مساء الخير
حبيت اقولكم ايش صار معايا في المناقشه المفروض انزل الموضوع من يوم السبت بس ربي ماكتب ..
أول حاجه انا مع دكتوره عيشه عوض وطبعا كل مااخلص جزئيه في البحث ارسلها لها ايميل وماشاء الله ماتطول في الرد وترسلي التعديل عموما طفشتني وطفشتها من كثر الايميلات
هيه انسانه جدا دقيقه لدرجة تعدلي الفواصل والنقط وعموما التصحيح اللغوي واملائي وكل حاجه تركز فيها ماشاء الله عليها .
طبعا بعد ماخلصت وبعتلها كل الاجزاء بعد التعديل ورجعت برضو عدلتلي وكان التعديل الاخير على الايميل ,
بعدها طبعت البحث بعد ماعدلت كل التعديلات اللي طلبتها رحتلها السبت مو اللي فات اللي قبلو اتفاجأت انها تقولي انا حشوفو وابعتلك ايميل اقولك انو تم الانتهاء من قراءة البحث وترجعي تاخذيه وتسوي التعديلات في نسخه جديده , ووصلني ايميل منها يوم الاثنين انو تم الانتهاء ورحتلها الثلاثاء اخذتو وحددتلي موعد المناقشه السبت اللي فات مع احضار نسخه جديده للبحث بعد التعديل الاخير والتقرير نسخه جديده والبحث النسخه اللي عدلت عليها اخر مره ، وكمان نسخه من البحث والتقرير على cd
وجاء يوم المناقشه كانت نص ساعه تقريبا سألتني اول سؤال ايش المكان اللي كان نفسك تروحي تدربي فيه وتطبقي كل دراستك وتلاقي فعلا مجال لكل اللي درستيه ؟
السؤال الثاني ايش اقرب دراسه من الدراسات السابقه لكِ وليه ؟
السؤال الثالث قالتلي افتحي الدراسه الميدانيه وقوليلي كيف اثبتي كل فرض في بحثك وهل تحققت فروضك او لا ؟
السؤال الرابع ايش ممكن تقوليلي توصيات او مقترحات لبحثك ؟
وخلاص عموما كانت الحمدلله كويسه وعدت على خير ... عقبالكم .