله بس احاول ابذل الي اقدر عليه

بالنسبه لرسوبكم ممكن يكون له اكثر من سبب

ممكن تكون طريقه مذاكرتكم غلط او فهمكم للمقال وتركيبه غلط او عندكم اخطاء في الكتابه لاتغتفر ووانتوا مو حاسين فيها

اول شي لازم تتاكدوا من فهمكم لتركيب كل مقال تدرسونه بشكل صحيح والافضل تروحوا لاستاذه الماده بنفسكم وتفهموا منها
ولازم تكتبوا مقالات منوعه على كل انواع المقالات المطلوبه منكم وتعرضونها عالاستاذه لانها افضل شخص يعلمكم باخطائكم لو حتى ترسلونها على الايميل لها وااتوقع اغلب استاذات الرايتنق يردوا على ايميلاتهم

رجعوا القرامر الي تحسوا انكم دايما تلخبطوا فيه
حاولوا وانتوا تعبروا ماتسختدموا غير الكلمات الي تكونوا متاكدين 100% من السبيلينق تبعها
ابعدوا عن التكرار في الكتابه يعني لاتكرروا الكلمات الي استخدمتوها لانها هالشي تنقصوا عليه
حالوا تعرفوا وتتاكدوا من استاذه الماده ايش انواع الازمنه الي تناسب كل مقال لانه ممكن تكونوا كتبتوا المقال بالتركيب الصح وكتبتكم كانت كويسه لكن العله في الزمن الي استخدمتوه ممكن يكون غير صحيح واكيد هالشي بتنقصوا عليه كثير

علامات الترقيم وخلافها امور بسيطه لكن ننقص عليها كثير لو اخطانا فيها فحاولا تقروا كل شي عنهم ومتى تستخدم ومواضعها

كل هالامور الي ذكرتها ممكن تكون هي سبب رسوبكم او احدها
فاحرصوا على تقوية انفسكم فيها

انا طريقة مذاكرتي للرايتنق
1- اتاكد من فهمي لتركيب كل مقال
2- امسك مواضيع منوعه من النت واقراها واخذ منها افكار وارجع اكتب المواضيع باسلوبي انا وشويه شويه القى في تحسن يعني ممكن من المره الاولى ماتطلع معك افكار كثير فمن المره الثانيه او الثالثه يدك تاخذ عالكتابه وتحسي انك صرتي افضل كل مره
3- اراجع مواقع فيها افعال وصفات وادوات ربط كثير واحفظ الاسهل منها بالنسبه لي حتى استخدمه وقت الحاجه في التعبير وحتى انوع في كتابتي

والحمدلله في الامتحان تجينا مواضيع معقوله وغالبا يكون عندنا فكره عنها بس ممكن رهبه اامتحان تخلي االبعض يفقد الثقه في نفسه ويخطا في امور تافه لكن ننخسف عليها

وشي مهم جدا زعلني منك ياranas
ليه تفكري في الرسوب اذا رسبتي مره او مرتين مايعني انك ترسبي على طول بعيد الشر
شدي حيلك واعملي الخطوات الي قلتلك عليها وعندك فهرس روابك تقويه اللغه المثبت اطلعي عليه وبتستفيدي كثير وتوكلي على الله وادعيه ليل نهار يرزقك النجاح وبدرجه عاليه وكوني على يقين انه راح يتحقق هالشي وربي راح يكون عند حسن ظنك به صدقيني
اخلي ايمانك بالله قوي ولا تتركي ابليس يلعب في مخك

اتمنى تتقبلوا كلامي كاخت لكم وماتزعلوا مني
وعندكم قسم الملخصات في مواضيع تفيدكم عن الرايتنق وكان فهرس روابط تقويه اللغه المثبت
ولو تعرفوا مدرسه ممتازه وممكن تمشي معاكم خطوه بخطوه وتساعدكم قي اجتياز الماده وايمانياتكم تسمح فلا تترددوا ابلوا كل الاسباب الي تقدروا عليها

وربي يسهل عليكم موادكم كلها ويرزقكم فيها بااعلى الدرجات يارب