[أرنو للقياه]

عبير العسيري
وعليكم السلام ورحمة الله وبركاته
الدورات ما يقارب 20، الله يبارك لي ولك
الرسوب في إحدى المواد أكيد حيقلل فرص قبولك خصوصا والمنافسة شديدة بين المتقدمات
سألت لك سكرتيرة إحدى الأقسام: هل بإمكان طالبات الانتساب التقديم على وظيفة معيدة أو لا؟
وحنقل لك جوابها
قالت هي تقدّم عادي وناخذ أوراقها، لكن بعض مشرفات الأقسام عند الفرز تستبعد المنتسبات
وهذا يختلف من مشرفة لأخرى، وأيضا من فرع لآخر
يعني فرع جامعة عبد العزيز بالكامل أو رابغ ممكن يكونوا أكثر تجاوزا
وقالت: حلو يكون معاها شي يرفع نسبة ترشيحها زي درجة توفل عالية
لأنه المنافسة شديدة وأكيد هم في الأخير حيختاروا المعيدة الأفضل من جميع الجوانب



جوجو
أكون صادقة معك، بمجرد ما تقولي إنك محتدرسي في الخارج فحطي ببالك إنه ممكن يستبعدوكِ مباشرة
أنا كنت في مثل موقفك ومحتارة، أقدر أكمل ماجستير هنا لكن برا صعب، وماكنت عارفة ايش حقول لو سألوني
ما أبغا أكذب وأقول: أوراق سفري جاهزة. لأني أؤمن بأن الوظيفة رزق، والرزق لا يُستجلب بالمعصية، بالكذب في مثالنا هنا
وبنفس الوقت ممكن تتيسر ظروفي في المستقبل و ييسر الله لي أسباب السفر
فاستخرت وتوكلت على الله، وقلت لو سألوني بقول: إن شاء الله. فلو نصيبي في هذي الوظيفة ربي حيشرح صدرهم ويسدد قولي
المهم وقت المقابلة سألتني عالابتعاث وقلت ( إن شاء الله )، فجات بتكمل إلا واللي جنبها قاطعتها وسألت سؤال ثاني خارج عن موضوع الابتعاث
والحمدلله هو داكا السؤال وبس، واتغير الموضوع مباشرة، بينما صحبتي جلسوا يفصّلوا معاها ويقولولها حتروحي مع مين؟ قالت لهم أخويا يدرس هناك. قالولها طيب لو رجع كيف حتسوي؟
فاسألي الله أن يدبرك بأحسن تدبير، ولو كانت المعيدية نصيبك ثقي بأن الله سيخرجك من مأزق هذا السؤال بألطف ما يكون


xxvxx
الحمد لله .. جنة الدنيا العلم عن الله
المحاضرات اللي تشرح (( أسماء الله الحسنى )) تغذي هذي المعاني العميقة في النفس
تجعل العبد يحسن الظن بربه ويعيش في طمأنينة وثقة مهما تقلبت به الأحداث يمنة ويسرة


سبحان الله لو أحكيك كيف رزقني ربي هذي الوظيفة تستغربي .. بعد ما اتخرجت لقيت زميلاتي الأقل معدلا اتوظفوا في أماكن أفضل
بعضهم بعمادة تقنية المعلومات بالجامعة والبعض الآخر بالدعم الفني للمعامل واللي معيدات بالساعة واللي معيدات بجامعات خارج جدة
أما أنا فاشتغلت في مدرسة خاصة براتب متدني وحالة يرثى لها : )
ولما جاتني وظيفة إدارية كويسة بالجامعة، رفضت مديرة مدرستي أخرج لأنه عقدي لسا ما انتهى، مع إنه كنا بنهاية الترم خلاص
فاتخيلي تشوفي بعينك وظيفة بالجامعة تروح من بين يدك وبسبب ايش !! عدم تعاون المديرة معاك
ودارت الأيام .. ومرت السنوات .. ورزقني ربي المعيدية في الوقت المناسب بل والمكان المناسب
في الوقت المناسب فهذه قصة تطول .. أما المكان المناسب فالحمد لله اني ما اتعينت معيدة خارج جدة مثل صحباتي اللي اتوظفوا قبلي لأني وقتها حضطر أضرب مشوار روحة ورجعة
وربما لو اتعينت معاهم أول ما اتخرجت وجاتني هذي الوظيفة الآن، ممكن ترفض الجامعة إجراءات نقلي لجدة


شوفي سبحان الله كيف كانت البداية: مؤلمة، محبطة ... ثم ماذا كانت النهاية
بل كيف كانت كلها شر لما يراها الناظر لأول وهلة ، وهي تخفي خلفها من الخير مالا يستوعبه العقل
وقصة يوسف عليه السلام تعلمنا هذا المبدأ
أصحابه خرجوا من السجن قبله، ورغم إنه كان من المحسنين، من المتميزين، لكنه بقي في السجن بضع سنين
خرج الأول فقُتل، والثاني أصبح خادم
وهو عليه السلام كان آخر من خرج، لكن انتظاره طال ليصبح في الختام عزيز مصر !
ويختم تجربته وكل الأحداث اللي مرت به بقوله
{ إِنَّ رَبِّي لَطِيفٌ لِّمَا يَشَاء إِنَّهُ هُوَ الْعَلِيمُ الْحَكِيمُ }


الله يرزقني وإياك كمال التوكل عليه سبحانه وتعالى وحسن الظن به
ويبارك لنا أجمعين



.