[كريستيانو]

ابي لي مهرة ما عسفت صغيره وبنت حصان
ابوها اللي يفك المشكله ويزبن الجاني

واخوها لو تعزوى باسمها فزوا له العربان
يحق لها الفخر في قولة آل فلان جداني

ابيها في بحر عشرين لا زود ولا نقصان
ابيها اقصر طويله والوصوف اشكال والواني

ابي الجبهه كما الصبح وكما القوس ... اسود الحجان
وابيها ناعسيه ونرجسيه سود الاعياني

وابي رمش كما ريش يغطي الثلج في الاوجان
وابي جفن يشيل الرمش طربان وكسلاني

وابي خد كما ورد تنمى في طرف بستان
وابي خشم صغير مثل حد السيف شاماني

وابي البسمه كما البرق وثنياها كما المرجان
وشفاها جمرتين وفمها خاتم سليماني

ابي شعر مثل ذيل الفرس لا طبت الميدان
او الشلال لامن بات ليله بين الامتاني

ابي جيد سوات ابريق فضه ناتق مليان
وصدر كنه مرايه عليها طلع رماني

ابي ظهر كما الجدول وقد مثل غصن البان
وخصر مثل مجدول العنان وجسم روياني

ابيها نابيه ردف وبطن ضامر وجوعان
ابيها مدمجة ساقٍ وقدمها لسان ثعباني

ابيها بنت عز من جسدها ينعم الفستان
ابي الرقه والدقه لها باطرافها شاني

وابي المشية كما اللي طالع من المعركة كسبان
وابيها ترش مع خطواتها مسك وريحاني

ابي الصوت الى مني سمعته كن فيه الحان
يدقدق مسمعي ويثير كل السحر باشجاني

ابيها حب واخلاص وهواجيس وفرح واحزان
ابيها مثل ما دكتور اهل العشق وصاني

ابيها لوحة ماصورتها ريشة الفنان
ابيها جوهره ماجابها قاصي ولا داني

ابيها تنتصر لي من زمان حطني نيشان
وتبشر بالغلاء اللي ما لفى به واحد ثاني

مهرها قلب .. وشعر يهز القلب والوجدان
والبسها القصيد وتصبح اوزاني وقيفاني

ابي اللي فات واللي فات صعب ومن لقى العنوان
يرد العلم والا افضل ابقى اعيش وحداني

اهم ش سعوديه