[redcandle]

السلام عليكم
انا اليوم حابه اكتبلكم قصه حياتي مع اللغات الاوربيه بما انو الترم الجاي حايكون اخر ترم ان شاء الله ليه وكمان حابه تستفيدوا من تجربتي وعشان عيون حنين الود كمان
اول حاجه حبدا بمواد المستوى الاول
ريدنج 1 اخدته مع استاذة الاء المحمدي الله يذكرها بالخير كان المنهج او الكتاب احس ماله اي فايده بس هيه كانت تعطينا فوكابلري نحفظها وتختبرنا فيها كل اخر اسبوع ومررره استفدت من هادي النقطه واسئلتها في الاختبارات كانت سهله نوعا ما
ريدنج 2 كان مع استاذة سحر ناصيف كان الكتاب مو مره مفيد ماستفدت منه بس كانت تعطينا كتاب تاني حق فوكابلري اسمه 504 مررره روعه هادا الكتاب وبالنسبه للاختبارات كانت شويه صعبه لانو داك الترم صارت الاختبارات موحده
لسيننج 1 كان مع د خديجه باوازير الله يسعدها دنيا واخره كان المنهج هباره عن فوكابرلي نحفضها ونعمل عليها دكتيشن والفاينل كام فيه فراغات ودكتيشن برضو ونسيت اقولكم عملنا مسرحيه اخر الترم كانت مرره ممتعه
لسيننج 2 كان مع د صفاء المنصوري الله يحفظها ويطول في عمرها يارب كان المنهج افتكر برضو فوكابلري ودكتيشن وكمان برضو مسرحيه اخر الترم ومررره كان ممتع الكورس معاها
الرايتنج1 الكورس كان له كتاب بس مادري ايش فايده الكتاب مرره ماستفدت شي انا اخدته مع مس الاء المحمدي كان في اختبار في البدايه على جزئية السكلز وبعدين اختبارين على المقال
صراحه استاذة الاء انسانه مررره عادله وتعطيكي حقك ومريح الكورس معاها
الرايتنج 2 كان مع استاذة نسرين الحربي مرره احس ماستفدت شئ من الكورس لانو هيه بتشرح صح بس انا بصراحه ماكنت افهم منها بس والله اذا شافتك انك مهتمه وتبي تفهمي وتسلميها الواجبات وتساليها عليها مررره تهتم فيكي وتعطيكي حقك
كدا اكون خلصت مواد المستويات الاولى وان شاء الله اكمل الباقي بعدين لانوا تعبت دحين من الكتابه واتمنى تستفيدوا من اللي كتبته